ଜମ୍ମୁ-କଶ୍ମୀରର ୫୭୫ ଯୁବକ ଭାରତୀୟ ସେନାରେ ସାମିଲ
ଜମ୍ମୁ-କଶ୍ମୀରର ୫୭୫ ଯୁବକ ଭାରତୀୟ ସେନାରେ ସାମିଲ
admin
6062
ଶ୍ରୀନଗର: ଭାରତୀୟ ସେନାରେ ଯୋଗଦେଲେ ଜମ୍ମୁ-କଶ୍ମୀର ଯୁବକ। ଜମ୍ମୁ-କଶ୍ମୀରର ବିଭିନ୍ନ ପ୍ରାନ୍ତରୁ ଆସିଥିବା ୫୭୫ ଜଣ ଯୁବକ ଆଜି ଭାରତୀୟ ସେନାରେ ଯୋଗ ଦେଇଛନ୍ତି। ପାସିଂ ପରେଡ୍ ପରେ ଆଜି ସେମାନଙ୍କୁ ଜମ୍ମୁ-କଶ୍ମୀର ଲାଇଟ୍ ଇନ୍ଫାଣ୍ଟ୍ରିରେ ନିଯୁକ୍ତି ଦିଆଯାଇଥିବା ସୂଚନା ମିଳିଛି। ଗଣମାଧ୍ୟମକୁ ଏହି ନୂଆ ଯବାନମାନେ କହିଛନ୍ତି, ସେମାନେ ଜନ୍ମଭୂମିର ସେବା ପାଇଁ ପ୍ରସ୍ତୁତ ଥିଲେ ଏବଂ ଦେଶ ମାତୃକା ପାଇଁ ବଳିଦାନ ଦେବାକୁ ପଛଘୁଞ୍ଚା ଦେବେନି ବୋଲି କହିଛନ୍ତି। ସେମାନେ ଭାରତୀୟ ସେନାରେ ସାମିଲ ହୋଇ ଗର୍ବିତ ବୋଲିତ କହିଛନ୍ତି। ସେମାନଙ୍କ ପରିବାର ଲୋକେ ମଧ୍ୟ ଏହି ମୁହୂର୍ତ୍ତ ତାଙ୍କ ପାଇଁ ଗୌରବ ଆଣିଦେଇଛି ବୋଲି କହିଛନ୍ତି।
ଲେଫ୍ଟନାଣ୍ଟ ଜେନେରାଲ ଅଶ୍ୱିନୀ କୁମାର କହିଛନ୍ତି, ଏପରି ନିଯୁକ୍ତିମେଳା ଚାଲୁ ରହିବ। ଏହା ଜମ୍ମୁ-କଶ୍ମୀରର ଚିତ୍ର ବଦଳୁଥିବାର ନମୁନା। ଯେଉଁମାନେ ଆଗକୁ ଯିବାକୁ ଚାହୁଁଛନ୍ତି ସେନା ସେମାନଙ୍କ ସାଥିରେ ଅଛି। ୧୯୪୭ ମସିହାରେ ବେଆଇନ ଅନୁପ୍ରବେଶ ରୋକିବା ପାଇଁ ଜମ୍ମୁ-କଶ୍ମୀର ଲାଇଟ୍ ଇନ୍ଫାଣ୍ଟ୍ରି ଗଠିତ ହୋଇଥିଲା। ଜମ୍ମୁ-କଶ୍ମୀରୁ ସ୍ୱତନ୍ତ୍ର ସୁବିଧା ଦେଉଥିବା ୩୭୦ ଧାରା ଉଚ୍ଛେଦ ପରେ ବ୍ୟାପକ ନିଯୁକ୍ତିର ପ୍ରତିଶ୍ରୁତି ଦିଆଯାଇଥିବାବେଳେ ଏହା ନିଯୁକ୍ତି ପ୍ରକ୍ରିୟାର ପ୍ରଥମ ପାହାଚ ବୋଲି କୁହାଯାଉଛି।
