ଦାଦାବଟି ମାଗିବା ଅଭିଯୋଗରେ କୁଖ୍ୟାତ ମୁନ୍ନା ଲାଡେନ ଗିରଫ
ଦାଦାବଟି ମାଗିବା ଅଭିଯୋଗରେ କୁଖ୍ୟାତ ମୁନ୍ନା ଲାଡେନ ଗିରଫ
admin
3256
କଟକ : ଜଣେ ବ୍ୟବସାୟୀଙ୍କୁ ଦାଦାବଟି ମାଗିବା ଅଭିଯୋଗରେ କୁଖ୍ୟାତ ମୁନ୍ନା ଲାଡେନକୁ ଗିରଫ କରିଛି କଟକ ପୋଲିସ । ୧୨ ତାରିଖ ସନ୍ଧ୍ୟାରେ ଦରଘା ବଜାର ଥାନା ପକ୍ଷରୁ କରାଯାଇଥିବା ଏକ ରେଡରେ ପୋଲିସ ମୁନ୍ନାକୁ ଗିରଫ କରିଛି । ରେଭେନ୍ସା କଲେଜର ଲେଡିଜ ହଷ୍ଟେଲ ସାମ୍ନାରେ ଜଣେ ବ୍ୟବସାୟୀଙ୍କୁ ୫ ଲକ୍ଷର ଦାଦାବଟି ମାଗୁଥିବା ବେଳେ ପୋଲିସ ତାକୁ କାବୁ କରି ନେଇଥିଲା । ବନ୍ଧୁକ ମୁନରେ ଦାଦାବଟି ଆଦାୟ କରିବାକୁ ଚେଷ୍ଟା କରୁଥିବା ବେଳେ ଏସଆଇ ଜଗନ୍ନାଥ ସାହୁ ମୁନ୍ନାକୁ ଗିରଫ କରିଥିଲେ । ମୁନ୍ନା ନିକଟରୁ ପୋଲିସ ଏକ ୯ ଏମଏମ ପିସ୍ତଲ ସହିତ ୬ଟି ଗୁଳି ଏବଂ ଗୋଟିଏ ମାଗଜିନ ଜବତ କରିଛି । ଏହା ବ୍ୟତିତ ମୁନ୍ନା ନିକଟରୁ ପୋଲିସ ଏକ ଓପ୍ପୋ ମୋବାଇଲ ଫୋନ ଜବତ କରିଛି । ପୋଲିସ ପକ୍ଷରୁ କେସ ନମ୍ବର ୧୨୦ ଅନୁସାରେ ଆଇପିସିର ଦଫା ୩୪୧, ୩୨୩, ୨୯୪, ୩୫୩, ୩୮୭, ୫୦୬, ୩୪ ଏବଂ ଅସ୍ତ୍ରଶସ୍ତ୍ର ଆଇନର ୨୫/୨୭ ଆଧାରରେ ମାମଲା ରୁଜୁ କରାଯାଇ କୋର୍ଟ ଚାଲାଣ କରାଯାଇଛି ।
ଆଇଆଇସି ପ୍ରଦୀପ କୁମାର ଜେନା ଏହି ମାମଲାର ତଦନ୍ତ କରୁଛନ୍ତି । ମାମଲାର ତଦନ୍ତ ସମୟରେ ମୁନ୍ନା ଜଣେ ପେଶାଦାର ଅପରାଧୀ ବୋଲି ଜଣାପଡିଛି । ଦୁର୍ଦ୍ଧାନ୍ତ ଅପରାଧୀ ଟିଟୋର ଡାହାଣ ହାତ ରହିଥିବା ମୁନ୍ନା ବିରୋଧରେ ବିଭିନ୍ନ ଥାନାରେ ପ୍ରାୟ ୧୨ଟି ମାମଲା ରହିଛି । ଟିଟୋର ଗିରଫଦାରୀ ପରେ ମୁନ୍ନା କିଛି ଦିନ ଅଣ୍ଡରଗ୍ରାଉଣ୍ଡ ରହିଥିଲା । ମାତ୍ର ପୁଣିଥରେ ଦାଦାବଟି ମାଗୁଥିବା ବେଳେ ବିଶ୍ୱସ୍ତ ସୂତ୍ରରୁ ଖବର ପାଇ ଗିରଫ କରିବାରେ ସକ୍ଷମ ହୋଇଥିଲା ପୋଲିସ ।
