୪ ଏନ୍ସିପି-କଂଗ୍ରେସ ବିଧାୟକଙ୍କ ଇସ୍ତଫା

Jul 31, 2019 - 06:53 Updated: Jul 31, 2019 - 06:53

5421

ନୂଆଦିଲ୍ଲୀ : ଶରଦ ପାୱାରଙ୍କ ନେତୃତ୍ୱାଧୀନ ଏନ୍ସିପି (ନ୍ୟାସନାଲିଷ୍ଟ କଂଗ୍ରେସ ପାର୍ଟି) କୁ ଆଜି ବଡ଼ ଝଟକା ଲାଗିଛି । ଆଗକୁ ମହାରାଷ୍ଟ୍ର ବିଧାନସଭା ନିର୍ବାଚନ ଥିବା ବେଳେ ଏନସିପିର ୩ ଜଣ ଏବଂ କଂଗ୍ରେସର ଜଣେ ବିଧାୟକ ଆଜି ଦଳରୁ ଇସ୍ତଫା ଦେଇଛନ୍ତି । ସେମାନେ ଖୁବ ଶୀଘ୍ର ବିଜେପିରେ ଯୋଗ ଦେବେ ବୋଲି ଜଣାପଡ଼ିଛି । ୩ ଜଣ ଏନସିପି ବିଧାୟକ ସନ୍ଦୀପ ନାୟକ, ବୈଭବ ପିଚାଡ଼ ଓ ଶିବେନ୍ଦ୍ର ସିଂହ ଭୋନସଲେ ଆଜି ଦଳରୁ ଇସ୍ତଫା ଦେଇଥିବା ବେଳେ କଂଗ୍ରେସ ବିଧାୟକ କାଳିଦାସ କୋଲମ୍ବକର ମଧ୍ୟ ଇସ୍ତଫା ଦେଇଛନ୍ତି । କୋଲମ୍ବକର ଆସନ୍ତାକାଲି ବିଜେପିରେ ଯୋଗ ଦେବେ । ଏ ନେଇ ସେ ପୂର୍ବରୁ ଘୋଷଣା କରି ସାରିଛନ୍ତି । ୭ ଥର ବିଧାୟକ ହୋଇଥିବା କୋଲମ୍ବକର ପୂର୍ବତନ ମୁଖ୍ୟମନ୍ତ୍ରୀ ନାରାୟଣ ରାଣେଙ୍କ ଘନିଷ୍ଠ ସହଯୋଗୀ । ଆଜି ଇସ୍ତଫା ଦେଇଥିବା ସମସ୍ତ ଏନସିପି ବିଧାୟକ ମହାରାଷ୍ଟ୍ର ବିଧାନସଭା ବାଚସ୍ପତି ହରିଭାଇ ବଗଡେଙ୍କୁ ତାଙ୍କ ଇସ୍ତଫାପତ୍ର ଦେଇ ସାରିଛନ୍ତି । ଜୟଦତ୍ତ କ୍ଷୀରସାଗର ଏବଂ ପଣ୍ଡୁରଙ୍ଗା ବରୋରା ଶିବସେନାର ଯୋଗ ଦେଇସାରିଛନ୍ତି ଏବଂ ମୁମ୍ବାଇ ଏନସିପି ଅଧ୍ୟକ୍ଷ ସଚିନ ଆହିର ମଧ୍ୟ ଏନସିପି ଛାଡ଼ି ଶିବ ସେନାରେ ଯୋଗ ଦେଇଛନ୍ତି ।