ଗାଁ ଦାଣ୍ଡରେ ଶିଶୁକୁ କଚାଡ଼ି ମାରିଲା ଯୁବକ

Nov 30, 2020 - 09:10 Updated: Nov 30, 2020 - 09:10

4562

ଆମ୍ବାଭୋନ: ଗାଁ ଦାଣ୍ଡରେ ଛୋଟ ପିଲାମାନେ ଖେଳୁଥିଲେ । ଅଚାନକ ଜଣେ ଯୁବକ ସେଠାରେ ପହଞ୍ଚି ଜଣେ ଶିଶୁକୁ ଶୂନ୍ୟକୁ ଉଠାଇ ନେଇ ରାସ୍ତା ଉପରେ କଚାଡ଼ି ଦେଲା । ଶିଶୁଟି ଗୋଟିଏ ଦିନ ମୃତୁ୍ୟ ସହ ସଂଗ୍ରାମ କରିବା ପରେ ଶେଷରେ ଆଖି ବୁଜିଲା । ଏଭଳି ଏକ ଅଭାବନୀୟ ଓ ଲୋମହର୍ଷଣକାରୀ ଘଟଣା ଘଟିଛି ବରଗଡ଼ ଜିଲ୍ଲା ଅମ୍ବାଭୋନା ବ୍ଲକ ବେନିଅାଁପାଲି ଗ୍ରାମର ଅଲେଖପୁର ପଡ଼ାରେ । ଏହି ଘଟଣା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ଗ୍ରାମବାସୀଙ୍କ ସୂଚନା ଅନୁସାରେ ଶନିବାର ଅପରାହ୍ନରେ ଶ୍ରଦ୍ଧାକର ଭୋଇଙ୍କ କୁନି ପୁଅ ବିରାଟ ଭୋଇ (୪) ସାଙ୍ଗମାନଙ୍କ ସହ ଗାଁ ଦାଣ୍ଡରେ ଖେଳୁଥିଲା । ଏତିକିବେଳେ ସେହି ଗ୍ରାମର ଯୁବକ ବୀଜିତ ଭୋଇ ସେଠାରେ ପହଞ୍ଚିଥିଲା । କେହି କିଛି ବୁଝିବା ପୂର୍ବରୁ ହଠାତ ବିରାଟର ଦୁଇ ଗୋଡ଼କୁ ଧରି ଉପରକୁ ଟେକିଥିଲା । ଏହା ପରେ କଂକ୍ରିଟ ରାସ୍ତା ଉପରେ କଚାଡ଼ି ଦେଇଥିଲା । ବିରାଟର ମୁଣ୍ଡ ଫାଟି ପ୍ରବଳ ରକ୍ତସ୍ରାବ ହୋଇଥିଲା । ଏତିକିରେ ନ ଅଟକି ବୀଜିତ ଦ୍ୱିତୀୟ ଥର ପୁଣି ବିରାଟକୁ ଉଠାଇ କଚାଡ଼ିବାକୁ ଉଦ୍ୟମ କରୁଥିବା ବେଳେ ସେଠାରେ ଥିବା ଲୋକେ ଦୌଡ଼ି ଆସି ତାକୁ ରକ୍ଷା କରିଥିଲ ଓ ବୀଜିତକୁ କାବୁ କରିଥିଲେ । ତାକୁ ନିସ୍ତୁକ ମାଡ଼ ମାରି ପୁଲିସ ଜିମାରେ ଦେଇଥିଲେ । ଏଥିସହ ଗୁରୁତର ବିରାଟକୁ ବରଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟ ଏବଂ ପରେ ବୁର୍ଲା ମେଡିକାଲକୁ ପଠାଯାଇଥିଲା । ରବିବାର ସକାଳୁ ସେଠାରେ ବିରାଟର ମୃତୁ୍ୟ ହୋଇଛି ।