ରାଜାଙ୍କୁ ମିଳିଲା ବୁଲା କୁକୁର ଉପହାର
ରାଜାଙ୍କୁ ମିଳିଲା ବୁଲା କୁକୁର ଉପହାର
admin
3860
ଦେଶର ମୁଖ୍ୟ ଶାସନ କର୍ତ୍ତାଙ୍କ ଜନ୍ମ ଦିନରେ ଦେଶବାସୀ ବିଭିନ୍ନ ନାମୀ ଉପହାର ଭେଟି ଦେଉଥିବା ବେଳେ ଭୂଟାନରେ ଏହାର ବ୍ୟତିକ୍ରମ ଦେଖିବାକୁ ମିଳିଛି । ଭୂଟାନବାସୀ ଗତକାଲି ସେମାନଙ୍କ ରାଜା ଜିଗମେ ଖେସାର ନାମଗିଲ ୱାଙ୍ଗଚକଙ୍କ ଜନ୍ମଦିନ ପାଳନ କରିଛନ୍ତି । ଭୁଟାନ ପ୍ରଧାନମନ୍ତ୍ରୀ ଡ.ଲୋଟେ ଶେରିଙ୍ଗ ଏ ଅବସରରେ ଲୋକଙ୍କୁ ଅନୁରୋଧ କରିଛନ୍ତି ଯେ ସମସ୍ତେ ଗୋଟିଏ ଲେଖାଏଁ ବୁଲା କୁକୁର ପାଳିବା ସହିତ ଗୋଟିଏ ବୃକ୍ଷ ରୋପଣ କରି ରାଜାଙ୍କ ୪୦ ତମ ଜନ୍ମ ଦିନ ପାଳନ କରନ୍ତୁ । ଏହା ହିଁ ରାଜାଙ୍କ ପାଇଁ ଉପଯୁକ୍ତ ଉପହାର ହେବ ବୋଲି ସେ କହିଛନ୍ତି । ତାଙ୍କ ମତରେ ବର୍ତ୍ତମାନ ବୁଲା କୁକୁରଙ୍କ ସଂଖ୍ୟାକୁ ନେଇ ଦେଶ ଯେଉଁ ସମସ୍ୟା ସାମ୍ନା କରୁଛି ଏହା ଦ୍ୱାରା କେତେକାଂଶରେ ତାର ସମାଧାନ ହୋଇପାରିବ । ନାମଗେ ଜାମ ନାମକ ଭୂଟାନର ଜଣେ ସାମ୍ବାଦିକ ଏହି ଖବର ନିଜ ଟ୍ୱିଟର ଆକାଉଣ୍ଟରେ ଶେୟାର କରିଛନ୍ତି । ଲେଖିଛନ୍ତି ଯେ ସେ ନିଜେ ଓ ତାଙ୍କ ଭାବୀ ପତ୍ନୀ ୩ ବୁଲା କୁକୁର ପୋଷ୍ୟ କରିଛନ୍ତି । ଜାମଙ୍କ ଏହି ଟ୍ୱିଟ ମାଇକ୍ରୋବ୍ଲଗିଂ ସାଇଟରେ ଚାଞ୍ଚଲ୍ୟ ସୃଷ୍ଟି କରିଛି । ଭୁଟାନର ଏହି ପ୍ରୟାସକୁ ସୋସିଆଲ ମିଡିଆ ୟୁଜର ପ୍ରଶଂସା କରିଛନ୍ତି । ଅନ୍ୟ ରାଷ୍ଟ୍ର ଏହି ଉପାୟ ଆପଣାନ୍ତୁ ବୋଲି ମଧ୍ୟ ଉଲ୍ଲେଖ କରିଛନ୍ତି । ଆଉ କିଛି ଲେଖିଛନ୍ତ, ଭୂଟାନଠାରୁ ଆହୁରି ଅନେକ କଥା ଶିଖିବର ଅଛି । ଭୂଟାନ ପ୍ରଧାନମନ୍ତ୍ରୀଙ୍କ ଅନୁରୋଧକୁ ଦେଶବାସୀ ଗ୍ରହଣ କରିଛନ୍ତି । ବିଶ୍ୱର ଅନେକ ଦେଶର ନାଗରିକ ମଧ୍ୟ ଭୂଟାନର ଏହି ପ୍ରୟାସକୁ ଖୁବ ପସନ୍ଦ କରିଛନ୍ତି ।
