ଏଲ୍ଆଇସିର ନୂଆ ଅଧ୍ୟକ୍ଷ, ଜାଣନ୍ତୁ କିଏ
admin
ଭୁବନେଶ୍ବର : ଭାରତୀୟ ଜୀବନ ବୀମା ନିଗମ (ଏଲ୍ଆଇସି)ର ଅଧ୍ୟକ୍ଷ ଭାବେ ଓଡ଼ିଶାର ସିଦ୍ଧାର୍ଥ ମହାନ୍ତିଙ୍କୁ ନିଯୁକ୍ତ କରାଯାଇଛି। ଶ୍ରୀ ମହାନ୍ତିଙ୍କୁ ଅନ୍ତରୀଣ ଅଧ୍ୟକ୍ଷ ଦାୟିତ୍ବ ଦିଆଯାଇଛି। ଅଧ୍ୟକ୍ଷ ଭାବେ ସିଦ୍ଧାର୍ଥଙ୍କ କାର୍ୟ୍ୟକାଳ ମାର୍ଚ୍ଚ ୧୪ରୁ ଆରମ୍ଭ ହେବ। ଏହି ପଦରେ ସେ ଅବସର ଗ୍ରହଣ କରିବା ପର୍ୟ୍ୟନ୍ତ କିମ୍ବା କଂପାନିରେ ଜଣେ ସ୍ଥାୟୀ ଅଧ୍ୟକ୍ଷ ନିଯୁକ୍ତ ନହେବା ପର୍ୟ୍ୟନ୍ତ କାର୍ୟ୍ୟ କରିବେ।
ଏଲ୍ଆଇସି ହାଉସିଂ ଫାଇନାନ୍ସର ଏମ୍ଡି ଓ ସିଇଓ ଭାବେ କାର୍ୟ୍ୟ କରୁଥିବା ସିଦ୍ଧାର୍ଥ ମହାନ୍ତିଙ୍କୁ ୨୦୨୧ ଫେବ୍ରୁଆରିରେ ଏଲ୍ଆଇସିର ଏମ୍ଡି ଭାବେ ନିଯୁକ୍ତ କରାଯାଇଥିଲା। ଶ୍ରୀ ମହାନ୍ତି ଡାଇରେକ୍ଟ ରିକ୍ରୁଟ୍ ଅଫିସର ଭାବେ ୧୯୮୫ରେ ଏଲ୍ଆଇସିରୁ କ୍ୟାରିୟର ଆରମ୍ଭ କରିଥିଲେ। ସେ କଂପାନିର ଚିଫ୍ ଲିଗାଲ୍, ଚିଫ୍ ଇନଭେଷ୍ଟମେଣ୍ଟ୍, ଇଡି-ଲିଗାଲ୍ ଭାବେ ମଧ୍ୟ କାର୍ୟ୍ୟ କରିଛନ୍ତି। ରାଜନୀତି ବିଜ୍ଞାନରେ ସ୍ନାତକ ପାଠ ପଢ଼ିଥିବା ତଥା ଆଇନ ଡିଗ୍ରିଧାରୀ ଶ୍ରୀ ମହାନ୍ତି ଇନସ୍ୟୁରାନ୍ସ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆରୁ ବିଜନେସ୍ ମ୍ୟାନେଜମେଣ୍ଟ୍ ଆଣ୍ଡ୍ ଲିସେଣ୍ଟିଏଟ୍ ଉପରେ ସ୍ନାତକୋତ୍ତର ପାଠ ମଧ୍ୟ ପଢ଼ିଛନ୍ତି। ଏଲ୍ଆଇସିରେ ଶ୍ରୀ ମହାନ୍ତିଙ୍କ ବ୍ୟତୀତ ବିଷ୍ଣୁ ଚରଣ ପଟ୍ଟନାୟକ, ଇପେ ମିନି, ସିଦ୍ଧା ମହାନ୍ତି ଓ ରାଜ କୁମାର ଏମ୍ଡି ଭାବେ କାର୍ୟ୍ୟ କରୁଛନ୍ତି।
