ସନ୍ଦେହଜନକ ଭାବେ ମିଳିଲା ବୋହୂର ମୃତ ଦେହ
ଦାଣ୍ଡ ଦୁଆର ପାଲଟିଲା ମଶାଣୀ ମଶାଣିରେ ନୁହେଁ, ଶାଶୁଘର ଆଗରେ ଜଳିଲା ବୋହୂର ଜୁଇ ଝିଅ ପରିବାର ଲୋକେ ଜାଳିଦେଲେ ଝିଅର ଶବ
Arpit Pattnaik
ଏପରି ଅଭାବନୀୟ ଓ ଅଗ୍ରହଣୀୟ ଘଟଣା ଘଟି ଯାଇଛି ବାଲେଶ୍ବର ଜିଲ୍ଲା ଭୋଗରାଇ ଥାନା ଅନ୍ତର୍ଗତ ହରିପୁର ଗ୍ରାମରେ । ଶୁକ୍ରବାର ଦିନ ସୁରତ ମାହାନାଙ୍କ ଘରୁ ବନ୍ଦ କୋଠରୀ ଭିତରୁ ବୋହୂର ସନ୍ଦେହଜନକ ଭାବେ ମୃତଦେହ ଉଦ୍ଧାର ହୋଇଥିଲା । ଏହା ପରେ ଆରମ୍ଭ ହୋଇଥିଲା ବିବାଦ । ବୋହୁର ମୃତଦେହ ମିଳିବା ପରେ ଶାଶୁଶ୍ବଶୁର ଫେରାର ହୋଇଯାଇଥିଲେ । କିନ୍ତୁ ଘରେ ଏକା ରହିଥିଲା ଜ୍ବାଇଁ । ପୋଲିସ ମୃତ ଦେହ ଜବତ କରିବା ପରେ ଝିଅର ପରିବାର ଲୋକେ ଆଣିଥିଲେ ହତ୍ୟା ଅଭିଯୋଗ ।
ସୂଚନା ମତାବକ ହରିପୁର ଗ୍ରାମର ସୁରତ ମାହାନାଙ୍କ ପୁଅ ରାମକୃଷ୍ନଙ୍କ ସହ ସସ୍ମିତାଙ୍କ ତିନି ବର୍ଷ ପୂର୍ବରୁ ବିବାହ ହୋଇଥିଲା । ବିଭିନ୍ନ ସମୟରେ ସ୍ବାମୀ ସ୍ତ୍ରୀଙ୍କ ମଧ୍ୟରେ କଳହ ଲାଗୁଥିଲା, କିନ୍ତୁ ଗୁରୁବାର ସକାଳେ କୌଣସି କଥାକୁ ନେଇ ସ୍ବାମୀସ୍ତ୍ରୀଙ୍କ ମଧ୍ୟରେ ପ୍ରବଳ ଝଗଡା ହୋଇଥିଲା । ଏହାର ଘଣ୍ଟାଏ ପରେ ବନ୍ଦ କୋଠରୀ ଭିତରୁ ସନ୍ଦେହଜନକ ଭାବରେ ସସ୍ମିତାଙ୍କ ମୃତ୍ୟୁଦେହ ମିଳିଥିଲା । ପୋଲିସ ଖବର ପାଇ ଶବ ବ୍ୟବଛେଦ ପାଇଁ ହସ୍ପିଟାଲକୁ ନେଇଥିଲା । ମୃତ୍ୟୁଦେହ ପହଁଚିବା ପରେ ପୋଲିସ ଏବଂ ମୃତକଙ୍କ ସମ୍ପକୀୟ ମୁଁହାମୁଁହି ହୋଇଥିଲେ ।
ପୋଲିସ ଶବ ବ୍ୟବଛେଦ ପରେ ଝିଅଘର ଲୋକଙ୍କୁ ଶବ ହସ୍ତାନ୍ତର କରିଥିଲା । ଏହାକୁ ପ୍ରତିବାଦ କରି ସସ୍ମିତାଙ୍କ ପରିବାର ଲୋକେ ଶୁକ୍ରବାର ସକାଳୁ ଶାଶୁଘର ଦାଣ୍ଡ ଦୁଆରେ ଜୂଇ ସଜାଇ ଅନ୍ତିମ ସଂସ୍କାର କରିଛନ୍ତି । ଏହାକୁ ଗାଁ ଲୋକେ ପ୍ରତିବାଦ କରି ନଥିଲେ କି ପୋଲିସ ବି ଏହାକୁ ଅଟକାଇ ନ ଥିଲା । ଫଳରେ ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି । ଏହି ଘଟଣାରେ ଶୁକ୍ରବାର ସ୍ୱାମୀ ରାମକୃଷ୍ଣଙ୍କୁ ପୋଲିସ ଗିରଫ କରିଥିବା ବେଳେ ଶାଶୁ ଶ୍ବଶୁର ଏବଂ ପରିବାର ଲୋକେ ଘରେ ତାଲା ମାରି ଫେରାର ହୋଇଯାଇଛନ୍ତି । ସେପଟେ ହସ୍ପିଟାଲ ପରିସରରୁ ମୃତକଙ୍କ ସ୍ୱାମୀ ରାମକୃଷ୍ନଙ୍କୁ ପୋଲିସ ଥାନାକୁ ନେଇ ଯାଉଥିବା ବେଳେ ଅଭିଯୁକ୍ତ ସ୍ବାମୀକୁ ତୁରନ୍ତ ଦଣ୍ଡ ଦେବା ଦାବିରେ ପୋଲିସ ଗାଡ଼ି ଆଗରେ ଶୋଇଥିଲେ ଝିଅର ମା ଓ ପିଉସା । ଏହି ଘଟଣାକୁ ନେଇ ଶୁକ୍ରବାର ହସ୍ପିଟାଲ ପରିସରେ ଚାପା ଉତେଜନା ମଧ୍ୟ ପ୍ରକାଶ ପାଇଥିଲା ।
