ଓଡ଼ିଶା ଏଫସି ଆଗରେ ମୋହନବାଗାନ ଆହ୍ୱାନ

Dec 3, 2020 - 11:42 Updated: Dec 3, 2020 - 11:42

2648

କଟକ: ଇଣ୍ଡିଆନ ସୁପର ଲିଗ (ଆଇଏସଏଲ) ୭ମ ସଂସ୍କରଣ ରେ ୧୫ତମ ଲିଗ ମ୍ୟାଚ ଗୁରୁବାର ଫାଟ୍ରୋଡରେ ଓଡ଼ିଶା ଏଫସି ଓ ଏଟିକେ ମୋହନବାଗାନ ମଧ୍ୟରେ ଖେଳାଯିବ । ମୋହନବାଗାନ ପ୍ରଥମ ଦୁଇ ମ୍ୟାଚ ଜିତିଥିବା ବେଳେ ଓଡ଼ିଶା ଏଫସି ଦ୍ୱିତୀୟ ମ୍ୟାଚକୁ ଡ୍ର ରଖିବାରେ ସକ୍ଷମ ହୋଇଛି । ଉଭୟ ଦଳ ତୃତୀୟ ଲିଗ ମ୍ୟାଚ ଖେଳିବେ । ମ୍ୟାଚ ବେଶ ରୋମାଞ୍ଚକର ହେବ ବୋଲି ଆଶା କରାଯାଉଛି । ଓଡ଼ିଶା ଏଫସି ପ୍ରଥମ ମ୍ୟାଚରେ ହାଇଦରାବାଦ ଏଫସି ନିକଟରୁ ୦-୧ ଗୋଲରେ ପରାଜିତ ହୋଇଥିବା ବେଳେ ଦ୍ୱିତୀୟ ମ୍ୟାଚରେ ଜାମସେନଦପୁର ଏଫସି ସହିତ ୨-୨ ଗୋଲ ବରାବର ରଖିଥିଲା । ଦୁଇ ମ୍ୟାଚରେ ଓଡ଼ିଶା ଏଫସି ଡିଫେନ୍ସ ବିଭାଗରେ ଦୁର୍ବଳତା ଦେଖିବାକୁ ମିଳିଥିଲା । ଦଳର ତ୍ରୁଟିକୁ ଆମେ ଚିହ୍ନଟ କରିଛୁ । ଏଥିରେ ସୁଧାର ଆଣିବୁ ବୋଲି ମୁଖ୍ୟ ପ୍ରଶିକ୍ଷକ ଷ୍ଟିୱାର୍ଟ ବାକ୍ସଟର କହିଛନ୍ତି । ହେଣ୍ଡି୍ର ଆଣ୍ଟୋନି, ଥୋଇବା ସିଂହ, ସୁବାସ ମେହେର, ପ୍ରେମଜିତ ସିଂହ ପ୍ରମୁଖ ଗତ ମ୍ୟାଚରେ ଭଲ ପ୍ରଦର୍ଶନ କରିବା ସହିତ ଲୟକୁ ଫେରିଛନ୍ତି । ଏହାଛଡ଼ା ଡିଏଗୋ ମୁରାସିଓ ମଧ୍ୟ ଗୋଲ ସ୍କୋର କରିବାରେ ସକ୍ଷମ ହୋଇଚନ୍ତି ।ଏଟିକେ ମୋହନବାଗାନ ଚଳିତ ସିଜିନରେ ଭଲ ପ୍ରଦର୍ଶନ କରି ଲଗାତାର ଦୁଇଟି ମ୍ୟାଚ ଜିତିଛି । ଉକ୍ତ ଦଳ ସହିତ ଆମକୁ ସବୁ ବିଭାଗରେ ଭଲ ପ୍ରଦର୍ଶନ କରିବାକୁ ପଡ଼ିବ । ବିଜୟ ନେଇ ଆମେ ଆଶାବାଦୀ ବୋଲି କୋଚ ବାକ୍ସଟର କହିଛନ୍ତି ।