ମୋଦୀ ଗ୍ୟାରେଂଟି କମିଶନ, ନବୀନ ଗ୍ୟାରେଂଟି ପିସି ଓ କଂଗ୍ରେସ ଗ୍ୟାରେଂଟି ସାର୍ବଜନୀନ ଗ୍ୟାରେଂଟି
ANGIKAR NEWS
8965
ଭୁବନେଶ୍ୱର ତା. ୦୩.୪- କେନ୍ଦ୍ରରେ ୧୦ ବର୍ଷ ଧରି ଶାସନ କରୁଥିବା ମୋଦୀ ସରକାର ଓ ରାଜ୍ୟରେ ୨୪ ବର୍ଷଧରି ଶାସନ କରୁଥିବା ନବୀନ ସରକାର ଓଡ଼ିଶାର ସାଢ଼େ ଚାରିକୋଟି ଓଡ଼ିଆଙ୍କୁ ଭଣ୍ଡାଇବାରେ ଲାଗିଛନ୍ତି । ପ୍ରତ୍ୟେକ ନିର୍ବାଚନ ପୂର୍ବରୁ ମୋଦୀ ଓ ନବୀନ ଦେଉଥିବା ପ୍ରତିଶ୍ରୁତି ଆଜି ପ୍ରତାରଣାରେ ପାଲଟିଛି । ମୋଦୀଙ୍କ ଗ୍ୟାରେଂଟି ହେଉଛି କମିଶନ ଗ୍ୟାରେଂଟି, ଯେଉଁଥିରେ ନିର୍ଦ୍ଦିଷ୍ଟ କମ୍ପାନୀ ବା ସଂସ୍ଥାକୁ ଫାଇଦାମିଳେ ତା ପ୍ରତିବଦଳରେ ସେମାନେ କମିଶନ ଦିଅନ୍ତି । ଅପରପକ୍ଷେ ନବୀନଙ୍କ ଗ୍ୟାରେଂଟି ପିସି ଗ୍ୟାରେଂଟି, ବିନା ପିସିରେ କୌଣସି କାର୍ଯ୍ୟ ହୁଏ ନାହିଁ । ୨୦୨୪ ନିର୍ବାଚନ ପାଇଁ କଂଗ୍ରେସ ଦେଇଥିବା ଗ୍ୟାରେଂଟି ସାଢ଼େ ଚାରିକୋଟି ରାଜ୍ୟବାସୀଙ୍କ ପାଇଁ ଯେଉଁଥିରେ ସମସ୍ତ ବର୍ଗଙ୍କ ପାଇଁ ବ୍ୟବସ୍ଥା ରହିଛି ବୋଲି ପ୍ରଦେଶ କଂଗ୍ରେସ କମିଟି ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ବରିଷ୍ଠ କଂଗ୍ରେସ ନେତା ତଥା ପୂର୍ବତନ ମନ୍ତ୍ରୀ ଶ୍ରୀ ପଂଚାନନ କାନୁଗୋ କହିଛନ୍ତି । ରାଜ୍ୟବାସୀଙ୍କ ଆଶୀର୍ବାଦ ପାଇ କଂଗ୍ରେସ ସରକାରକୁ ଫେରିଲେ ପ୍ରତ୍ୟେକ ବିଜୁଳି ଉପଭୋକ୍ତା ୨୦୦ ୟୁନିଟ ମାଗଣା ବିଜୁଳି ପାଇବେ । ଏଥିରେ କୌଣସି ବର୍ଗପ୍ରତି ପାତର ଅନ୍ତର ନାହିଁ କିନ୍ତୁ ମୋଦୀ ଓ ନବୀନ ଜନସାଧାରଣଙ୍କ ପ୍ରତି ପାତର ଅନ୍ତର ନୀତି ଆପଣାନ୍ତି । ପ୍ରତ୍ୟେକ ବର୍ଗ କିପରି ଭାବେ ନ୍ୟାୟ ପାଇବେ ଏହାହିଁ କଂଗ୍ରେସର ଗ୍ୟାରେଂଟି । କୃଷିଜାତ ଶିଳ୍ପ ବା କୃଷି ସମ୍ପର୍କିତ ବ୍ୟବସ୍ଥା ଯଥା ଶୀତଳ ଭଣ୍ଡାର, କୋଲଡ ଚେନ ପାଇଁ ୫୦ ପ୍ରତିଶତ ରିହାତିରେ ସୋଲାର ବିଦୁ୍ୟତ ବ୍ୟବସ୍ଥା ଓ ୨ ହଜାର ୟୁନିଟ ୫୦ ପ୍ରତିଶତ ରିହାତିରେ ଯୋଗାଇ ଦିଆଯିବ ବୋଲି ଶ୍ରୀ କାନୁନଗୋ ପ୍ରକାଶ କରିଛନ୍ତି । ମିଶନ ଶକ୍ତି ଦ୍ୱାରା ପ୍ରତିଷ୍ଠିତ ସମସ୍ତ ଅଣୁଶିଳ୍ପ, ହସ୍ତତନ୍ତ୍ର ତଥା ପାୱାରଲୁନ ଶିଳ୍ପକୁ ୫୦% ରିହାତିରେ ବିଦୁ୍ୟତ ଯୋଗାଣ ହେବ । କୃଷିକାର୍ଯ୍ୟ ପାଇଁ ନିୟୋଜିତ ପ୍ରତି ସୂର୍ଯ୍ୟ ରଶ୍ମିଚାଳିତ ପମ୍ପ ପାଇଁ ଚାଷୀଙ୍କୁ ୯୦% ରିହାତି ଦିଆଯିବ ବୋଲି ଶ୍ରୀ କାନୁନଗୋ କହିଛନ୍ତି ।
ଆଜିର ଏହି ସାମ୍ବାଦିକ ସମ୍ମିଳନୀରେ ପିସିସି ମୁଖପାତ୍ର ଜଗଦାନନ୍ଦ ପ୍ରଧାନ ଓ ନଳିନୀକାନ୍ତ ନାୟକ ଉପସ୍ଥିତ ଥିଲେ ।
(ରବିନ୍ଦ୍ର ଆଚାର୍ଯ୍ୟ)
ମୁଖପାତ୍ର, ଓପିସିସି
