ଶହେ ଟଙ୍କା ପାଇଁ ମର୍ଡର
ଶହେ ଟଙ୍କା ପାଇଁ ମର୍ଡର
admin
ପାଣିକୋଇଲି: ପାଣିକୋଇଲି ଥାନା ସୋଡି ଗ୍ରାମ ନିକଟରେ ହୋଇଥିବା ଡବଲ ମର୍ଡର ଘଟଣା ଉପରୁ ପରଦା ହଟାଇଛି ପୁଲିସ । କିନ୍ନରଙ୍କ ସହ ଅନୈତିକ ସମ୍ପର୍କରୁ ବିବାଦ ଉପୁଜି ୨ ଯୁବକଙ୍କୁ ହତ୍ୟା କରାଯାଇଛି । ଦାବି ମୁତାବକ ଅର୍ଥ ନ ଦେବାରୁ ଅର୍ଥାତ ମାତ୍ର ଶହେ ଟଙ୍କା ପାଇଁ ମାନସ ରଞ୍ଜନ ଦାସ ଓ ବିଜୟ କୁମାର ସାହୁଙ୍କୁ ମିଳିତ ଭାବେ ଆକ୍ରମଣ କରି ପଥରରେ ଛେଚି ହତ୍ୟା କରାଯାଇଥିଲା । ଏହି ହତ୍ୟା ଘଟଣାରେ ପୁଲିସ ୨ ଜଣ କିନ୍ନର, ଜଣେ ଯୁକ୍ତ ଦୁଇ ଛାତ୍ର (ନାବାଳକ) ସହିତ ମୋଟ ୭ ଜଣଙ୍କୁ ପୁଲିସ ଗିରଫ କରିଥିବା ବେଳେ ୨ଟି ବାଇକ ଓ ୭ଟି ମୋବାଇଲ ଜବତ ହୋଇଛି । ପାଣିକୋଇଲି ଥାନା କେସ ନମ୍ବର ୨୩୮/୨୧ ଦଫା ୩୦୨, ୨୦୧ ଓ ୩୪ ରେ ଏକ ମାମଲା ରୁଜୁ ହୋଇଛି । ଡିଏସପି ପ୍ରମୋଦ କୁମାର ମଲ୍ଲିକ ଓ ପାଣିକୋଇଲି ଥାନା ଅଧିକାରୀ ସୁଶୀଲ କୁମାର ନାୟକଙ୍କ ସୂଚନା ହେଲା, ଗିରଫ ଅଭିଯୁକ୍ତ ମଧ୍ୟରେ ଗଞ୍ଜାମ ଜିଲ୍ଲା ଛତ୍ରପର ଥାନା ଅନ୍ତର୍ଗତ ରାଜୋନା ଗ୍ରାମର ଦୀପା କିନ୍ନର ଓ ଶିଲା କିନ୍ନର, ଭଦ୍ରକ ଜିଲ୍ଲା ପୁରୁଣା ବଜାର ଥାନା ଗରଦପୁର ଅଞ୍ଚଳର ଶ୍ରୀକାନ୍ତ ବେହେରାଙ୍କ ପୁଅ ସତ୍ୟଜିତ, ବିବେକ ସାହୁଙ୍କ ପୁଅ ମନୋଜ, ଗୋବିନ୍ଦ ସାହୁଙ୍କ ପୁଅ ରାଜେନ୍ଦ୍ର, ଗଜେନ୍ଦ୍ର ବେହେରାଙ୍କ ପୁଅ ମନୋଜ ଏବଂ ଜଣେ ଯୁକ୍ତ ଦୁଇ ପଢ଼ୁଥିବା ନାବାଳକ ଛାତ୍ର ଅଛନ୍ତି । ନାବାଳକକୁ ଅନୁଗୁଳ ସ୍ଥିତ ସୁଧାର ଗୃହ ଏବଂ ଅନ୍ୟମାନଙ୍କୁ ରଗଡି ଜେଲକୁ ପଠାଯାଇଛି । ସଂମ୍ଭୋଗ ପାଇଁ ଗତ ୨ ତାରିଖ ରାତିରେ ପାଣିକୋଇଲି ନିକଟ ଜହ୍ନା ଗ୍ରାମର ମାନସ ଓ ବିଜୟ ପାଣିକୋଇଲି ଗେଟ ପାର ହୋଇ କିଛି ଦୂରରେ ଦୁଇ କିନ୍ନର ଶିଲା ଓ ଦୀପା ନିକଟରେ ପହଞ୍ଚିଥିଲେ । ମୂଲଚାଲ କରିବା ପରେ ଅନୈତିକ ସମ୍ପର୍କ ସ୍ଥାପନ କରିଥିଲେ । ଘଣ୍ଟାକୁ କିନ୍ନରମାନେ ଦୁଇଶହ ଟଙ୍କା ଦାବି କରିଥିବା ବେଳେ ବିଜୟ ଶହେ ଟଙ୍କା ଦେବାକୁ କହିଥିଲା । ଏହାକୁ ନେଇ ଉଭୟଙ୍କ ମଧ୍ୟରେ ଝଗଡ଼ା ଓ ମାରପିଟ ହୋଇଥିଲା । ସେହି ସମୟରେ ଏକ କିନ୍ନରଙ୍କ ନିକଟକୁ ନିୟମିତ ଭଦ୍ରକରୁ ଆସୁଥିବା ୫ ଜଣ ଗରାଖ ଘଟଣା ସ୍ଥଳରେ ପହଞ୍ଚି ଯାଇଥିଲେ । ଏମାନେ ଦୁଇ କିନ୍ନରଙ୍କ ସହ ମିଶି ବିଜୟ ଓ ମାନସଙ୍କ ଉପରେ ପ୍ରଚଣ୍ଡ ଆକ୍ରମଣ କରିଥିଲେ । ନିକଟରେ ପୋଲ ନିର୍ମାଣ ପାଇଁ ପଡିଥିବା ରଡ ଓ ପଥରରେ ଉଭୟଙ୍କୁ ନିସ୍ତୁକ ପିଟିଥିଲେ । ମାନସ ଓ ବିଜୟ ମରିଯିବା ପରେ ଅଭିଯୁକ୍ତମାନେ ଉଭୟଙ୍କ ଶବକୁ ଆଣି ନିର୍ମାଣଧୀନ ପୋଲ ଉପରେ ଶୁଆଇ ଦେଇ ବାଇକଟିକୁ ପୋଲ ତଳକୁ ପକାଇ ଦେଇଥିଲେ ।
