୫ ବ୍ଲକରେ ଭୂତଳ ଜଳ ସ୍ଥିତି ଉଦ୍ବେଗଜନକ
୫ ବ୍ଲକରେ ଭୂତଳ ଜଳ ସ୍ଥିତି ଉଦ୍ବେଗଜନକ
admin
5303
ଭୁବନେଶ୍ୱର : ରାଜ୍ୟର ୫ଟି ବ୍ଲକରେ ଭୂତଳ ଜଳ ଅଭାବ ସହିତ ଜଳସ୍ତର ଦ୍ରୁତ ଗତିରେ ହ୍ରାସ ପାଉଛି । ଆଉ ୪୪ଟି ବ୍ଲକ୍ ଅନୁରୂପ ସ୍ଥିତି ଆଡ଼କୁ ଅଗ୍ରସର ହେଉଛି । ଜଟିଳ ସ୍ଥିତିରେ ଥିବା ୫ଟି ବ୍ଲକ୍ ମଧ୍ୟରୁ ୨ଟି ବାଲେଶ୍ୱର ଜିଲ୍ଲାରେ ଥିବା ବେଳେ ଯାଜପୁର, କେନ୍ଦ୍ରାପଡ଼ା ଓ ଖୋର୍ଦ୍ଧା ଜିଲ୍ଲାରେ ଗୋଟିଏ କରି ରହିଛି ।
ଜଳ ସମ୍ପଦ ମନ୍ତ୍ରୀ ରଘୁନନ୍ଦନ ଦାସ ଆଜି ବିଧାନସଭାରେ ବିଜେଡି ବିଧାୟକ ପ୍ରଫୁଲ୍ଲ ସାମଲଙ୍କ ଏକ ପ୍ରଶ୍ନର ଉତ୍ତରରେ ଏହି ସୂଚନା ଦେଇଛନ୍ତି । ମନ୍ତ୍ରୀ ଦର୍ଶାଇଛନ୍ତି ଯେ ୨୦୧୭ ଭୂତଳ ଜଳ ଆକଳନ ଅନୁଯାୟୀ, ୩୧୪ଟି ବ୍ଲକ୍ ମଧ୍ୟରୁ ବାଲେଶ୍ୱର ଜିଲ୍ଲାର ବାହାନଗା ଓ ବାଲିଆପାଳ, ଯାଜପୁର ଜିଲ୍ଲାର କୋରେଇ, କେନ୍ଦ୍ରାପଡ଼ା ଜିଲ୍ଲାର ଗରଦପୁର ଓ ଖୋର୍ଦ୍ଧା ଜିଲ୍ଲାର ବୋଲଗଡ଼ ବ୍ଲକରେ ଭୂତଳ ଜଳସ୍ଥିତି ଅତି ଉଦ୍ବେଗଜନକ ସ୍ଥିତିରେ ରହିଛି । ସେହିଭଳି ଆଉ ୪୪ଟି ବ୍ଲକରେ ଭୂତଳ ଜଳ ଜଟିଳ ସ୍ଥିତି ଆଡ଼କୁ ଗତି କରୁଛି । ୬ଟି ବ୍ଲକର ଭୂତଳ ଜଳ ଲବଣାକ୍ତ ହୋଇଥିବା ବେଳେ ୨୫୯ ବ୍ଲକରେ ଭୂତଳ ଜଳ ବ୍ୟବହାର ସୁରକ୍ଷିତ ସ୍ଥିତିରେ ୬୦ ପ୍ରତିଶତ ତଳକୁ ରହିଛି । ସେହିଭଳି ୨୭ଟି ସହରାଞ୍ଚଳରେ ମଧ୍ୟ ଭୂତଳ ଜଳସ୍ତର କମିବାରେ ଲାଗିଛି ।
ଏହିସବୁ ବ୍ଲକ୍ ଓ ସହରାଞ୍ଚଳଗୁଡ଼ିକରେ ଭୂତଳ ଜଳ ପୁନଃଭରଣ ନିମନ୍ତେ ଭୂତଳ ଜଳ ନିଦେ୍ର୍ଧଶାଳୟ ଦ୍ୱାରା ଏକ ଯୋଜନା ପ୍ରସ୍ତୁତ ହୋଇଛି । ଏଥିରେ ପ୍ରାୟ ୧୮୮୫ ସରକାରୀ କୋଠା ଏବଂ ପ୍ରାୟ ୩୦ ହଜାର ବେସରକାରୀ କୋଠାର ଛାତ ଉପରେ ବର୍ଷାଜଳ ଅମଳ କରିବା ସହିତ ଅକାମୀ ହୋଇପଡ଼ିଥିବା ୩୩୦୦ ପାନୀୟ ଜଳକୂପ ଦ୍ୱାରା ଭୂତଳ ଜଳର ପୁନଃଭରଣ କରାଯିବା ପାଇଁ ଲକ୍ଷ୍ୟ ରହିଛି ।
