ବାଇକକୁ ଧକ୍କା ଦେଲା ଟ୍ରକ୍, ଜଳିଗଲା ଦୁଇ ଗାଡି ।
ବାଇକକୁ ଧକ୍କା ଦେଲା ଟ୍ରକ୍, ଜଳିଗଲା ଦୁଇ ଗାଡି ।
admin
4971
ବାଇକକୁ ଧକ୍କା ଦେଲା ଟ୍ରକ୍ । ଘଟଣାସ୍ଥଳରେ ଜଳିଗଲା ଦୁଇ ଗାଡି । ଏଭଳି ଦୁର୍ଘଟଣା ଘଟିଛି ଯାଜପୁର ଜିଲ୍ଲା ୧୬ନଂ ଜାତୀୟ ରାଜପଥର ସାରୋଇ ଛକ ନିକଟରେ । ଫଳରେ ବାଇକ୍ରେ ଥିବା ଦମ୍ପତି ଗୁରୁତର ଭାବେ ଆହତ ହୋଇଛନ୍ତି। ଆହତ ଦମ୍ପତି ହେଲେ ଭଦ୍ରକ ବନ୍ତ ଅଞ୍ଚଳର ତାପସ ତରେଇ ଓ ଶୁଭଲକ୍ଷ୍ମୀ ନାୟକ। ଗୁରୁତର ଅବସ୍ଥାରେ ଉଭୟଙ୍କୁ ପ୍ରଥମେ ବଡଚଣା ମେଡିକାଲ ଓ ପରେ କଟକ ବଡ଼ମେଡିକାଲ ସ୍ଥାନାନ୍ତର କରାଯାଇଛି।
ମିଳିଥିବା ସୂଚନା ଅନୁଯାୟୀ, ସାରୋଇ ଛକରେ ରାସ୍ତା କାମ ଚାଲୁଥିବାରୁ ଗୋଟିଏ ପାର୍ଶ୍ୱରେ ଗାଡ଼ି ଯାତାୟତ କରୁଥିଲା। ଏହି ସମୟରେ ଉଭୟ ତାପସ ଓ ଶୁଭଲକ୍ଷ୍ମୀ ବାଇକ୍ରେ ବନ୍ତ ଅଭିମୁଖେ ଫେରୁଥିଲେ। ଉକ୍ତ ସମୟରେ ବିପରୀତ ଦିଗରୁ ଆସୁଥିବା ଟ୍ରକ୍ ସହ ସେମାନଙ୍କର ମୁହାଁମୁହିଁ ଧକ୍କା ହୋଇଥିଲା। ସ୍ଥାନୀୟ ଲୋକେ ସଙ୍ଗେସଙ୍ଗେ ଗୁରୁତର ଅବସ୍ଥାରେ ଉଭୟ ପତିପତ୍ନୀଙ୍କୁ ଆମ୍ବୁଲାନ୍ସ ଯୋଗେ ବଡ଼ଚଣା ମେଡିକାଲ ପଠାଇଥିଲେ। ଏହି ସମୟରେ ଟ୍ରକ୍ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଥିଲା। ଏହାର କିଛି ସମୟ ପରେ ହଠାତ୍ ଟ୍ରକ୍ରେ ନିଆଁ ଲାଗି ଯାଇଥିଲା। ଏହା ପାଖରେ ଥିବା ବାଇକ୍କୁ ମଧ୍ୟ ବ୍ୟାପି ଯାଇଥିଲା।
ଖବର ପାଇ ଚଣ୍ଡିଖୋଲ ଅଗ୍ନିଶମ ବାହିନୀର କର୍ମଚାରୀ ପହଞ୍ଚି ଗାଡ଼ିରେ ଲାଗିଥିବା ନିଆଁକୁ ଲିଭାଇଥିଲେ। ବାଇକ୍ଟି ସଂପୂର୍ଣ୍ଣ ଜଳିଯାଇଥିବା ବେଳେ ଟ୍ରକ୍ର ସମ୍ମୁଖ ଭାଗ ଜଳିଯାଇଥିଲା। ଧର୍ମଶାଳା ପୁଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି।
