ବର୍ତ୍ତମାନ ଭାରତର ପ୍ରତ୍ୟେକ ପ୍ରାନ୍ତରେ ଶୀତ ଲହରି ଅନୁଭୂତ ହେଉଛି । ଏଭଳି ପାଗରେ ଥଣ୍ଡା, ସର୍ଦ୍ଧି, ଜ୍ୱର, ଆଣ୍ଠୁଗଣ୍ଟି ସମସ୍ୟା ହେବା ଏକ ସ୍ୱାଭାବିକ କଥା । ବିଶେଷଜ୍ଞଙ୍କ ମତରେ ଶରୀରକୁ ଭିତରୁ ଗରମ ରଖିବା ନିମନ୍ତେ ଆପଣଙ୍କୁ ଖାଦ୍ୟ ପାନୀୟ ବାବଦରେ ସତର୍କ ହେବା ସହ ଏକ ଡାଏଟ୍ ତାଲିକା ପ୍ରସ୍ତୁତ କରି ସେଇ ଅନୁସାରେ ଖାଇବା ଉଚିତ । ଯୁବ ପିଢ଼ି ଓ ବୟସ୍କ ବର୍ଗ ଦ୍ୱିପହର ଭୋଜନରେ ବ୍ରାଉନ ରାଇସ ଖାଇବା ହିତକାରୀ । ଶୀତଋତୁରେ ଦୈନିକ ସକାଳୁ ଖାଲିପେଟରେ ରସୁଣ ୨ କୋଳା ଚୋବାଇ ଖାଆନ୍ତୁ । ଥଣ୍ଡା ସମସ୍ୟାରୁ ଆପଣ ରକ୍ଷା ପାଇପାରିବେ । ଭୋଜନ ସମୟରେ ଆପଣ କଞ୍ଚା ପିଆଜ ଖାଇବାର ଅଭ୍ୟାସ କରନ୍ତୁ । ଖାଦ୍ୟ ବିଶେଷଜ୍ଙ୍କ ମତରେ ରସୁଣ, ପିଆଜରେ ଥିବା ଏଲିସିନ ତତ୍ତ୍ୱ କାରଣରୁ ଆମ ଶରୀରରେ ରକ୍ତ ସଞ୍ଚାର ଭଲ ଭାବେ ହେଉଥିବା ସହ ଶରୀର ଗରମ ମଧ୍ୟ ରହେ । ଥଣ୍ଡାରୁ ରକ୍ଷା ପାଇବା ନିମନ୍ତେ ଡାଏଟରେ ଅଖରୋଟ, ବାଦାମ ଭଜା, ରାଶି ଇତ୍ୟାଦି ସାମିଲ କଲେ ଲାଭ ପାଇପାରିବେ । ସକାଳବେଳା ଚା’ପିଇବାର ଅଭ୍ୟାସ ଥିଲେ, ସେଥିରେ ୧ ଚାମଚ ଅଦାରସ ମିଶାଇ ପିଇବାର ଅଭ୍ୟାସ କରନ୍ତୁ । ଏଇ ଉପାୟରେ ଆପଣଙ୍କ ଶରୀରକୁ ଶକ୍ତି ମିଳିବ । ଦିଲ୍ଲୀର ନାମୀ ଖାଦ୍ୟ ବିଶେଷଜ୍ଞ କବିତା ଦେବଗନ୍ଙ୍କ ମତରେ ବିଭିନ୍ନ ପ୍ରକାର ଶାଗ ଖାଇବା ମଧ୍ୟ ଏଇ ଦିନେ ଭଲ । ଶରୀରକୁ ଭିତରୁ ଉଷ୍ଣତା ମିଳୁଥିବାର ତଥ୍ୟରୁ ଜଣାପଡ଼ିଛି । ଚା’, କଫି ପାନୀୟରେ ଚିନି ପରିବର୍ତ୍ତେ ମହୁର ଉପଯୋଗ କରିପାରିବେ । ମହୁର ଔଷଧୀୟ ଗୁଣ ଆମ ସ୍ୱାସ୍ଥ୍ୟକୁ ଭଲ ରଖିବାରେ ସହାୟକ ହୋଇଥାଏ । ରାତି ବେଳା ଗରିଷ୍ଠ ଭୋଜନ କରିବା ଅନୁଚିତ । ଏଣୁ ସୁପ ପିଅନ୍ତୁ, ଏଥିରେ ଅଦା, ରସୁଣ, ପିଆଜ ବ୍ୟବହାର କରନ୍ତୁ । ଏସବୁ ପରିବାରେ ଥିବା ଆଣ୍ଟିଅକ୍ସିଡାଣ୍ଟ ଶରୀରର ରୋଗ ପ୍ରତିରୋଧକ ଶକ୍ତି ବଢ଼ାଇବାରେ ସହାୟକ ହୋଇଥାଏ । ରାତିରେ ଉଷୁମ ଖିରା ୧ ଗିଲାସରେ ଚିମୁଟାଏ ହଳଦୀ ମିଶାଇ ପିଇବା ମଧ୍ୟ ଏଇଦିନେ ଖୁବ୍ ହିତକାରୀ ।