ବିଜେଡିରୁ ବିଦା ହେଲେ ପ୍ରକାଶ ତ୍ରିପାଠୀ

Mar 9, 2019 - 09:43 Updated: Mar 9, 2019 - 09:43

3825

ବିଜୁ ଯୁବ ଜନତା ଦଳରୁ ବିଦା ହେଲେ ପ୍ରକାଶ ତ୍ରିପାଠୀ । ଯୁବ ବିଜେଡି ଉପସଭାପତି ପଦରୁ ପ୍ରକାଶକୁ ବିଦା କରିଥିଲେ । ସୂଚନା ଦେଲେ ଯୁବ ବିଜେଡି ସଭାପତି ଅମରେଶ ପତ୍ରୀ । ଆଜି ପ୍ରକାଶକୁ ଗିରଫ କରିଥିଲା କମିଶନରେଟ୍ ପୋଲିସ୍ । ଗତ ୩ ତାରିଖ ରାତିରେ ସହିଦନଗର ଥାନାରେ ପଶି ରାତିଅଧିଆ ଲଙ୍କାକାଣ୍ଡ କରିଥିଲେ ଦୁର୍ବୃତ୍ତ । ସଂଘବଦ୍ଧ ଭାବେ ପୋଲିସ କବଳରୁ ଅଭିଯୁକ୍ତକୁ ଛଡେଇ ନେବାକୁ ଉଦ୍ୟମ କରିବା ବେଳେ ପୋଲିସ ବାଧା ଦେଇଥିଲା । ହେଲେ ଏମାନେ ଥାନାରେ ପଶି ପୋଲିସକୁ ଗୋଡେଇ ଗୋଡେଇ ମାଡ ମାରି ଲହୁଲୁହାଣ କରିଥିଲେ । ଏଥିରେ ଏକାଧିକ ପୋଲିସ କର୍ମଚାରୀ ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । ପୁଲିସ ଏହି ଘଟଣାରେ ପୂର୍ବରୁ ୫ ଜଣଙ୍କୁ ଗିରଫ କରିଥିଲା । ସୂଚନା ଅନୁସାରେ, ଅଭିଯୁକ୍ତ ପ୍ରକାଶ ତ୍ରିପାଠୀ ଏକ ପିଙ୍କ୍ ଅଟୋରେ ବସି ଆତ୍ମସମର୍ପଣ କରିବାକୁ ପ୍ରଥମେ ଡିସିପି ଅଫିସ୍କୁ ଯାଇଥିଲେ । ସେଠାରେ ସେମାନେ ତାଙ୍କୁ ସହିଦ ନଗର ଥାନାକୁ ଯିବାକୁ ପରାମର୍ଶ ଦେଇଥିଲେ । ତା’ରେ ସେ ତାଙ୍କ ସହଯୋଗୀମାନଙ୍କ ଗହଣରେ ମଟର୍ସାଇକେଲ୍ ଯୋଗେ ସହଦ ନଗର ଥାନାରେ ପହଞ୍ଚି ଆତ୍ମସମର୍ପଣ କରିଥିଲେ ବୋଲି କୁହାଯାଉଛି । କିନ୍ତୁ ତାଙ୍କୁ ଗିରଫ କରାଯାଇଛି ବୋଲି ସହିଦ ନଗର ଥାନା ପୁଲିସ କହିଛି । ପୂର୍ବରୁ ଏହି ମାମଲାରେ ଅନ୍ୟ ଛଅ ଜଣଙ୍କୁ ଗିରଫ କରାଯାଇ ସାରିଛି।