ଫାଟିଲା ପାଣି ପାଇପ୍ ଘରେ ମାରିଲା ଲହଡି
Arpit Pattnaik
ରାତିଅଧିଆ ଫାଟିଲା ପାଣି ପାଇପ୍ । ଘରେ ଲହଡା ଖେଳଇଲା ଆଣ୍ଠୁଏ ଉଚ୍ଚର ପାଣି । ଯୋଡ଼ା ପୌରାଞ୍ଚଳ ୧୦ ନଂ ୱାର୍ଡ଼ ହନୁମାନ ହଟିଂରେ ଅଭାବନୀୟ ପରିସ୍ଥିତି । ରାତି ଅଧରେ ହଠାତ୍ ପାଣି ପାଇପ୍ ଲାଇନ୍ ଫାଟି ବନ୍ୟା ପରିସ୍ଥିତି ସୃଷ୍ଟି ହେବା ସହ ପ୍ରବଳ ବେଗରେ ପାଣି ନିର୍ଗତ ହୋଇ ଲୋକଙ୍କ ଘରକୁ ମାଡ଼ିଯାଇଥିବା ଦେଖିବାକୁ ମିଳିଛି । ବିଭିନ୍ନ ପଞ୍ଚାୟତକୁ ପାନୀୟ ଜଳ ଯୋଗାଇ ଦେବା ପାଇଁ ଗ୍ରାମୀଣ ଜଳ ଯୋଗାଣ (RWS) ବିଭାଗ ଦ୍ଵାରା ଗୁରୁବେଡ଼ା ଠାରୁ ଯେଉଁ ପାଇପ୍ ଲାଇନ୍ ଯାଇଛି ତାହା ଫାଟିବା କାରଣରୁ ଏଭଳି ପରିସ୍ଥିତି ଦେଖାଦେଇଥିଲା । ଗତରାତି ପ୍ରାୟ ଗୋଟାଏ ସମୟରେ ହନୁମାନ ହଟିଂ ଦେଇ ଯାଇଥିବା ଏହି ପାଇପ୍ ଫାଟିଯାଇଥିଲା । ଲୋକେ ଶୋଇଥିବା ବେଳେ ହଠାତ୍ ଘର ଭିତରକୁ ବନ୍ୟାଭଳି ପାଣି ସୁଅ ମାଡ଼ି ଯାଇଥିଲା । କିଛି ଭାବିବା ଆଗରୁ ଲୋକଙ୍କ ଘର ଭିତରେ ଥିବା ଆସବାବପତ୍ର ସବୁ ବୁଡ଼ି ଯିବା ସହିତ, ପୋଷାକ, ବିଛଣା, ଚାଉଳ ଓ ଅନ୍ୟାନ୍ୟ ଜିନିଷପତ୍ର ନଷ୍ଟ ହୋଇଯାଇଥିଲା । ଏଥିରେ ୧୦ରୁ ଅଧିକ ପରିବାର କ୍ଷତିଗ୍ରସ୍ତ ହୋଇଥିବା ଜଣାପଡିଛି ।
