ହୀରାକୁଦର ୬/୭ଟି ଗେଟ ଖୋଲିବ : ଏସଆରସି ପ୍ରଦୀପ ଜେନା

ଭୁବନେଶ୍ୱର : ଲଘୁଚାପ ଜନିତ ବର୍ଷାରେ ସାରା ରାଜ୍ୟରେ ଲଗାଣ ବର୍ଷା ଜାରି ରହିଥିବାବେଳେ ଏସଂକ୍ରାନ୍ତରେ ସୂଚନା ଦେଇଛନ୍ତି ଏସଆରସି ପ୍ରଦୀପ କୁମାର ଜେନା  । ଛତିଶଗଡ଼ରେ ବର୍ଷା ହେଉଥିବାରୁ ହୀରାକୁଦ ଜଳଭଣ୍ଡାରକୁ ପାଣି ଆସୁଛି  । ତେବେ ରୁଲ କର୍ଭ ଅନୁଯାୟୀ ଜଳସ୍ତର ଠିକ ଥିଲେ ମଧ୍ୟ ଆଜି ୬/୭ଟି ଗେଟ ଖୋଲିବାକୁ ଯୋଜନା କରାଯାଉଛି  ।

ଏସଆରସି ପ୍ରଦୀପ ଜେନା କହିଛନ୍ତିଯେ, ସେପ୍ଟେମ୍ବରରେ ଏଯାବତ ରାଜ୍ୟରେ ୨୭୫ ମିମି ବର୍ଷା ହୋଇଛି  । ପ୍ରଥମ ୧୪ ଦିନ ଭିତରେ ସାଧାରଣତଃ ସେପ୍ଟେମ୍ବରରେ ୧୧୦ ମିମି ବର୍ଷା ହୋଇଥାଏ  । କିନ୍ତୁ ଏଯାବତ ଏ ମାସରେ ୧୫୪% ଅଧିକ ବର୍ଷା ହୋଇଛି  । ସେହିପରି ସାରା ରାଜ୍ୟରେ ଲଘୁଚାପ ଯୋଗୁଁ ୧୫୬ ମିମି ବର୍ଷା ହୋଇଛି  । ନବରଙ୍ଗପୁର, ଗଜପତି ଭଳି କେତେକ ଜିଲ୍ଲାକୁ ଛାଡ଼ିଦେଲେ ଲଘୁଚାପ ପ୍ରଭାବରେ ଅନ୍ୟ ଜିଲ୍ଲାରେ ପ୍ରବଳ ବର୍ଷା ହୋଇଥିବା ରେକଡର଼୍ କରାଯାଇଛି  ।

ସେ କହିଛନ୍ତିଯେ, ନବରଙ୍ଗପୁରରେ ୧୪ ମିମି ବର୍ଷା ହୋଇଛି  । ଯେତେବେଳେକି ଗଜପତିରେ ୩୬ ମିମି ବର୍ଷା ହୋଇଛି  । ଅପରପକ୍ଷରେ ଦୁଇଦିନ ମଧ୍ୟରେ ବୌଦ୍ଧରେ ସର୍ବାଧିକ ୩୬୧ ମିମି, ପୁରୀରେ ୩୬୦ ମିମି, ଜଗତସିଂହପୁରରେ ୩୫୫ ମିମି, ସୁବର୍ଣ୍ଣପୁରରେ ୨୯୫ ମିମି, କଟକରେ ୨୭୫ ମିମି, ଯାଜପୁରରେ ୨୭୧ ମିମି, ଢେଙ୍କାନାଳରେ ୨୩୯ ମିମି, ଅନୁଗୁଳରେ ୨୨୪ ମିମି, ଖୋର୍ଦ୍ଧାରେ ୨୨୧ ମିମି, ନୟାଗଡ଼ରେ ୨୧୯ ମିମି ବର୍ଷା ହୋଇଛି  । ଅପରପକ୍ଷରେ ବାଲେଶ୍ୱର ଜିଲ୍ଲାରେ ୨୦୦ ମିମିରୁ ଅଧିକ ବର୍ଷା ହୋଇଛି  । ଏହାଛଡ଼ା ୯ ଜିଲ୍ଲାରେ ୧୦୦ରୁ ୨୦୦ ମିମି ବର୍ଷା ହୋଇଥିବା ରେକଡର଼୍ କରାଯାଇଛି  ।  । ନବରଙ୍ଗପୁରକୁ ଛାଡ଼ିଦେଲେ ସବୁ ଜିଲ୍ଲାରେ ଅଧିକ ହୋଇଛି  । ସେହିପରି ଅସ୍ତରଙ୍ଗ ବ୍ଳକରେ ଦୁଇଦିନରେ ୫୯୩ ମିମି, କାକଟପୁରରେ  ୫୩୮.୫ ମିମି, ବୀରମହାରାଜପୁରରେ ୫୭୨ ମିମି ବର୍ଷା ହୋଇଛି  । ସେହିପରି ବୌଦ୍ଧରେ ୪୪୬ ମିମି, କଟକରେ କଂଟାପଡ଼ା ଠାରେ ୪୪୪ ମିମି, ନିଆଳିରେ ୪୪୦ ମିମି, ବାଲିକୁଦାରେ ୪୩୯ ମିମି ବର୍ଷା ହୋଇଥିବାବେଳେ ୨୪ ବ୍ଲକରେ ୩୦୦ରୁ ୪୦୦ ମିମି ବର୍ଷା ହୋଇଛି  ।

ଶ୍ରୀ ଜେନା କହିଛନ୍ତିଯେ, ଉପରମୁଣ୍ଡରେ ଆଶାନୁରୂପକ ବର୍ଷା ହୋଇନାହିଁ  । କାଣୀ ନଦୀରେ ସାମାନ୍ୟ ବର୍ଷାରେ ଜଳମଗ୍ନ ହୁଏ । ତେଣୁ ସେଠାରେ ପ୍ରଶାସନ ସତର୍କ ରହିଛି  । ବ୍ରାହ୍ମଣୀ ଉପରେ ବି ନଜର ରହିଛି  । ହୀରାକୁଦରେ ରୁଲକର୍ଭ ଅନୁଯାୟୀ ୬୨୪ରୁ ୬୨୯ ମଧ୍ୟରେ ରହିବା କଥା  । ଏବେ ସେତକି ଅଛି  । ଏବେ ବର୍ଷା ଛତିଶଗଡ଼ରେ ହେଉଥିବାରୁ ମହାନଦୀ ଜଳଭଣ୍ଡାରକୁ ଅଧିକ ପାଣି ଆସୁଛି  । ଆଜିର ବର୍ଷା ଉପରେ ଏହା ବଢ଼ିବ କି ନାହିଁ ନିର୍ଭର କରିବ  । ତେବେ ଆଜି ହୀରାକୁଦ ଜଳଭଣ୍ଡାର ଗେଟ ଖୋଲିବାର ସମ୍ଭାବନା ରହିଛି  । ଜଳସମ୍ପଦ ବିଭାଗ ପକ୍ଷରୁ ଏନେଇ ସମୀକ୍ଷା କରାଯାଉଛି  ।