ଆଉ ନାହାନ୍ତି ଲୋକପ୍ରିୟ କନ୍ନଡ ଚଳଚ୍ଚିତ୍ର ନିର୍ଦ୍ଦେଶକ ବିଜୟ ରେଡ୍ଡି

ବେଙ୍ଗାଲୁରୁ : ୨୦୨୦ ମସିହା ଚଳଚ୍ଚିତ୍ର ଜଗତ, ରାଜନୀତି ତଥା ଦେଶ ପାଇଁ ଅପୂରଣୀୟ କ୍ଷତି ସୃଷ୍ଟି କରିଛି । ବହୁ ବଡ ବଡ ନେତା, ଅଭିନେତା ଆଦି ଆମକୁ ଛାଡି ଚାଲିଯାଇଛନ୍ତି । ପ୍ରସିଦ୍ଧ କନ୍ନଡ ଚଳଚ୍ଚିତ୍ର ନିର୍ଦ୍ଦେଶକ ବିଜୟ ରେଡ୍ଡିଙ୍କ ଦେହାନ୍ତ ହୋଇଛି । ମୃତ୍ୟୁ ବେଳକୁ ତାଙ୍କୁ ୮୪ ବର୍ଷ ବୟସ ହୋଇଥିଲା । ୧୯୭୦ ମସିହାରେ ‘ରଙ୍ଗମହଲ୍‌ ରହସ୍ୟ’ ଫିଲ୍ମଟିରେ ନିର୍ଦ୍ଦେଶକ ଭାବେ ଡେବ୍ୟୁ କରିଥିଲେ । ୧୯୭୩ ମସିହାରେ ତାଙ୍କ ନିର୍ଦ୍ଦେଶିତ ଫିଲ୍ମ ‘ଗନ୍ଧାରା ଗୁଡି’ ତାଙ୍କ କ୍ୟାରିଅରରେ ଟର୍ଣ୍ଣିଂ ପଏଣ୍ଟ ଆଣିଥିଲା । ତାଙ୍କ ନିର୍ଦ୍ଦେଶିତ ଅନ୍ୟତମ ଫିଲ୍ମ ‘ମୌର୍ୟ୍ୟା’ କନ୍ନଡ କ୍ଲାସିକ୍‌ ସିନେମାର ଏକ ଉଲ୍ଲେଖନୀୟ ଫିଲ୍ମ । ୧୯୩୬ ମସିହାରେ ଏକ କୃଷକ ପରିବାରରେ ଜନ୍ମଗ୍ରହଣ କରିଥିଲେ ବିଜୟ ରେଡ୍ଡି । ୧୯୫୩ ମସିହାରେ ବି, ଭିଟ୍ଟଲାଚାର୍ୟ୍ୟଙ୍କ ନିର୍ଦ୍ଦେଶିତ କନ୍ନଡ ଫିଲ୍ମ ‘ମାନେ ତୁମ୍ବୁଡା ହେନୁ’ରେ ସହାୟକ ସମ୍ପାଦକ ଭାବେ କାର୍ୟ୍ୟ କରିଥିଲେ। ବିଜୟଙ୍କ ନିର୍ଦ୍ଦେଶିତ ପ୍ରଥମ ଫିଲ୍ମ ‘ରଙ୍ଗମହଲ୍‌ ରହସ୍ୟ’ ଯଦିଓ ତାଙ୍କୁ ସଫଳତା ଦେଇପାରିନଥିଲା କିନ୍ତୁ ତାଙ୍କର ଦ୍ବିତୀୟ ନିର୍ଦ୍ଦେଶିତ ଫିଲ୍ମ ‘ମୋଡଲା ରାଠୀ’ ସଫଳତା ପାଇଥିଲା । ତେବେ ତାଙ୍କ ନିର୍ଦ୍ଦେଶିତ ’ଗନ୍ଧାରା ଗୁଡ୍ଡି’ ବହୁଳ ସଫଳତା ପାଇଥିଲା । ଏହି ଫିଲ୍ମଟି ରାଜକୁମାରଙ୍କ ୧୫୦ତମ ଫିଲ୍ମ । ଏହି ଚଳଚ୍ଚିତ୍ରଟି କନ୍ନଡ ଚଳଚ୍ଚିତ୍ର ଇଣ୍ଡଷ୍ଟ୍ରିରେ ଏକ ମାଇଲଖୁଣ୍ଟ ଭାବେ ପ୍ରମାଣିତ ହୋଇଥିଲା। ବିଜୟ କେବଳ କନ୍ନଡ ଭାଷାର ଫିଲ୍ମ ନୁହେଁ, ହିନ୍ଦୀ, ତେଲୁଗୁ, ତାମିଲ ଓ ମଲାୟଲମ୍ ଫିଲ୍ମକୁ ନିର୍ଦ୍ଦେଶନା ଦେଇଛନ୍ତି । ତେଲୁଗୁ ଫିଲ୍ମ ‘ଶ୍ରୀମଥୀ’ରେ ମଧ୍ୟ ବିଜୟ ନିର୍ଦ୍ଦେଶନା ଦେଇଥିଲେ । ୧୯୭୭ ମସିହାରେ ବିଜୟଙ୍କ ନିର୍ଦ୍ଦେଶିତ ‘ସନାଡି ଆପନ୍ନା’କୁ ଜାତୀୟ ମାନ୍ୟତା ମିଳିଥିଲା । ଏହି ଫିଲ୍ମରେ ମୁଖ୍ୟ ଅଭିନେତା ଭାବେ ଶାହନାଇ ବାଦକ ବିସମିଲା ଖାନ୍‌ଙ୍କୁ ଦେଖାଯାଇଥିଲା । ସେହିପରି ଅନୀଲ୍‌ କପୁର୍‌ଙ୍କ ଅଭିନୀତ ଫିଲ୍ମ ‘ପ୍ୟାର କିୟା ହୈ ପ୍ୟାର୍‌ କରେଙ୍ଗେ’ର ମଧ୍ୟ ନିର୍ଦ୍ଦେଶନା ଦେଇଥିଲେ ବିଜୟ ରେଡ୍ଡି । ୧୯୭୦ରୁ ୨୦୦୩ ମସିହା ପର୍ୟ୍ୟନ୍ତ ଲଗାତାର ଭାବରେ ସେ ଫିଲ୍ମରେ ନିର୍ଦ୍ଦେଶନା ଦେଇ ଆସୁଥିଲେ । ନିଜ ଜୀବନକାଳ ମଧ୍ୟରେ ପ୍ରାୟ ୫୦ ଫିଲ୍ମରେ ନିର୍ଦ୍ଦେଶନା ଦେଇଛନ୍ତି । କିଛି ଫିଲ୍ମରେ ସେ ଚିତ୍ରନାଟ୍ୟ ଦାୟିତ୍ବ ମଧ୍ୟ ସମ୍ଭାଳିଛନ୍ତି । ବିଜୟ ରେଡ୍ଡିଙ୍କ ଦେହାନ୍ତରେ କନ୍ନଡ ଚଳଚ୍ଚିତ୍ର ଇଣ୍ଡଷ୍ଟ୍ରିର ତାରକାଙ୍କଠାରୁ ଆରମ୍ଭ କରି ସାମାଜିକ ଗଣମାଧ୍ୟମରେ ପ୍ରଶଂସକଙ୍କ ପର୍ୟ୍ୟନ୍ତ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛନ୍ତି।