୪ ପର୍ଯ୍ୟାୟରେ ହେବ ଜେଇଇ ମେନ୍
୪ ପର୍ଯ୍ୟାୟରେ ହେବ ଜେଇଇ ମେନ୍
admin
2718
ଭୁବନେଶ୍ୱର: ଇଞ୍ଜିନିୟରିଂ ପଢ଼ିବା ଆଶାୟୀଙ୍କ ପାଇଁ ଖୁସି ଖବର । ଏଣିକି ବର୍ଷରେ ୪ ଥର ହେବ ଜେଇଇ ମେନ । ୨୦୨୧ରୁ ଏହି ନିୟମ ଲାଗୁ ହେବ । ଫେବୃୟାରୀ, ମାର୍ଚ୍ଚ, ଏପି୍ରଲ ଓ ମେ’ମାସରେ ପରୀକ୍ଷା ହେବ । ପ୍ରଥମ ପର୍ଯ୍ୟାୟ ପରୀକ୍ଷା ଫେବୃୟାରୀ ୨୩ ରୁ ଆରମ୍ଭ ହୋଇ ୨୬ ରେ ସରିବ । ୯୦ଟି ପ୍ରଶ୍ନ ପଡ଼ିବ । ପଦାର୍ଥ ବିଜ୍ଞାନ (ଫିଜିକ୍ସ), ରସାୟନ ବିଜ୍ଞାନ (କେମେଷ୍ଟି୍ର) ଓ ଗଣିତ (ମ୍ୟାଥମାଟିକ୍ସ) ରୁ ୩୦ଟି ଲେଖାଏଁ ପ୍ରଶ୍ନ ଆସିବ । ହେଲେ ଛାତ୍ରଛାତ୍ରୀଙ୍କୁ କେବଳ ୭୫ଟି ପ୍ରଶ୍ନର ଉତ୍ତର ଦେବାକୁ ପଡ଼ିବ । ଅବଶିଷ୍ଟ ୧୫ଟି ପ୍ରଶ୍ନର ଉତ୍ତର ଦେଲେ, ଭୁଲ ଉତ୍ତର ପାଇଁ ମାଇନସ ମାର୍କିଂ ହେବ ନାହିଁ । ଅପରପକ୍ଷରେ ଜଣେ ପରୀକ୍ଷାର୍ଥୀ ବର୍ଷରେ ହେବାକୁ ଥିବା ୪ଟି ଯାକ ପରୀକ୍ଷା ଦେଇପାରିବ । ସେଥିରୁ ସର୍ବଶ୍ରେଷ୍ଠ ପ୍ରଦର୍ଶନ (ବେଷ୍ଟ ମାର୍କ) ଅନୁସାରେ ତାଙ୍କର ରାକିଂ ହେବ ବୋଲି କେନ୍ଦ୍ର ଶିକ୍ଷା ମନ୍ତ୍ରୀ ଡ.ରମେଶ ପୋଖରୀଆଲ ନିଶଙ୍କ କହିଛନ୍ତି । ଡ.ନିଶଙ୍କ ଟୁଇଟରେ ସୂଚନା ଦେଇଛନ୍ତି, ଦେଶର ସାଧାରଣ ପରିବାରରୁ ଆସୁଥିବା ପିଲାଙ୍କୁ ବି ଇଞ୍ଜିନିୟରିଂ ପଢ଼ିବାର ସୁଯୋଗ ମିଳିବ । ସେଥିପାଇଁ ବର୍ଷରେ ୪ ଥର ଜେଇଇ ମେନ ହେବ । ଭାଷା ସମସ୍ୟାକୁ ସମାଧାନ କରିବାକୁ ଯାଇ ପ୍ରଥମ ଥର ପାଇଁ ୧୩ଟି ଭାଷାରେ ପରୀକ୍ଷା ହେବ । ଓଡ଼ିଆ ସମେତ ଇଂରାଜୀ, ହିନ୍ଦୀ, ବଙ୍ଗାଳି, ତାମିଲ, ତେଲୁଗୁ, ଗୁଜୁରାଟି, କନ୍ନଡ, ମରାଠୀ, ମାଲାୟାଲମ, ପଞ୍ଜାବି, ଆସାମୀ ଓ ଊର୍ଦ୍ଧୁ ଭାଷାରେ ପରୀକ୍ଷା ହେବ । ପ୍ରଥମ ପରୀକ୍ଷା ସମୟରେ ଯଦି କୌଣସି ଛାତ୍ର କିମ୍ବା ଛାତ୍ରୀର ଅସୁବିଧା ଥାଏ, ସେ ଦ୍ୱିତୀୟ, ତୃତୀୟ କିମ୍ବା ୩ଟି ଯାକର ସମସ୍ୟା ଥିଲେ ୪ ର୍ଥ ପର୍ଯ୍ୟାୟରେ ପରୀକ୍ଷା ଦେଇପାରିବ ।
