ଏପ୍ରିଲ ୧୪ ପରେ ବଢ଼ିବ କି ଲକଡାଉନ, ଦେଖନ୍ତୁ ଏହି ରିପୋର୍ଟ।
ଏପ୍ରିଲ ୧୪ ପରେ ବଢ଼ିବ କି ଲକଡାଉନ, ଦେଖନ୍ତୁ ଏହି ରିପୋର୍ଟ।
admin
5786
ଲକଡାଉନ ଏବଂ ବ୍ୟାପକ ସତର୍କତା ସତ୍ତ୍ୱେ ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ି ଚାଲିଛି । ୧୪ଟି ରାଜ୍ୟରେ ଗୋଷ୍ଠୀ ସଂକ୍ରମଣ ଆଶଙ୍କା ରହିଛି । ବିଭିନ୍ନ ସ୍ଥାନରେ ଏବେ କରୋନା ହଟସ୍ପଟ ଚିନ୍ତା ବଢ଼ିଗଲାଣି । ଏବେ ଦେଶର କିଛି ସ୍ଥାନରେ ଗୋଷ୍ଠୀ ସଂକ୍ରମଣ ଆରମ୍ଭ ହୋଇଯାଇଥିବା ବେଳେ ଭାରତ ଏବେ ଷ୍ଟେଜ ୨ ଏବଂ ଷ୍ଟେଜ ୩ ମଧ୍ୟରେ ଅଛି ବୋଲି ଜଣାପଡ଼ିଥିବାରୁ କେନ୍ଦ୍ର ସରକାର ଲକଡାଉନ ଅବଧି ବଢ଼ାଇବା ପାଇଁ ବିଚାର ବିମର୍ଶ ଜାରି ରଖିଛନ୍ତି ।
ଦେଶବ୍ୟାପୀ ଲକଡାଉନ ମଙ୍ଗଳବାରକୁ ୨ ସପ୍ତାହ ପୂରିଛି । ଆସନ୍ତା ଏପ୍ରିଲ ୧୪ ତାରିଖରେ ୨୧ ଦିନିଆ ଲକଡାଉନ ଅବଧି ସରୁଥିବା ବେଳେ ବିଭିନ୍ନ ରାଜ୍ୟ ମୁଖ୍ୟ ଏବଂ ବିଶେଷଜ୍ଞମାନେ ଲକଡାଉନ ଅବଧି ବଢ଼ାଇବା ପାଇଁ ସରକାରଙ୍କୁ ଅନୁରୋଧ କରିଛନ୍ତି । ତେଣୁ ସରକାର ଲକଡାଉନ ଅବଧି ବଢ଼ାଇବା ନେଇ ବିଚାର କରୁଛନ୍ତି ବୋଲି ଏକ ସରକାରୀ ସୂତ୍ରରୁ ଜଣାପଡ଼ିଛି । ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଅନୁରୋଧ କରି ଦେଶରେ କରୋନା ନିୟନ୍ତ୍ରଣ ପାଇଁ ଲକଡାଉନ ବଢ଼ାଇବାକୁ କହିଥିଲେ । ଲକଡାଉନ ହଟିଲେ ଦେଶରେ ଅନେକ ଜୀବନହାନି ହେବ ବୋଲି ଶ୍ରୀ ରାଓ କହିଥିଲେ । କେସିଆରଙ୍କ ପୂର୍ବରୁ ଉତ୍ତର ପ୍ରଦେଶ ସରକାର ବି ୧୪ ତାରିଖରେ ଲକଡାଉନ ହଟିବନି ବୋଲି ପୂର୍ବରୁ ସୂଚାଇ ଦେଇଛନ୍ତି । ସେହିପରି ପଞ୍ଜାବରେ ଜଣେ ବରିଷ୍ଠ ଅମଲା ଏବଂ ମହାରାଷ୍ଟ୍ରରେ ଜଣେ ମନ୍ତ୍ରୀ ମଧ୍ୟ ସମାନ ମତ ରଖିଛନ୍ତି । ଉପରାଷ୍ଟ୍ରପତି ଏମ ଭେଙ୍କେୟା ନାଇଡୁ କହିଛନ୍ତି, ଲକଡାଉନର ଶେଷ ସପ୍ତାହ ଅତ୍ୟନ୍ତ ଚିନ୍ତାଜନକ । କରୋନା ଭାଇରସ ବ୍ୟାପିବା ତଥ୍ୟକୁ ଆଧାର କରି ସରକାର କିଛି ନିଷ୍ପତ୍ତି ନେବେ । ତେବେ ସରକାର ଯେକୌଣସି ନିଷ୍ପତ୍ତି ନେବେ ବି ସମସ୍ତ ଲୋକ ଏହାକୁ ମାନିନେବା ପାଇଁ ନାଇଡୁ ଅନୁରୋଧ କରିଛନ୍ତି । ଅନ୍ୟ ପକ୍ଷେ ସରକାରଙ୍କ ପୋର୍ଟାଲ ‘ମାଇଁଗଭଇଣ୍ଡିଆ’ର ଟ୍ୱିଟର ହ୍ୟାଣ୍ଡେଲରେ ଲକଡାଉନ ଅବଧି ବଢ଼ିବାର କୌଣସି ଯୋଜନା ନାହିଁ ବୋଲି କ୍ୟାବିନେଟ୍ ସଚିବ ରାଜୀବ ଗୌବା ଟ୍ୱିଟ କରିଥିଲେ । ତେବେ ଏହି ଟ୍ୱିଟକୁ ପ୍ରତ୍ୟାହାର କରି ନିଆଯାଇଥିବାରୁ ଏହା ଲକଡାଉନ ଅବଧି ବଢ଼ିବା ସଙ୍କେତ ଦେଉଛି ବୋଲି ଚର୍ଚ୍ଚା ହେଉଛି ।
