ଏକାମ୍ର ଭୁବନେଶ୍ୱର ନିର୍ବାଚନ ମଣ୍ଡଳୀରେ ୟାସିରଙ୍କ ପ୍ରଚାର
ANGIKAR NEWS
ଭୁବନେଶ୍ୱର ସଂସଦୀୟ କ୍ଷେତ୍ରର କଂଗ୍ରେସ ପ୍ରାର୍ଥୀ ସୟଦ ୟାସିର ନୱାଜ ଏବଂ ଏକାମ୍ର ଭୁବନେଶ୍ୱର ବିଧାନସଭା ନିର୍ବାଚନ ମଣ୍ଡଳୀର ପ୍ରାର୍ଥୀ ପ୍ରଶାନ୍ତ କୁମାର ଚମ୍ପତି ଘାଟିକିଆ, କୋଳଥିଆ, ଆଇଁଗିଣିଆ, ଡୁମୁଡୁମା ହାଉସିଂବୋର୍ଡ଼, ରଘୁନାଥନଗର, ରେହମତ ନଗର, ବେଗୁନିଆ, ଡୁମୁଡୁମା, ଯଦୁପୁର, ପଂଚଶଖାନଗର ବୁଲି ନିର୍ବାଚନ ପ୍ରଚାର କାର୍ଯ୍ୟ କରିଥିଲେ । ସୟଦ ୟାସିର ନୱାଜ ଭୋଟର ଭାଇଭଉଣୀମାନଙ୍କୁ କହିଥିଲେ ଯେ ସେ ଏକାମ୍ର ଭୁବନେଶ୍ୱର ଏବଂ ଭୁବନେଶ୍ୱର ସଂସଦୀୟ କ୍ଷେତ୍ରର ସର୍ବାଙ୍ଗୀନ ବିକାଶ ପାଇଁ ଶପଥବଦ୍ଧ । ୨୫ ବର୍ଷର ନବୀନ ଶାସନ ଓ ୧୦ ବର୍ଷର ମୋଦି ଶାସନ ଭୁବନେଶ୍ୱର ସହରରେ ବିକାଶ କରିପାରି ନାହାନ୍ତି । ଯେଉଁ ପ୍ରତିଶ୍ରୁତି ଦେଇଥିଲେ ତାହା ପାଳନ କଲେ ନାହିଁ । ଭୁବନେଶ୍ୱରର ବେକାର ଯୁବକ ଯୁବତୀଙ୍କ ପାଇଁ ନିଯୁକ୍ତି ନାହିଁ । ଆଇନ ଶୃଙ୍ଖଳା ପରିସ୍ଥିତି ବିଗିଡ଼ି ଯାଇଛି । ନିମ୍ନମାନର କାମ ଯୋଗୁଁ ଭୁବନେଶ୍ୱର ରାସ୍ଥାଘାଟ ନିର୍ମାଣର ୪ ମାସ ଭିତରେ ବିପର୍ଯ୍ୟସ୍ତ ହୋଇପଡ଼ୁଛି । ଶ୍ରୀ ନୱାଜ କହିଛନ୍ତି ଯେ ପ୍ରଦେଶ ଛାତ୍ର କଂଗ୍ରେସ ସଭାପତି ଭାବରେ ମୁଁ ଛାତ୍ରମାନଙ୍କ ପାଇଁ ଓ ବେକାର ଯୁବକଯୁବତୀ ମାନଙ୍କ ହକ ପାଇଁ ଲଢ଼େଇ କରିଛି । ଉଭୟ ସରକାରର ଦୁର୍ନୀତି ବିରୁଦ୍ଧରେ ରାଜରାସ୍ତାରେ ଆନେ୍ଦାଳନ କରିଛି । ଶ୍ରୀ ନୱାଜ ଏହି ନ୍ୟାୟ ଯୁଦ୍ଧରେ ଭୋଟର ଭାଇ ଭଉଣୀମାନଙ୍କର ସମର୍ଥନ ଲୋଡ଼ିଛନ୍ତି । ଏହି କାର୍ଯ୍ୟକ୍ରମରେ ଶ୍ରୀ ନୱାଜଙ୍କ ସହ ପ୍ରଦେଶ ଯୁବ କଂଗ୍ରେସ ସଭାପତି ରଣଜିତ ପାତ୍ର, ଭୁବନେଶ୍ୱର ଯୁବ କଂଗ୍ରେସ ସଭାପତି ମହମ୍ମଦ ଗୁଲଫାମ, ସାଗର ପଟ୍ଟନାୟକ, ଅଫତାବ ଅଲ୍ଲି, ନିଆଜୁଲ ଇସଲାମ, ସେକ ନବିଉଲ୍ଲା, ହମିଦ ଖାନ, କୃଷ୍ଣଚନ୍ଦ୍ର ସାହୁ, ପ୍ରକାଶ ବିଶ୍ୱାଳ ପ୍ରମୁଖ ଅଂଶଗ୍ରହଣ କରିଥିଲେ ।
