ଫୁଟବଲ୍ କିମ୍ବଦନ୍ତି, ମାରାଡୋନା ଆଉ ନାହାନ୍ତି
ଫୁଟବଲ୍ କିମ୍ବଦନ୍ତି, ମାରାଡୋନା ଆଉ ନାହାନ୍ତି
admin
3801
ବୋଏନସ ଆଏରସ: ବିଶ୍ୱର ସର୍ବକାଳୀନ ଶ୍ରେଷ୍ଠ ଫୁଟବଲର, ଆର୍ଜେଣ୍ଟିନାର କିମ୍ବଦନ୍ତି ଖେଳାଳି ଡଏଗୋ ମାରାଡୋନା ଆଉ ନାହାନ୍ତି । ଫିଫା ବିଶ୍ୱକପରେ ଦୁଇ ଦୁଇ ଥର ବିଂଶ ଶତାବ୍ଦୀର ଶ୍ରେଷ୍ଠ ଫୁଟବଲର ପୁରସ୍କାର ବିଜେତା ମହାନ ମାରାଡୋନାଙ୍କ ବୁଧବାର ରାତିରେ ୬୦ ବର୍ଷ ବୟସରେ ପରଲୋକ ହୋଇଯାଇଛି । ମସ୍ତିଷ୍କରେ ରକ୍ତ ଜମାଟ ବାନ୍ଧିବାରୁ ଅସ୍ତ୍ରୋପଚାର ହେବାର ମାତ୍ର ଦୁଇ ସପ୍ତାହ ପରେ ହୃଦଘାତରେ ଏହି ଯଶସ୍ୱୀ କ୍ରୀଡ଼ା ବ୍ୟକ୍ତିଙ୍କ ଜୀବନ ଦୀପ ଲିଭି ଯାଇଛି । ଏହି ଖବର ସମସ୍ତ କ୍ରୀଡ଼ା ଜଗତକୁ ସ୍ତବ୍ଧ କରି ଦେଇଛି ।
ନିଜର ଅବିଶ୍ୱସନୀୟ କ୍ରୀଡ଼ା କୌଶଳ ପାଇଁ ଈର୍ଷଣୀୟ ସଫଳତା ହାସଲ କରିଥିବା ମାରାଡୋନା ବିଶ୍ୱର ପ୍ରତିଟି କୋଣ ଅନୁକୋଣରେ କୋଟି କୋଟି ପ୍ରଶଂସକ ତିଆରି କରିପାରିଥିଲେ । ତେଣୁ ହଠାତ ତାଙ୍କର ଏପରି ବିଦାୟକୁ ପ୍ରଶଂସକ ମହଲ ସହଜରେ ଗ୍ରହଣ କରିପାରୁନାହାନ୍ତି । ଆର୍ଜେଣ୍ଟିତା ତାର ସବୁଠାରୁ ସୁଯୋଗ୍ୟ ସନ୍ତାନକୁ ହରାଇଛି । ବିଂଶ ଶତାବ୍ଦୀର ଶ୍ରେଷ୍ଠ ଗୋଲ ଦେଇଥିବା ମାରାଡୋନାଙ୍କ ମୃତୁ୍ୟ ଖବର ଆସିବା ପରେ ଭାରତ ସହ ସମଗ୍ର କ୍ରୀଡ଼ା ଜଗତ ଦୁଃଖରେ ବୁଡ଼ି ଯାଇଛି । ତାଙ୍କ ପରିବାରକୁ ଶ୍ରଦ୍ଧାଞ୍ଜଳୀର ସୁଅ ଛୁଟିଛି ।
