ଫେବୃଆରୀରେ ପଂଚାୟତ ନିର୍ବାଚନ

ଭୁବନେଶ୍ୱର : ତିନି ବର୍ଷ ହେଲାଣି ପୌର ନିର୍ବାଚନ ହୋଇପାରୁନାହିଁ । ପଂଚାୟତ ନିର୍ବାଚନ ପାଇଁ ବି ସରକାର ପ୍ରସ୍ତୁତ ନାହାନ୍ତି ବୋଲି ମଝିରେ ଚର୍ଚ୍ଚା ହେଉଥିଲା । ଫଳରେ ପୌର ନିର୍ବାଚନ ଭଳି ପଂଚାୟତ ନିର୍ବାଚନକୁ ନେଇ ବି ସଂଶୟ ପ୍ରକାଶ ପାଇଥିଲା । କିନ୍ତୁ ଏବେ ପଂଚାୟତ ନିର୍ବାଚନ ପାଇଁ ସ୍ଥିତି ସ୍ପଷ୍ଟ ହେବାରେ ଲାଗିଛି । ନିର୍ଦ୍ଧାରିତ ସମୟ ମଧ୍ୟରେ ପଂଚାୟତ ନିର୍ବାଚନ ହେବବୋଲି ପଂଚାୟତିରାଜ ମନ୍ତ୍ରୀ ପ୍ରତାପ ଜେନା ସ୍ପଷ୍ଟ କରିଛନ୍ତି ।

ଗତଥର ଫେବୃଆରୀରେ ନିର୍ବାଚନ ହୋଇଥିଲା । ଡିସେମ୍ବରରେ ଏନେଇ ବିଧିବଦ୍ଧ ଭାବେ ଘୋଷଣା କରାଯାଇଥିଲା । ତେଣୁ ୨୦୨୨ ଫେବୃଆରୀରେ ପଂଚାୟତ ନିର୍ବାଚନ ହେବବୋଲି ସ୍ପଷ୍ଟ ହୋଇଛି । ମନ୍ତ୍ରୀ ଶ୍ରୀ ଜେନା କହିଛନ୍ତିଯେ, ଠିକ ସମୟରେ ପଂଚାୟତ ନିର୍ବାଚନ କରାଯିବ । ଏନେଇ ଖୁବଶୀଘ୍ର ରାଜ୍ୟ ସରକାର ନିର୍ବାଚନ କମିଶନଙ୍କୁ ଅବଗତ କରାଇବେ । ଏହାଛଡ଼ା ପୌର ନିର୍ବାଚନ ପାଇଁ ମଧ୍ୟ ରାଜ୍ୟ ସରକାର ପ୍ରସ୍ତୁତ ହେଉଛନ୍ତି । ପୌର ନିର୍ବାଚନ କରିବା ପାଇଁ ପ୍ରସ୍ତୁତି ଜାରି ରହିଛି ବୋଲି ମନ୍ତ୍ରୀ ଶ୍ରୀ ଜେନା ସୂଚନା ଦେଇଛନ୍ତି ।

ଅପରପକ୍ଷରେ ଶାସକ ବିଜୁ ଜନତା ଦଳ ମଧ୍ୟ ପଂଚାୟତ ନିର୍ବାଚନ ନେଇ ପ୍ରସ୍ତୁତି ଆରମ୍ଭ କରିଦେଇଛି । ବରିଷ୍ଠ ନେତାମାନେ ବିଭିନ୍ନ ନିର୍ବାଚନମଣ୍ଡଳୀ ଗସ୍ତ କରି ସ୍ଥିତି ପରଖିଛନ୍ତି । ସେହିପରି ପର୍ଯ୍ୟବେକ୍ଷକମାନଙ୍କୁ ନିଯୁକ୍ତ କରାଯାଇଥିବାବେଳେ ରୁଦ୍ଧଦ୍ୱାର ବୈଠକ ବି ଆରମ୍ଭ ହୋଇଯାଇଛି ।