ଓଟିରେ ପଶି ନବଜାତକକୁ ଝୁଣି ମାରିଦେଲା କୁକୁର
ଓଟିରେ ପଶି ନବଜାତକକୁ ଝୁଣି ମାରିଦେଲା କୁକୁର
admin
3831
ଫାରୁଖାବାଦ - ଉତ୍ତରପ୍ରଦେଶର ଫାରୁଖାବାଦ ଜିଲ୍ଲାରେ ଏକ ଘରୋଇ ହସ୍ପିଟାଲର ଓଟି (ଅପରେସନ ଥିଏଟର)ରେ ପଶି ଗୋଟିଏ କୁକୁର ଏକ ନବଜାତକୁ ଝୁଣି ମାରିଦେବା ଘଟଣା ଆଲୋଡ଼ନ ସୃଷ୍ଟି କରିଛି । ଅଭିଯୋଗ ପରେ ଜିଲ୍ଲା ମାଜିଷ୍ଟ୍ରେଟ ମାନବେନ୍ଦ୍ର ସିଂହଙ୍କ ନିଦେ୍ର୍ଧଶରେ ଉକ୍ତ ହସ୍ପିଟାଲକୁ ସିଲ କରିଦିଆଯାଇଛି । ଗତ ସୋମବାର ଏହି ଅଭାବନୀୟ ଘଟଣା ଘଟିଛି । ଉକ୍ତ ହସ୍ପିଟାଲ ବିନା ସ୍ୱୀକୃତି ଓ ପଞ୍ଜୀକରଣରେ ଚାଲିଥିବା ଅଭିଯୋଗ ମଧ୍ୟ ହୋଇଛି ।
ସଦର ଥାନାରେ କରାଯାଇଥିବା ଅଭିଯୋଗ ଅନୁସାରେ ନବଜାତ ଶିଶୁର ପିତା ରବିକୁମାର ତାଙ୍କ ପତ୍ନୀ କାଞ୍ଚନକୁ ପ୍ରସବ ପାଇଁ ସୋମବାର ଏହି ହସ୍ପିଟାଲରେ ଭର୍ତ୍ତି କରିଥିଲେ । ସେହିଦିନ ଅସ୍ତ୍ରୋପଚାର ମାଧ୍ୟମରେ ତାଙ୍କର ଏକ ଶିଶୁପୁତ୍ର ଜନ୍ମ ହୋଇଥିଲା । କାଞ୍ଚନଙ୍କୁ ୱାର୍ଡକୁ ସିଫ୍ଟ କରାଯାଇଥିବା ବେଳେ ପରେ ଶିଶୁପୁତ୍ରକୁ ସିଫ୍ଟ କରାଯିବ ବୋଲି ଡାକ୍ତର ଓ ନର୍ସମାନେ କହିଥିଲେ । ଓଟିରେ ଶିଶୁପୁତ୍ର ରହିଥିଲା । ପ୍ରାୟ ୧ ଘଣ୍ଟା ପରେ ଶିଶୁଟିର ମୃତୁ୍ୟ ଘଟିଥିବା ନେଇ ରବିକୁମାରଙ୍କୁ ସୂଚନା ଦିଆଯାଇଥିଲା । ପରିବାର ଲୋକେ ଓଟିକୁ ଯିବା ସମୟରେ ସେଠାରେ ନର୍ସମାନେ ଏକ କୁକୁରକୁ ଘଉଡ଼ଉଥିବା ଦେଖିଥିଲେ ଓଟି ଭିତରେ ଚଟାଣରେ ଶିଶୁପୁତ୍ରଟି ପଡ଼ିଥିଲା ବେଳେ ତାର ବେକ ଓ ଶରୀରର ବିଭିନ୍ନ ସ୍ଥାନରେ କାମୁଡ଼ା ଦାଗ ଓ ଖଣ୍ଡିଆ ଚିହ୍ନ ରହିଥିଲା । ଫଳରେ ପରିବାର ଲୋକେ ଶିଶୁଟିକୁ କୁକୁର କାମୁଡ଼ି ମାରିଦେଇଥିବା ବିଶ୍ୱାସ କରିଥିଲେ । ପୁଲିସ ମୃତ ଶିଶୁଟିକୁ ଜବତ କରିବା ସହ ପ୍ରସୂତି ବିଭାଗର ଡାକ୍ତର ମୋହିତ ଗୁପ୍ତା ଓ କିଛି ନର୍ସଙ୍କ ବିରୋଧରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଅନ୍ୟ ପକ୍ଷରେ ହସ୍ପିଟାଲର ମାଲିକ ବିଜୟ ପଟେଲ କହିଛନ୍ତି ସେ ଏ ବିଷୟରେ କିଛି ଜାଣନ୍ତି ନାହିଁ । ମୃତ ଶିଶୁପୁତ୍ର ଜନ୍ମ ହୋଇଥିବା ତାଙ୍କୁ କୁହାଯାଇଥିଲା ।
