ବିଜୁ ବାବୁଙ୍କ ଉପରେ ଆଉ ଏକ ପୁସ୍ତକ," ଦି ଆଡଭେଞ୍ଚର୍ସ ଅଫ ଦି ଡେୟାର ଡେଭିଲ ଡେମୋକ୍ରାଟ”
ବିଜୁ ବାବୁଙ୍କ ଉପରେ ଆଉ ଏକ ପୁସ୍ତକ," ଦି ଆଡଭେଞ୍ଚର୍ସ ଅଫ ଦି ଡେୟାର ଡେଭିଲ ଡେମୋକ୍ରାଟ”
admin
6022
ଭୁବନେଶ୍ୱର : ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଉପରେ ଆଉ ଏକ ଇଂରାଜୀ ପୁସ୍ତକ ରଚନା ହୋଇଛି । ଏହାର ନାମ ରହିଛି " ଦି ଆଡଭେଞ୍ଚର୍ସ ଅଫ ଦି ଡେୟାର ଡେଭିଲ ଡେମୋକ୍ରାଟ' । ଆସନ୍ତା ୬ ତାରିଖରେ ହୋଟେଲ ସ୍ୱସ୍ତି ପ୍ରିମିୟମରେ ଏହାର ଉନ୍ମୋଚନ ହେବାର କାର୍ଯ୍ୟକ୍ରମ ରହିଛି । କଳିଙ୍ଗ ଫାଉଣ୍ଡେସନ ଟ୍ରଷ୍ଟ ପକ୍ଷରୁ ପ୍ରସ୍ତୁତ ଏହି ପୁସ୍ତକଟିକୁ ନୂଆଦିଲ୍ଲୀର "ଦି କ୍ରିଏଟିଭ ୱେରହାଉସ' ପ୍ରକାଶ କରିଛି ।
ପୁସ୍ତକର ଉନ୍ମୋଚନ ସଭାକୁ ସଫଳ କରିବା ପାଇଁ ଯଦିଓ ବିଜେଡିର ପ୍ରମୁଖ ନେତାମାନେ ଦାୟିତ୍ୱ ନେଇଛନ୍ତି, ତେବେ ସଭାର କୌଣସି ସ୍ଥାନରେ ବିଜେଡିର ନାମ ବ୍ୟବହାର କରାଯାଉ ନାହିଁ । ଯଥାସମ୍ଭବ ରାଜନୀତିରୁ ଊର୍ଦ୍ଧ୍ୱରେ ରଖିବାକୁ ଚେଷ୍ଟା ଚାଲିଛି । ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁଖ୍ୟ ଅତିଥି ଭାବେ ଯୋଗ ଦେବେ । ସମ୍ମାନିତ ଅତିଥି ଭାବେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଓ ବରିଷ୍ଠ ବିଜେପି ନେତା କନକ ବର୍ଦ୍ଧନ ସିଂହଦେଓ ଯୋଗ ଦେବେ । ବିଭିନ୍ନ କ୍ଷେତ୍ରରେ ସଫଳ ବ୍ୟକ୍ତିମାନଙ୍କୁ ଏହି ଉତ୍ସବକୁ ନିମନ୍ତ୍ରଣ କରାଯିବ । ଏଥି ପାଇଁ ନେତାମାନଙ୍କ ମଧ୍ୟରେ ଦାୟିତ୍ୱ ବଣ୍ଟନ କରାଯାଇଛି ।
୨୦୧୭ ମସିହାରେ ବିଜୁ ବାବୁଙ୍କ ଉପରେ ଏକ ପୁସ୍ତକ "ଦି ଟଲ ମ୍ୟାନ' ଉନ୍ମୋଚିତ ହୋଇଥିଲା । ଉତ୍କଳ ମଣ୍ଡପରେ ଆୟୋଜିତ ଏହି କାର୍ଯ୍ୟକ୍ରମରେ ପ୍ରମୁଖ ରାଜନୈତିକ ଦଳର ଜାତୀୟସ୍ତରର ନେତାମାନେ ଯୋଗ ଦେଇଥିଲେ । ଏଥର ଜାତୀୟ ନେତାମାନଙ୍କ ଡକାଯାଉ ନ ଥିଲେ ବି ଉତ୍ସବକୁ ବଡ଼ ଧରଣର ଆୟୋଜନ କରାଯାଉଛି । ବହୁ ବିଶିଷ୍ଟ ବ୍ୟକ୍ତିଙ୍କ ଉପସ୍ଥିତିରେ ବହିଟି ଉନ୍ମୋଚିତ ହେବ ବୋଲି ଜଣାପଡ଼ିଛି ।
