ପାରିବାରିକ କଳହର କରୁଣ ପରିଣତି, ଏସିଡ୍ ମାଡ଼ରେ ୫ ଆହତ
admin
ଜଗତସିଂହପୁର: ଜଗତସିଂହପୁର ଜିଲା ତିର୍ତ୍ତୋଲ ଜଡ଼ତିରା ଗାଁରେ ଏସିଡ୍ ମାଡ଼ । ପାରିବାରିକ କଳହକୁ କେନ୍ଦ୍ର କରି ଏସିଡ୍ ମାଡ଼ ହୋଇଛି । ଏସିଡ୍ ମାଡ଼ରେ ଆକ୍ରମଣକାରୀଙ୍କ ସମେତ ୫ ଜଣ ଆହତ ହୋଇଛନ୍ତି । ଆହତମାନେ ହେଲେ ଜଡ଼ତିରା ଗାଁର ବିପିନ ବିହାରୀ ପଣ୍ଡା , ତାଙ୍କ ସ୍ତ୍ରୀ ଆଶାଲତା ପଣ୍ଡା ଓ ତାଙ୍କ ଝିଅ ଜୟଶ୍ରୀ ପଣ୍ଡା ।
ଏମାନେ ସମସ୍ତେ ଜଗତସିଂହପୁର ଜିଲ୍ଲା ମୁଖ୍ୟ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଛନ୍ତି । ବିପିନି ବିହାରୀ ଓ ତାଙ୍କ ସ୍ତ୍ରୀଙ୍କ ମୁହଁ ଓ ଶରୀରର ବିଭିନ୍ନ ସ୍ଥାନରେ ଏସିଡ୍ ପଡ଼ି ପୋଡ଼ି ଯାଇଛି । ଅଭିଯୁକ୍ତ ଏହି ଗାଁର ଇତିଶ୍ରୀ ମହାପାତ୍ର । ଉଭୟ ପରିବାର ମଧ୍ୟରେ ପୂର୍ବରୁ ବିବାଦ ଲାଗିରହି ଥିବା ବେଳେ, ଗତକାଲି ସନ୍ଧ୍ୟାରେ ଉଭୟଙ୍କ ମଧ୍ୟରେ ପାଟି ତୁଣ୍ଡ ହୋଇଥିଲା ।
ଫଳରେ ଏଥିରେ ଉତକ୍ଷୀପ୍ତ ହୋଇ ଇତିଶ୍ରୀ ଏମାନଙ୍କ ଉପରେ ଏସିଡ୍ ପକାଇ ଦେଇଥିଲେ । ଘଟଣାସ୍ଥଳରେ ତିର୍ତ୍ତୋଲ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଅନ୍ୟପଟେ ଇତିଶ୍ରୀ ପାଲଟା ଅଭିଯୋଗ ଆଣିଛନ୍ତି । ବିପିନି ପଣ୍ଡା ଓ ପରିବାର ଲୋକେ ତାଙ୍କ ଘରେ ପଶି ଇତିଶ୍ରୀଙ୍କ ଉପରେ ଏସିଡ୍ ପକାଇଥିବାର ସେ ଅଭିଯୋଗ କରିଛନ୍ତି ।
