ପିଲାଙ୍କୁ ପଢ଼ାଇଲେ ବିଧାୟକ : ଛାତ୍ରଛାତ୍ରୀଙ୍କୁ ପଣିକିଆ ପଚାରିଲେ, ଗଣିତ ସୂତ୍ର ବତାଇଲେ
ପିଲାଙ୍କୁ ପଢ଼ାଇଲେ ବିଧାୟକ : ଛାତ୍ରଛାତ୍ରୀଙ୍କୁ ପଣିକିଆ ପଚାରିଲେ, ଗଣିତ ସୂତ୍ର ବତାଇଲେ
admin
4000
ବଲାଙ୍ଗୀର/ଲୋଇସିଂହା : ପିଲାଙ୍କୁ ପଢ଼ାଇଲେ ଲୋକସିଂହା ବିଧାୟକ ଡ.ମୁକେଶ ମହାଲିଙ୍ଗ । ହାଇସ୍କୁଲ ପିଲାଙ୍କୁ ଗଣିତର ସୂତ୍ର ପଚାରିଲେ ଏବଂ କୁନିକୁନି ପିଲାଙ୍କୁ ପଣିକିଆ ପଚାରି ଦକ୍ଷତା ପରଖିଲେ । ବିଧାୟକଙ୍କ ଏଭଳି ଆକସ୍ମିକ ପରିଦର୍ଶନ ଓ ପିଲାଙ୍କୁ ପଢ଼ାଇବା ଦେଖି ସ୍କୁଲ କର୍ତ୍ତୃପକ୍ଷ ଆଚମ୍ବିତ ହୋଇପଡ଼ିଥିବା ବେଳେ ବିଧାୟକଙ୍କ ଏତାଦୃଶ କାମ ଚର୍ଚ୍ଚାକୁ ଆସିଛି ।
ମଙ୍ଗଳବାର ପୂର୍ବାହ୍ନ ପ୍ରାୟ ୧୧ଟା । ଲୋକସିଂହାସ୍ଥିତ କସ୍ତୁରବା ଗାନ୍ଧି ଉଚ୍ଚ ପ୍ରାଥମିକ ବିଦ୍ୟାରେ ପାଠପଢ଼ା ଚାଲିଥିବା ବେଳେ ଆକସ୍ମିକ ଭିତରକୁ ପଶି ଆସିଥିଲେ ବିଧାୟକ ଶ୍ରୀ ମହାଲିଙ୍ଗ । ପ୍ରଥମେ ସେ ବିଦ୍ୟାଳୟର ବାଳିକା ହଷ୍ଟେଲ ବୁଲି ଦେଖିବା ସହ ସମସ୍ୟା ଅନୁଧ୍ୟାନ କରିଥିଲେ । ସେଠାରେ ଫେରି ଶ୍ରେଣୀ କୋଠରୀକୁ ଯାଇଥିଲେ । ସପ୍ତମ ଶ୍ରେଣୀରେ ଜଣେ ଶିକ୍ଷୟିତ୍ରୀ ପାଠ ପଢ଼ାଉଥିବା ବେଳେ ତାଙ୍କ ସହିତ ଆଲୋଚନା କରି ଛାତ୍ରୀମାନଙ୍କୁ ୬ ଖନ୍ଦାରୁ ୯ ଖନ୍ଦା ମଧ୍ୟରେ ପଣିକିଆ ପଚାରିଥିଲେ । ଛାତ୍ରୀମାନେ ସାମାନ୍ୟ ଭୟଭୀତ ହୋଇଥିଲେ ହେଁ ତାଙ୍କ ପ୍ରଶ୍ନର ଉତ୍ତର ଦେଇଥିଲେ । ପରେ ସେଠାରୁ ବାହାରି ଅଷ୍ଟମ ଶ୍ରେଣୀକୁ ଯାଇ ବୀଜଗଣିତ, ସମ୍ପର୍କରେ ପିଲାଙ୍କ ଜ୍ଞାନ ପରଖିଥିଲେ । ପ୍ରାୟ ଦେଢ଼ ଘଣ୍ଟାଧରି ସ୍କୁଲରେ ରହିବା ସହ ପ୍ରଧାନଶିକ୍ଷୟିତ୍ରୀ କନକମଞ୍ଜରୀ ପାଣିଗ୍ରାହୀଙ୍କ ସହିତ ଆଲୋଚନା କରି ସେଠିକାର ବିଭିନ୍ନ ସମସ୍ୟା ସମ୍ପର୍କରେ ପଚାରି ବୁଝିଥିଲେ । ସମସ୍ୟାଗୁଡ଼ିକର ଶୀଘ୍ର ସମାଧାନ ପାଇଁ ସେ ଆବଶ୍ୟକ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଥିଲେ ।
