ମୁଖ୍ୟମନ୍ତ୍ରୀ କଳାକାର ସହାୟତା ଯୋଜନାରେ କଳାକାରମାନଙ୍କୁ ଏକାଥରେ ୪ ମାସର ପେନସନ

May 20, 2021 - 04:56 Updated: May 20, 2021 - 04:56

2051

ଭୁବନେଶ୍ୱର : ରାଜ୍ୟର କଳାକାରଙ୍କ ପାଇଁ ଏକ ଖୁସି ଖବର । ମୁଖ୍ୟମନ୍ତ୍ରୀ କଳାକାର ସହାୟତା ଯୋଜନାରେ କଳାକାରମାନଙ୍କୁ ଏକାଥରେ ୪ ମାସର ପେନସନ ପ୍ରଦାନ କରାଯିବ । ଚଳିତ ମାସ ଶେଷସୁଦ୍ଧା ଏହି ପେନସନ ପ୍ରଦାନ କରାଯିବ । କରୋନାର ଦ୍ୱିତୀୟ ଲହର ପରିପ୍ରେକ୍ଷୀରେ ରାଜ୍ୟ ସରକାର ଏହି ନିଷ୍ପତି ନେଇଛନ୍ତି । ଅପରପକ୍ଷରେ ଏସଂକ୍ରାନ୍ତରେ ଆବଶ୍ୟକୀୟ ପଦକ୍ଷେପ ଗ୍ରହଣ କରିବା ନିମନ୍ତେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଦେ୍ର୍ଧଶ ଦେଇଛନ୍ତି । ସୂଚନାଯୋଗ୍ୟଯେ, ମୁଖ୍ୟମନ୍ତ୍ରୀ କଳାକାର ସହାୟତା ଯୋଜନାରେ ରାଜ୍ୟର ୩୭ ହଜାର କଳାକାର ମାସିକ ୧୨ ଶହ ଟଙ୍କା ଲେଖାଏଁ ପେନସନ ପାଉଛନ୍ତି । ଗତ ଫେବୃଆରୀ ମାସ ପର୍ଯ୍ୟନ୍ତ ସେମାନେ ପେନସନ ପାଇ ସାରିଛନ୍ତି । ଏବେ ମାର୍ଚ୍ଚ, ଅପ୍ରେଲ, ମେ’ ଓ ଜୁନର ପେନସନ ଏକାବେଳେ ପ୍ରଦାନ କରାଯିବ । ହିତାଧିକାରୀମାନଙ୍କ ଆକାଉଂଟକୁ ସିଧାସଳଖ ଏହି ଟଙ୍କା ଯିବ । ଗତବର୍ଷ ମଧ୍ୟ କରୋନା ଯୋଗୁଁ କଳାକାରଙ୍କୁ ଆଗୁଆ ପେନସନ ମିଳିଥିଲା ।