ରାଜଧାନୀରେ ମର୍ଡର, ୩ ଅଟକ
ରାଜଧାନୀରେ ମର୍ଡର, ୩ ଅଟକ
admin
ଭୁବନେଶ୍ୱର: ରାଜଧାନୀର ରାଜରାସ୍ତାରେ ପୁଣି ରକ୍ତର ଛିଟା । ପୁଣି ରକ୍ତରଞ୍ଜିତ ହୋଇଛି ରାଜଧାନୀ ଭୁବନେଶ୍ୱର । ରାସ୍ତାରେ ଜଣେ ଦୁର୍ବୃତ୍ତ ଛୁରାମାଡ କରିବାରୁ ଜଣେ ଯୁବକଙ୍କ ଜୀବନ ଚାଲିଯାଇଛି । ଆଉ ଜଣେ ଆହତ ହୋଇ ଡାକ୍ତରଖାନାରେ ପଡିଛନ୍ତି। ଶନିବାର ସନ୍ଧ୍ୟାରେ ସହରର ଜନଗହଳିପୂର୍ଣ୍ଣ ପ୍ରେସ୍ ଛକରେ ଘଟିଛି ଏହି ଘଟଣା । ମୃତ ଯୁବକଙ୍କ ନାଁ ନିରଞ୍ଜନ ପରିଡା (୧୯) । ତାଙ୍କ ଘର ଗାଡ଼କଣ ଅଞ୍ଚଳରେ ।
ମିଳିଥିବା ସୂଚନା ଅନୁଯାୟୀ, ମୃତ ନିରଞ୍ଜନ ଓ ଆହତ ଯୁବକଙ୍କ ସହିତ ଆଉ ତିନି ଜଣ ଯୁବକ ଥିଲେ। ସେମାନେ ଏକ ଦୋକାନରେ ଜଳଖିଆ ଖାଉଥିଲେ । ସେହି ସମୟରେ ସେମାନଙ୍କ ମଧ୍ୟରେ କୌଣସି କଥାକୁ ନେଇ ବଚସା ହୋଇଥିଲା । ଆଉ ତା’ପରେ ତିନି ଜଣ ଯୁବକ ଅନ୍ୟ ଦୁଇ ଜଣଙ୍କୁ ଆକ୍ରମଣ କରିଥିଲେ । ସେମାନେ ନିରଞ୍ଜନଙ୍କୁ ଗୋଡାଇ ଗୋଡାଇ ତାଙ୍କ ଶରୀରରେ ଛୁରୀ ଭୁସି ଦେଇଥିଲେ । ଛୁରାମାଡ଼ରେ ଘଟଣାସ୍ଥଳରେ ହିଁ ନିରଞ୍ଜନଙ୍କର ମୃତ୍ୟୁ ଘଟିଥିଲା । ଆହତ ଜଣଙ୍କୁ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି ।
ତେବେ ଏହା ଏକ ଯୋଜନା ବଦ୍ଧ ହତ୍ୟାକାଣ୍ଡ । ପୂର୍ବ ଶତ୍ରୁତାରୁ ଏହି ହତ୍ୟାକାଣ୍ଡ ଘଟିଛି ବୋଲି କୁହାଯାଉଛି। ପୂରା ହତ୍ୟାକାଣ୍ଡର ଦୃଶ୍ୟ ନିକଟସ୍ଥ ସିସିଟିଭିରେ କଏଦ ହୋଇଛି । ପୁଲିସ୍ ଘଟଣାର ତଦନ୍ତ ଆରମ୍ଭ କରି ତିନି ଜଣ ଅଭିଯୁକ୍ତଙ୍କୁ ଅଟକ ରଖିଥିବା ସୂଚନା ମିଳିଛି ।
