ଦିନକୁ ଦିନ ବୃଦ୍ଧି ପାଉଥିବା ପ୍ରଦୂଷଣ ଯୋଗୁ ସୃଷ୍ଟ ସମସ୍ୟାଗୁଡ଼ିକ ଉପରେ ସଚେତନତା ସୃଷ୍ଟି ଉଦେ୍ଧଶ୍ୟରେ ପ୍ରତି ବର୍ଷ ପାଳିତ ହୁଏ ଜାତୀୟ ପ୍ରଦୂଷଣ ନିୟନ୍ତ୍ରଣ ଦିବସ । କେବଳ ଭାରତ ନୁହେଁ, ବିଶ୍ୱ ସାମ୍ନାରେ ପ୍ରଦୂଷଣ ଆଜି ଏକ ପ୍ରମୁଖ ସମସ୍ୟା ଭାବେ ଉଭା ହୋଇଛି । କଠିନ, ତରଳ, ଗ୍ୟାସୀୟ କିମ୍ବା ଶକ୍ତିର ଅନ୍ୟ ରୂପ ଯଥା ଉତ୍ତାପ, ଶବ୍ଦ ଆଦି କ୍ଷେତ୍ରରେ ପ୍ରଦୂଷଣ ବିଶ୍ୱକୁ ପୃଥିବୀକୁ ଅଣନିଶ୍ୱାସୀ କରିଛି । ଏଥିରୁ ମୁକ୍ତି ପାଇବା ଲାଗି ବଳିଷ୍ଠ ପଦକ୍ଷେପ ନେବା ଜରୁରୀ । ଔଦ୍ୟୋଗିକ ବର୍ଜ୍ୟର ନିୟନ୍ତ୍ରଣ ସହିତ ପ୍ରଦୂଷଣ ସହ ହ୍ରାସ ଏହି ଦିବସର ମୁଖ୍ୟ ଉଦେ୍ଧଶ୍ୟ ।
ପ୍ରଦୂଷଣ ନିୟନ୍ତ୍ରଣ ଓ ପ୍ରତିରୋଧ ନିମନ୍ତେ ସମଗ୍ର ବିଶ୍ୱରେ ସରକାର ଭିନ୍ନ ଭିନ୍ନ ନିୟମ ଲାଗୁ କରିଛନ୍ତି । ଏହି କ୍ରମରେ ଭାରତ ସରକାର ମଧ୍ୟ ପ୍ରଦୂଷଣ ନିୟନ୍ତ୍ରଣ ଲାଗି ଅନେକ ନିୟମ ପ୍ରଣୟନ କରିଛନ୍ତି । ଏହା ସତ୍ତ୍ୱେ ପ୍ରଦୂଷଣ ସ୍ତର ହ୍ରାସରେ ଫଳପ୍ରଦ ପରିଣାମ ମିଳିପାରିନି । ତେଣୁ ବ୍ୟକ୍ତିଗତ ସ୍ତରରେ ସକ୍ରିୟ ପଦକ୍ଷେପ ଜରିଆରେ ପ୍ରଦୂଷଣର ମୁକାବିଲା ସମ୍ଭବ ବୋଲି ଏହି ଦିବସ ବାର୍ତ୍ତା ଦିଏ ।
Powered by Froala Editor