ଲାଞ୍ଚ ନେଇ ଧରାପଡ଼ିବା ଭୟରେ ୨୦ ଲକ୍ଷ ଜାଳିଦେଲେ ତହସିଲଦାର
ଲାଞ୍ଚ ନେଇ ଧରାପଡ଼ିବା ଭୟରେ ୨୦ ଲକ୍ଷ ଜାଳିଦେଲେ ତହସିଲଦାର
admin
3246
ଜୟପୁର: ଲାଞ୍ଚ ନେଇ ଧରାପଡ଼ିବା ଭୟରେ ରାଜସ୍ଥାନର ସିରୋହି ଜିଲ୍ଲାରେ ଜଣେ ତହସିଲଦାର ୨୦ ଲକ୍ଷ ଟଙ୍କାର ନୋଟକୁ ଗ୍ୟାସଚୁଲାରେ ରଖି ଜାଳି ଦେଇଛନ୍ତି । ତାଙ୍କ ପତ୍ନୀ ଏହି କାମରେ ତାଙ୍କୁ ସାହାଯ୍ୟ କରିଥିବା ଜଣାପଡ଼ିଛି । ପ୍ରମାଣ ନଷ୍ଟ କରିବାକୁ ସେ ଏଭଳି କରିଥିଲେ । ଘଟଣାଟି ଏହିପରି । ରାଜସ୍ଥାନ ଦୁର୍ନୀତି ନିରୋଧୀ ବୁ୍ୟରୋ (ଏସିବି)ର ଟିମ ବୁଧବାର ସନ୍ଧ୍ୟାରେ ସିରୋହିର ଭାୱରି ଅଞ୍ଚଳ ରାଜସ୍ୱ ନିରୀକ୍ଷକ (ଆରଆଇ) ପର୍ବତ ସିଂହଙ୍କ ୧ ଲକ୍ଷ ଟଙ୍କା ଲାଞ୍ଚ ନେଇଥିବା ସମୟରେ ଗିରଫ କରିଥିଲା । ଜେରା ସମୟରେ ସିଂହ ଏହି ଟଙ୍କା ପିଣ୍ଡୱାଡ଼ାର ତହସିଲଦାର କଳ୍ପେଶ ଜୈନଙ୍କ ପାଇଁ ନେଉଥିବା ପ୍ରକାଶ କରିଥିଲେ । ଏହା ପରେ ଏସିବି ଟିମ କଳ୍ପେଶଙ୍କ ଘରେ ଚଢ଼ଉ ପାଇଁ ବାହାରିଥିଲେ । ସେ କିନ୍ତୁ ଚଢ଼ଉ ସମ୍ପର୍କରେ ପୂର୍ବରୁ ସୂଚନା ପାଇଯାଇଥିଲେ । ତେଣୁ ତୁରନ୍ତ ସେ ନିଜ ଘରେ ପହଞ୍ଚି ନିଜକୁ ଏକ କୋଠରୀରେ ବନ୍ଦ କରିଦେଲେ । ଏସିବି ଟିମ୍ ସେଠାରେ ପହଞ୍ଚିଲେ ମଧ୍ୟ ସେ କବାଟ ଖୋଲିଲେ ନାହିଁ । ବରଂ ନୋଟର ବଣ୍ଡଲଗୁଡ଼ିକୁ ଗ୍ୟାସ ଚୁଲାରେ ରଖି ଜାଳିବା ଆରମ୍ଭ କଲେ । ତାଙ୍କ ପତ୍ନୀ ତାଙ୍କୁ ଏହି କାମରେ ସାହାଯ୍ୟ କଲେ । ଏସିବି ଟିମ୍ ଝରକା କାଚ ଭାଙ୍ଗି ଘଟଣାରେ ଭିଡ଼ିଓ ରେକର୍ଡିଂ କଲା । କଳ୍ପେଶଙ୍କୁ ଏଭଳି ନ କରିବାକୁ ଏସିବି ଟିମ୍ କହିଲେ ମଧ୍ୟ ସେ କିଛି ଶୁଣି ନଥିଲେ । ସ୍ଥାନୀୟ ପୁଲିସ ସହାୟତାରେ ପ୍ରାୟ ୧ ଘଣ୍ଟା ପରେ କଟର ସହାୟତାରେ ଘରର କବାଟକୁ କଟାଗଲା । ସେତେବେଳକୁ କଳ୍ପେଶ ପ୍ରାୟ ୨୦ ଲକ୍ଷ ଟଙ୍କାର ନୋଟ୍ ଜଳାଇ ଦେଇଥିବା ଏସିବି ଦାବି କରିଛି । ଘଟଣାସ୍ଥଳରୁ ଅଧା ଜଳା ଟଙ୍କା ବି ଉଦ୍ଧାର କରାଯାଇଛି ।
