ଯାହା କହିଛି ଠିକ କହିଛି, କ୍ଷମା ମାଗିବାର ପ୍ରଶ୍ନ ଉଠୁନି: ନରସିଂହ
ଯାହା କହିଛି ଠିକ କହିଛି, କ୍ଷମା ମାଗିବାର ପ୍ରଶ୍ନ ଉଠୁନି: ନରସିଂହ
admin
1872
ଭୁବନେଶ୍ୱର: ଯାହା କହିଛି ଠିକ କହିଛି । କ୍ଷମା ମାଗିବାର ପ୍ରଶ୍ନ ଉଠୁନାହିଁ । ଶଙ୍କରାଚାର୍ଯ୍ୟଙ୍କ ସମ୍ପର୍କରେ ବିଜେପି ମୁଖପାତ୍ର ଗୋଲକ ମହାପାତ୍ରଙ୍କ ସାମ୍ବାଦିକ ସମ୍ମିଳନୀରେ ପରେ ଏଭଳି ରୋକଠୋକ ଜବାବ ଦେଇଛନ୍ତି ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର ।
ଶ୍ରୀ ମିଶ୍ର କହିଛନ୍ତି ଯେ, ମୁଁ ଯାହା କହିଛି କିଛି ମିଛ କହିନାହିଁ । ଏକଦମ ଠିକ କହିଛି । ଯେଉଁଥି ପାଇଁ ମୁଁ କ୍ଷମା ମାଗିବି ନାହିଁ । ବିଜେପି ବନ୍ଧୁମାନେ ଧର୍ମ ନାମରେ ରାଜନୀତି କରିବାରେ ଓସ୍ତାଦ । ଇଏ ତାଙ୍କର ଆଉ ଗୋଟିଏ ରାଜନୀତି ବୋଲି ଶ୍ରୀ ମିଶ୍ର କହିଛନ୍ତି । ଏହାଛଡ଼ା ଏହା ମୋର ମତ । ଦଳର ନୁହେଁ ବୋଲି ସେ କହିଛନ୍ତି ।
ପ୍ରକାଶ ଯେ, ଶଙ୍କରାଚାର୍ଯ୍ୟଙ୍କ ସମ୍ପର୍କରେ ବରିଷ୍ଠ ବିଧାୟକ ନରସିଂହ ମିଶ୍ରଙ୍କ ମନ୍ତବ୍ୟକୁ ବିଜେପି ପକ୍ଷରୁ ବିରୋଧ କରାଯାଇଥିଲା । ଏନେଇ ଖୋଦ ନରସିଂହଙ୍କ ସମେତ କଂଗ୍ରେସ ଦଳ କ୍ଷମା ମାଗନ୍ତୁ ବୋଲି ବିଜେପି ପକ୍ଷରୁ ଦାବି କରାଯାଇଥିଲା । ଏନେଇ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ବିଜେପି ମୁଖପାତ୍ର ଗୋଲକ ମହାପାତ୍ର କହଥିଲେ ଯେ, ଶଙ୍କରାଚାର୍ଯ୍ୟଙ୍କ ସାଙ୍ଗିଆ, ଶିକ୍ଷା ଓ ଜାତିର ପ୍ରମାଣ ମାଗିବା ହୀନମଣ୍ୟତା । ନରସିଂହ ମିଶ୍ର ଜାଣିଶୁଣି ଜଗନ୍ନାଥପ୍ରେମୀଙ୍କୁ ଆଘାତ ଦେଇଛନ୍ତି । ଜଗଦଗୁରୁଙ୍କ ପ୍ରତି ଅପମାନଜନକ ଶବ୍ଦ ଜାଣିଶୁଣି ପ୍ରୟୋଗ କରିଛନ୍ତି । ଜଗନ୍ନାଥପ୍ରେମୀଙ୍କ ଆଶା, ବିଶ୍ୱାସ ଓ ଭାବାବେଗକୁ ନରସିଂହ ମିଶ୍ର ଆଘାତ ଦେଇଥିବା ବିଜେପି ମୁଖପାତ୍ର ଗୋଲକ ମହାପାତ୍ର କହିବା ସହ ଶ୍ରୀ ମିଶ୍ର ଏନେଇ କ୍ଷମା ମାଗନ୍ତୁ ବୋଲି ଦାବି କରିଥିଲେ ।
