ମୃତ୍ୟୁ ପୂର୍ବର ବୟାନ ସବୁବେଳେ ଦୋଷ ସାବ୍ୟସ୍ତର ଆଧାର ହୋଇ ନ ପାରେ: ସୁପ୍ରିମକୋର୍ଟ
admin
4963
ନୂଆଦିଲ୍ଲୀ: ମୃତ୍ୟୁ ପୂର୍ବର ବୟାନ ସବୁବେଳେ ଦୋଷ ସାବ୍ୟସ୍ତର ଆଧାର ହୋଇ ନ ପାରେ। ମୃତ୍ୟୁ ପୂର୍ବରୁ ପୀଡ଼ିତ ଦେଇଥିବା ମନ୍ତବ୍ୟ ଉପରେ ସନ୍ଦେହ ସୃଷ୍ଟି ହେଲେ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରାଯାଇପାରିବ ନାହିଁ। ୨୦୧୪ର ତିନି ଜଣଙ୍କ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇ ମୃତ୍ୟୁଦଣ୍ଡ ପାଇଥିବା ଉତ୍ତରପ୍ରଦେଶର ଇର୍ଫାନଙ୍କ ମାମଲାର ଶୁଣାଣି କରି ସୁପ୍ରିମକୋର୍ଟ ଏହି ମନ୍ତବ୍ୟ ଦେଇଛନ୍ତି। କୋର୍ଟ କହିଛନ୍ତି ଯେ ମୃତ୍ୟୁପୂର୍ବର ବୟାନକୁ କୋର୍ଟ ଅତ୍ୟନ୍ତ ସାବଧାନତାର ସହ ଶୁଣିବା ଉଚିତ୍। କାରଣ କୋର୍ଟ ଏହା ମାଧ୍ୟମରେ ସତ୍ୟର ସନ୍ଧାନ କରିଥାନ୍ତି। ଏହି ସମୟରେ ଆଇନଗତ ଦିଗ ପ୍ରତି ମଧ୍ୟ ଦୃଷ୍ଟି ଦେବା ଉଚିତ୍।
ମୃତ୍ୟୁଶଯ୍ୟାରେ ପଡ଼ିଥିବା ଲୋକ ମିଛ କହୁ ନାହିଁ ବୋଲି ମଧ୍ୟ ସ୍ପଷ୍ଟ କରିବା ଆବଶ୍ୟକ। ଏହି ବୟାନ ଅତ୍ୟନ୍ତ ବିଶ୍ବସନୀୟ ଏବଂ ଭରସାଯୋଗ୍ୟ ହେବା ଉଚିତ। ଯଦି ଏହା ଉପରେ କୌଣସି ସନ୍ଦେହ ସୃଷ୍ଟି ହୁଏ କିମ୍ବା ରେକର୍ଡରେ ଥିବା ପ୍ରମାଣରୁ ମୃତ୍ୟୁ ପୂର୍ବର ବୟାନ ମିଛ ବୋଲି ପ୍ରତୀତ ହୁଏ ତେବେ ଏହା ଆଧାରରେ କାହାକୁ ଦଣ୍ଡ ଦେଇ ହେବ ନାହିଁ। ଏ କ୍ଷେତ୍ରରେ ମୃତ୍ୟୁ ପୂର୍ବର ବୟାନକୁ କେବଳ ଏକ ପ୍ରମାଣ ଭାବେ ଧରାଯିବ। ହତ୍ୟା ଶିକାର ପୀଡ଼ିତର ମାନସିକ ସ୍ଥିତି ଠିକ୍ ଥିଲା କି ନାହିଁ ପ୍ରଥମେ ଦେଖିବାକୁ ପଡ଼ିବ। ଯଦି ମାନସିକ ସ୍ଥିତି ଭଲ ଥାଏ ତେବେ ମୃତ୍ୟୁ ପୂର୍ବର ବୟାନକୁ ପ୍ରମାଣ ଭାବେ ଗ୍ରହଣ କରାଯିବ ବୋଲି ଜଷ୍ଟିସ ବିଆର ଗଭାଇ, ଜଷ୍ଟିସ ଜେବି ପାରଦିୱାଲା ଏବଂ ଜଷ୍ଟିସ ପ୍ରଶାନ୍ତ କୁମାର ମିଶ୍ରଙ୍କ ଖଣ୍ଡପୀଠ କହିଛନ୍ତି। ଏହା ସହିତ ନିଜ ପୁଅ ଏବଂ ୨ ଭାଇଙ୍କ ହତ୍ୟା ଅଭିଯୁକ୍ତ ଇର୍ଫାନକୁ ମୁକ୍ତ କରିବା ଲାଗି ନିର୍ଦ୍ଦେଶ ଦେଇଛନ୍ତି। ୨୦୧୮ରେ ନିମ୍ନ ଅଦଲାତ ଦେଇଥିବା ମୃତ୍ୟୁଦଣ୍ଡକୁ ଆହ୍ଲାବାଦ ହାଇକୋର୍ଟ କାଏମ ରଖିଥିଲେ।
