ସ୍ୱାମୀକୁ ହତ୍ୟା କରିଥିବା ସ୍ତ୍ରୀକୁ ମିଳିବ ପେନସନ
ସ୍ୱାମୀକୁ ହତ୍ୟା କରିଥିବା ସ୍ତ୍ରୀକୁ ମିଳିବ ପେନସନ
admin
6408
ଚଣ୍ଡୀଗଡ: ପଂଜାବ ଓ ହରିଆଣା ହାଇକୋର୍ଟ ପାରିବାରିକ ପେନସନକୁ ନେଇ ଏକ ରାୟ ଦେଇଛନ୍ତି ଯାହାକୁ ନେଇ ଏବେ ଗଣମାଧ୍ୟମରେ ଚର୍ଚ୍ଚା ଜୋର ଧରିଛି । ହାଇକୋର୍ଟ ଜାନୁଆରୀ ୨୫ରେ ଦେଇଥିବା ଏହି ରାୟରେ କହିଛନ୍ତି ଯେ, ସରକାରୀ କର୍ମଚାରୀଙ୍କ ମୃତୁ୍ୟ ହେଲେ ତାଙ୍କ ପତ୍ନୀ ପେନସନ ପାଇବାକୁ ହକଦାର ଅଟନ୍ତି । ଯଦି ଉକ୍ତ କର୍ମଚାରୀଙ୍କ ପତ୍ନୀ ତାଙ୍କୁ ହତ୍ୟା ବି କରିଦେଇଥାନ୍ତି ଏବଂ କୋର୍ଟ ଦ୍ୱାରା ଏଥିପାଇଁ ଦଣ୍ଡିତ ହୋଇଥାନ୍ତି, ତାହାହେଲେ ବି ସେ ଏହି ପେନସନ ପାଇବେ । ଏଥିରୁ ତାଙ୍କୁ କେହି ବଂଚିତ କରିପାରିବେ ନାହିଁ ।
ହରିଆଣାର ଅମ୍ବାଲା ସହରର ବାସିନ୍ଦା ବଳଜିତ କୌରଙ୍କ ଦ୍ୱାରା ଦାୟର ମାମଲା ଉପରେ ବିଚାର କରି ହାଇକୋର୍ଟ ଏହି ରାୟ ଦେଇଛନ୍ତି । ବଲଜିତ ନିଜ ଆବେଦନରେ ଦର୍ଶାଇଥିଲେ କି ଏକ ସରକାରୀ ବିଭାଗରେ କାମ କରୁଥିବା ତାଙ୍କ ସ୍ୱାମୀଙ୍କର ୨୦୦୮ରେ ମୃତୁ୍ୟ ହୋଇଥିଲା । ୨୦୦୯ରେ ପୁଲିସ ଏହାକୁ ହତ୍ୟା ମାମଲାରେ ପରିବର୍ତନ କରିବା ସହିତ ତାଙ୍କୁ ଏଥିପାଇଁ ଦାୟୀ କରିଥିଲା । ୨୦୧୧ରେ ଏକ କୋର୍ଟ ତାଙ୍କୁ ଏହି ମାମଲାରେ ଦଣ୍ଡିତ କରିଥିଲେ । ୨୦୧୧ ଯାଏଁ କିନ୍ତୁ ତାଙ୍କୁ ପେନସନ ମିଳୁଥିଲା । ହେଲେ ୨୦୧୧ରେ କୋର୍ଟ ରାୟ ଆସିବା ପରେ ସଂପୃକ୍ତ ବିଭାଗ ତାଙ୍କୁ ପେନସନ ବନ୍ଦ କରିଦେଇଥିଲା । ତେଣୁ ତାଙ୍କୁ ପେନସନ ପୁଣି ଥରେ ଦିଆଯାଉ । ହାଇକୋର୍ଟ ତାଙ୍କ ଆବେଦନକୁ ଗ୍ରହଣ କରିବା ସହିତ ସଂପୃକ୍ତ ବିଭାଗକୁ ପେନସନ ବାବଦ ସମସ୍ତ ବକେୟା ରାଶି ଦୁଇ ମାସ ଭିତରେ ପୈଠ କରିବାକୁ ନିଦେ୍ର୍ଧଶ ଦେଇଛନ୍ତି । ତା’ ସହିତ ବଲଜିତଙ୍କୁ ପୁଣି ଥରେ ପେନସନ ଦେବା ଆରମ୍ଭ କରିବାକୁ ବି କୋର୍ଟ କହିଛନ୍ତି ।
