ଗଣମାଧ୍ୟମକୁ ବାରଣ ଦ୍ବାରା କାହାର କି ଲାଭ ?

ଭୁବନେଶ୍ବର : ଶୁକ୍ରବାର ଦିନ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ରମାଦେବୀ ବିଶ୍ବବିଦ୍ୟାଳୟର ସମାବର୍ତ୍ତନ ଉତ୍ସବ କାର୍ୟ୍ୟକ୍ରମକୁ ଗଣମାଧ୍ୟମକୁ ବାରଣ ଦ୍ବାରା କାହାର କି ଲାଭ ହେବ? ଏଭଳି ପ୍ରଶ୍ନ ଏବେ ସମସ୍ତଙ୍କ ମନରେ ଉଙ୍କି ମାରୁଛି । ଅଜବ ଏ ନିଷ୍ପତ୍ତି । ସରକାରୀ ଯୋଜନା ବା ଯେ କୌଣସି ସରକାରୀ କାର୍ଯ୍ୟକ୍ରମର ପ୍ରଚାର ପ୍ରଚାର ପାଇଁ ଗଣାମଧ୍ୟମକୁ ଖୋଜା ପଡ଼ୁଥିବାବେଳେ ରାଷ୍ଟ୍ରପତିଙ୍କ କାର୍ଯ୍ୟକ୍ରମରେ ଗଣମାଧ୍ୟମକୁ ବାରଣ ପଛର କାରଣ କ’ଣ ହୋଇପାରେ ତାକୁ ନେଇ ବୁଦ୍ଧିଜୀବୀ ମହଲରେ ଆଲୋଡ଼ନ ସୃଷ୍ଟି କରିଛି ।

ନିର୍ଦ୍ଦିଷ୍ଟ ଭାବେ କେଉଁ କାରଣ ପାଇଁ ଗଣମାଧ୍ୟମ ପ୍ରତିନିଧିଙ୍କୁ କାର୍ୟ୍ୟକ୍ରମସ୍ଥଳକୁ ମନା କରାଯାଉଛି, ତାହାର ଉତ୍ତର କାହା ପାଖରେ ନାହିଁ।ଉପରୁ ନିର୍ଦ୍ଦେଶ ଆସିଥିବାରୁ ଗଣମାଧ୍ୟମକୁ ଅନୁମତି ଦିଆଯାଇ ନ ଥିବା କହି ରମାଦେବୀ ବିଶ୍ବବିଦ୍ୟାଳୟ କର୍ତ୍ତୃପକ୍ଷ ନିଜ ମୁଣ୍ଡରୁ ଦୋଷ ‌ଖସାଇ ଦେଇଛନ୍ତି। ସେପଟେ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ରାଷ୍ଟ୍ରପତିଙ୍କ କାର୍ୟ୍ୟକ୍ରମର ସିଧାପ୍ରସାରଣ ଲାଗି ଫିଡ୍‌ ଦିଆଯିବ ବୋଲି କୁହାଯାଇଛି। ତେବେ ସାମ୍ବାଦିକଙ୍କୁ ଉତ୍ସବ ସ୍ଥଳକୁ କାହିଁକି ଅନୁମତି ଦିଆଯାଉ ନାହିଁ ସେନେଇ ରାଜ୍ୟ ସରକାରଙ୍କ କୌଣସି ଅଧିକାରୀ ଓ ପୁଲିସ୍‌ ଅଧିକାରୀ ମୁହଁ ଖୋଲୁନାହାନ୍ତି। ଉପରୁ ନିର୍ଦ୍ଦେଶ ଆସିଛି ଯାହା କୁହାଯାଉଛି, ସେହି ‘ଉପର’ କିଏ ତାହା ଏବେ ଚର୍ଚ୍ଚାର ବିଷୟ। ରାଷ୍ଟ୍ରପତିଙ୍କ ଗସ୍ତ ସମୟରେ ସାମ୍ବାଦିକଙ୍କୁ ଅନୁମତି ନ ଦେବାକୁ ଗତ ୬ ତାରିଖରେ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ନିଷ୍ପତ୍ତି ନିଆଯାଇଥିବା କୁହାଯାଉଛି।

ପ୍ରଶ୍ନ ଉଠୁଛି, ଦେଶର ପ୍ରଥମ ନାଗରିକଙ୍କ ସଭାରେ ଗଣମାଧ୍ୟମ ପ୍ରତିନିଧିମାନେ ଖବର ସଂଗ୍ରହ କରିପାରିବେନି ବୋଲି ଏକ ଉଦ୍ଭଟ ଚିନ୍ତାଧାରା କାହା ମୁଣ୍ଡକୁ ଆସିଲା? ଗଣମାଧ୍ୟମ ନ ଯିବା ଦ୍ବାରା କାହାର କି ଲାଭ ହେବ? ଏପରି ନିଷ୍ପତ୍ତିକୁ ଆଜି ସାମାଜିକ ଗଣମାଧ୍ୟମ‌ରେ ତୀବ୍ର ସମାଲୋଚନା କରାଯାଇଛି। ଗଣମାଧ୍ୟମର କଣ୍ଠରୋଧ କରି ସରକାର କି ବାର୍ତ୍ତା ଦେବାକୁ ଚାହୁଛନ୍ତି ବୋଲି ସାଧାରଣ ଜନତା ପ୍ରଶ୍ନ ଉଠାଇଛନ୍ତି।