ନୂଆବର୍ଷରୁ ମହଙ୍ଗା ହେବ ଫୋନରେ କଥାବାର୍ତ୍ତା
ନୂଆବର୍ଷରୁ ମହଙ୍ଗା ହେବ ଫୋନରେ କଥାବାର୍ତ୍ତା
admin
2841
ନୂଆଦିଲ୍ଲୀ : ଯଦି ଆପଣ ମୋବଇଲରେ ଅଧିକ କଥା ହେଉଛନ୍ତି ତେବେ ସାବଧାନ ହୋଇଯାଆନ୍ତୁ । ଆସନ୍ତା ନୂଆବର୍ଷ ପରଠାରୁ ମହଙ୍ଗା ହେବ ଟେଲିଫୋନ ସେବା । ଇକୋନୋମିକ ଟାଇମ୍ସ ପକ୍ଷରୁ ପ୍ରକାଶିତ ରିପୋର୍ଟ ଅନୁଯାୟୀ କ୍ଷତିରେ ଚାଲୁଥିବା ଟେଲିକମ କମ୍ପାନୀ ଗୁଡିକ ନିଜର ଟାରିଫ୍ ବଢାଇବାକୁ ଯାଉଛନ୍ତି । ଟାରିଫ ମୂଲ୍ୟରେ ପ୍ରାୟ ୧୫ରୁ ୨୦ ପ୍ରତିଶତ ବୃଦ୍ଧି କରାଯିବ ବୋଲି ଜଣାପଡିଛି । ଭୋଡାଫୋନ ଆଇଡିଆ (ଭିଆଇ) ଏବଂ ଏୟାରଟେଲ ପକ୍ଷରୁ ଏହି ମୂଲ୍ୟବୃଦ୍ଧିର ସଙ୍କେତ ଦିଆଯାଇଥିଲେ ମଧ୍ୟ କେଉଁ କମ୍ପାନୀ କେତେ ବୃଦ୍ଧି କରିବ ସେସମ୍ପର୍କରେ କିଛି ସ୍ପଷ୍ଟ ହୋଇନାହିଁ । ବ୍ୟବହାରକାରୀଙ୍କ ପିଛା ଏୟାରଟେଲ ସର୍ବାଧିକ ୧୬୨ଟଙ୍କା ଆୟ କରୁଥିବା ବେଳେ ଜିଓ ୧୪୫ ଟଙ୍କା ଏବଂ ଭିଆଇ ୧୧୯ ଟଙ୍କା ଆୟ କରୁଛି ।
ତେବେ ହଠାତ ୧୫-୨୦ ପ୍ରତିଶତର ମୂଲ୍ୟବୃଦ୍ଧି କଲେ କମ୍ପାନୀ ଗ୍ରାହକ ହରାଇପାରେ ତେଣୁ ପର୍ଯ୍ୟାୟକ୍ରମେ ଏହି ମୂଲ୍ୟବୃଦ୍ଧି ଲାଗୁ କରିବା ପାଈଁ ଭିଆଇ ସିଇଓ ରବୀନ୍ଦ୍ର ଟକ୍କର ପ୍ରକାଶ କରିଛନ୍ତି । ମୂଲ୍ୟବୃଦ୍ଧି ନିଶ୍ଚିତ ଭାବରେ କରାଯିବ ତେବେ ଅନ୍ୟ ପ୍ରତିଯୋଗୀ କମ୍ପାନୀର ଟାରିଫ ଅନୁଯାୟୀ ସମୟୋଚିତ ପଦକ୍ଷେପ ଗ୍ରହଣ କରାଯିବ ବୋଲି ଟକ୍କର କହିଛନ୍ତି ।
ଭାରତୀ ଏୟାରଟେଲର ସିଇଓ ଗୋପାଲ ଭିଟ୍ଟଲ ମଧ୍ୟ ସମାନ ମତପୋଷଣ କରିଛନ୍ତି । ବର୍ତ୍ତମାନ ଜାରି ରହିଥିବା ଟାରିଫରେ ପ୍ରତିଦ୍ୱନ୍ଦିତା କରିବା କଷ୍ଟସାଧ୍ୟ ତେବେ ପ୍ରତିଯୋଗିତାରେ ରହିବା ପାଇଁ ହେଲେ କମ୍ପାନୀକୁ ଆଗାମୀ ଦିନରେ ଟାରିଫର ମୂଲ୍ୟ ବୃଦ୍ଧି କରିବାକୁ ପଡିବ ।
ବିଗତ ଜୁଲାଇରୁ ସେପ୍ଟେମ୍ବର ତ୍ରୈମାସ ମଧ୍ୟରେ ଭିଆଇ ୮୦ ଲକ୍ଷ ଏବଂ ଏୟାରଟେଲ ୧.୪ କୋଟି ଗ୍ରାହକ ହରାଇଥିବା ବେଳେ ଜିଓ ୭୦ ଲକ୍ଷ ନୂତନ ଗ୍ରାହକ ହାସଲ କରିଛି । ସେହିପରି ଜିଓ ମଧ୍ୟ ଏହାର ଟାରିଫ ପ୍ଲାନ ବଢାଇବା ନେଇ ଗୋଲ୍ଡମ୍ୟାନ ସାଚ ପକ୍ଷରୁ ପୂର୍ବାନୂମାନ ଲଗାଯାଇଛି ।
