ହୋଟେଲ୍ ରୁମ୍ରେ ମିଳିଲା ଭିଜେ ଚିତ୍ରାଙ୍କ ମୃତଦେହ
ହୋଟେଲ୍ ରୁମ୍ରେ ମିଳିଲା ଭିଜେ ଚିତ୍ରାଙ୍କ ମୃତଦେହ
admin
2900
ଚେନ୍ନାଇ : ଦକ୍ଷିଣ ଭାରତର ଲୋକପ୍ରିୟ ଅଭିନେତ୍ରୀ ଭିଜେ ଚିତ୍ରା ଆତ୍ମହତ୍ୟା କରିଥିବାର ସୂଚନା ମିଳିଛି । ମାତ୍ର ୨୮ ବର୍ଷ ବୟସରେ ଅଭିନେତ୍ରୀ ଜଣକ ଚେନ୍ନାଇ ନସରପେଟ୍ଠାରେ ଏକ ହୋଟେଲ୍ରେ ଫାଶୀ ଲଗାଇ ଆତ୍ମହତ୍ୟା କରିଥିବାର ସୂଚନା ରହିଛି । କିଛିଦିନ ପୂର୍ବେ ଜଣାଶୁଣା ବ୍ୟବସାୟୀ ହେମନ୍ତ ରବିଙ୍କ ସହିତ ତାଙ୍କର ନିର୍ବନ୍ଧ ହୋଇଥିବାବେଳେ ତାଙ୍କର ଆତ୍ମହତ୍ୟା ଖବରଟି ତାଙ୍କ ପ୍ରଶଂସକଙ୍କୁ ଝଟ୍କା ଦେଇଛି । ତେବେ ଚିତ୍ରାଙ୍କ ଆତ୍ମହତ୍ୟା ଘଟଣାକୁ ନେଇ ତାଙ୍କ ଭାବୀସ୍ବାମୀଙ୍କୁ ପୋଲିସ୍ ପଚରାଉଚୁରା କରୁଛି । ତାମିଲ୍ ଭାଷାର ଲୋକପ୍ରିୟ ଧାରାବାହିକ ‘ପାଣ୍ଡିଆନ୍ ଷ୍ଟୋର୍ସ’ରେ ମୁଲଇ ଚରିତ୍ରରେ ଅଭିନୟ କରି ଘରେ ଘରେ ବେଶ୍ ପରିଚିତ ହୋଇପାରିଥିଲେ । ତେବେ ସେ ଡିପ୍ରେସନ୍ରେ ଥିବାରୁ ଏପରି ଏକ ଚରମ ନିଷ୍ପତ୍ତି ନେଇଥିବାର ଜଣାପଡିଛି ।
ମିଳିଥିବା ସୂଚନା ଅନୁସାରେ ସେ ଶୁଟିଂ ସାରା ବିଳମ୍ବିତ ରାତ୍ରି ଅର୍ଥାତ୍ ୨.୩୦ରେ ହୋଟେଲ୍କୁ ଫେରିଥିଲେ । ତେବେ ସେହି ହୋଟେଲ୍ରେ ସେ ତାଙ୍କ ଭାବୀ ସ୍ବାମୀଙ୍କ ସହିତ ରହୁଥିଲେ । ଚିତ୍ରାଙ୍କ ଭାବୀ ସ୍ବାମୀ ହେମନ୍ତଙ୍କ କହିବାନୁସାରେ ଶୁଟିଂ ସାରି ଚିତ୍ରା ହୋଟେଲରେ ପହଞ୍ଚିବା ପରେ ଗାଧୋଇବାକୁ ଯାଇଥିଲେ। ସେ ଅଧିକ ସମୟ ଗାଧୁଆ ଘରେ ରହିବାରୁ ହେମନ୍ତ ଏନେଇ ହୋଟେଲ କର୍ମଚାରୀଙ୍କୁ ଜଣାଇଥିଲେ। ନକଲ ଚାବିରେ କବାଟ ଖୋଲିବା ପରେ ତାଙ୍କ ମୃତଦେହ ଝୁଲନ୍ତା ଅବସ୍ଥାରେ ମିଳିଥିଲା। ପୁଲିସ ଚିତ୍ରାଙ୍କ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି।
ସୂଚନାଯୋଗ୍ୟ, ଚିତ୍ରା ଜଣେ ସଫଳ ଅଭିନେତ୍ରୀ ହେବା ସହିତ ଜଣେ ଭଲ ଉପସ୍ଥାପିକା ଭାବେ ବେଶ୍ ପରିଚିତ ରହିଥିଲେ । ୨୦୧୩ ମସିହାରୁ ସେ ବହୁଲୋକପ୍ରିୟ ରିଅଲିଟି ଶୋ’ରେ ଉପସ୍ଥାପିକା ତଥା ପ୍ରତିଯୋଗୀ ଭାବେ ରହିଥିଲେ । ସେହିପରି ଜୀ ତାମିଲ୍ର ଧାରାବାହିକର ’ଡାର୍ଲିଂ ଡାର୍ଲିଂ, କର୍ଲସ୍ ତାମିଲ୍ରେ ଭେଲୁ୍ଞ୍ଚି’ରେ ମଧ୍ୟ ସେ ଅଭିନୟ କରିଥିଲେ । ମାତ୍ର ୨୮ ବର୍ଷ ବୟସରେ ଚିତ୍ରାଙ୍କର ଆତ୍ମହତ୍ୟା ଖବର ଟେଲି ଇଣ୍ଡଷ୍ଟ୍ରିରେ ଶୋକର ଛାୟା ଖେଳାଇ ଦେଇଛି ।
