ପଶ୍ଚିମବଙ୍ଗରେ ୯୨ ଆସନରେ ନିର୍ବାଚନ ଲଢିବ କଂଗ୍ରେସ
ପଶ୍ଚିମବଙ୍ଗରେ ୯୨ ଆସନରେ ନିର୍ବାଚନ ଲଢିବ କଂଗ୍ରେସ
admin
6490
କୋଲକାତା : ପଶ୍ଚିମବଙ୍ଗରେ ଗୋଟିଏ ପଟେ ବିଜେପି ଓ ଟିଏମସି ମୁହାଁମୁହିଁ ହୋଇସାରିଥିବାବେଳେ ବାମଦଳ ସହ କଂଗ୍ରେସ ମେଂଟ କରି ନିର୍ବାଚନ ଲଢ଼ିବ । ଚଳିତ ନିର୍ବାଚନରେ କଂଗ୍ରେସ ୯୨ ଆସନରେ ଲଢ଼ିବ ବୋଲି ପଶ୍ଚିମବଙ୍ଗ କଂଗ୍ରେସ ସଭାପତି ଅଧିର ରଞ୍ଜନ ଚୌଧୁରୀ ପ୍ରକାଶ କରିଛନ୍ତି । ସେ କହିଛନ୍ତିଯେ, ବାମଦଳ ସହ କଂଗ୍ରେସର ଆସନ ବୁଝାମଣା ହୋଇସାରିଛି । ଆସନ୍ତା ଦୁଇଦିନ ମଧ୍ୟରେ ପ୍ରାର୍ଥୀଙ୍କ ନାମ ଘୋଷଣା କରାଯିବ ବୋଲି ସେ କହିଛନ୍ତି ।
ଅଧିର କହିଛନ୍ତିଯେ, କଂଗ୍ରେସ ୧୩୦ ଆସନରେ ଲଢ଼ିବାକୁ ଦାବି କରିଥିଲା । କିନ୍ତୁ ଆରଜେଡ଼ି ଓ ଏନସିପି ପାଇଁ କିଛି ଆସନ ଛାଡ଼ିବା ନିମନ୍ତେ ଦଳ ୯୨ ଆସନରେ ସନ୍ତୁଷ୍ଟ ହୋଇଛି । ତେବେ ଏହି ୯୨ ଆସନରୁ ଆରଜେଡ଼ି ବା ଏନସିପିକୁ ଦଳ ଭାଗ ଛାଡ଼ିବ ନାହିଁ ବୋଲି ସେ ସ୍ପଷ୍ଟ କରିଛନ୍ତି ।
ଅପରପକ୍ଷରେ ବାମ ସାମ୍ମୁଖ୍ୟ ଅଧ୍ୟକ୍ଷ ବିମାନ ବୋଷ ମଧ୍ୟ ଆସନ ବୁଝାମଣାରେ କୌଣସି ସମସ୍ୟା ନାହିଁ ବୋଲି ପ୍ରକାଶ କରିସାରିଛନ୍ତି । ସୂଚନାଯୋଗ୍ୟଯେ, ପଶ୍ଚିମବଙ୍ଗରେ ୮ଟି ପର୍ଯ୍ୟାୟରେ ନିର୍ବାଚନ ଅନୁଷ୍ଠିତ ହେବ । ମାର୍ଚ୍ଚ ୨୭ରେ ପ୍ରଥମ ପର୍ଯ୍ୟାୟ ନିର୍ବାଚନ ହେବାର ଥିବାବେଳେ ଅପ୍ରେଲ ୨୯ରେ ଶେଷ ପର୍ଯ୍ୟାୟ ନିର୍ବାଚନ କରାଯିବ ।
