ଅଷ୍ଟ୍ରେଲିଆର ମୋନାସ ୟୁନିଭର୍ସିଟିର ଗବେଷକମାନେ ଦାବି କରିଛନ୍ତି ଯେ ସେମାନେ ଉକୁଣୀମରା ଔଷଧରେ କରୋନା ଭାଇରସ୍କୁ ନିପାତ କରିବାରେ ସଫଳ ହୋଇଛନ୍ତି । ସେମାନଙ୍କ ଅନୁସାରେ, ଉକୁଣୀ ମାରିବା ପାଇଁ ବ୍ୟବହାର କରାଯାଉଥିବା ଆଇଭରମେକଟିନର ଉପଯୋଗ କରି ସେମାନେ ଲାବ୍ ଭିତରେ କରୋନା ଭାଇରସକୁ ନିପାତ କରିଛନ୍ତି । ଏହି ଔଷଧର ମାତ୍ର ଗୋଟିଏ ଡୋଜ୍ ପ୍ରୟୋଗ କରାଯାଇଥିଲା ଏବଂ ଏହାର ୪୮ ଘଣ୍ଟା ଭିତରେ ସବୁ କରୋନା ଭାଇରସ କୋଷିକା ନଷ୍ଟ ହୋଇଯାଇଥିଲା । ଏହାର ପ୍ରୟୋଗ ଯୋଗୁଁ କରୋନା ଭାଇରସ୍ କୋଷିକାରୁ ଆର୍ଏନ୍ଏ ସମ୍ପୂର୍ଣ୍ଣ ଭାବେ ବାହାରିଯାଉଥିଲା । ଏମିତିକି ଏହି ଔଷଧ ଉପଯୋଗ କରିବାର ୨୪ ଘଣ୍ଟା ଭିତରେ ବି କରୋନା ଭାଇରସ କୋଷିକା ସଂଖ୍ୟାରେ ଯଥେଷ୍ଟ ହ୍ରାସ ପରିଲକ୍ଷିତ ହୋଇଥିଲା । ଏବେ ମଣିଷ ଉପରେ ଏହାର ପ୍ରୟୋଗ କରିବା ପାଇଁ ଯୋଜନା କରାଯାଇଛି । ଏଥିପାଇଁ ଆଉ ମାସେ ସମୟ ଲାଗିବ । ଗବେଷକମାନେ ସୂଚନା ଦେଇଛନ୍ତି ଯେ, ପୂର୍ବରୁ ଜିକା ଭାଇରସ, ଫ୍ଲୁ ଏବଂ ଏଚଆଇଭିର ନିରାକରଣ ପାଇଁ ବି ଏହି ଉକୁଣୀମରା ଔଷଧକୁ ବ୍ୟବହାର କରାଯାଇଛି ।