ହଜିଗଲା ମାନବିକତା, ନାଁ ନେବାକୁ ସାପକୁ ମାରିଲେ ରଙ୍ଗ
Keonjhar-old
8689
ଭୁବନେଶ୍ୱର : ଗତ କିଛି ଦିନ ତଳେ ନୟାଗଡ ଜିଲ୍ଲା ରଣପୁର ରୁ ଏକ ବିରଳ ଧଳା ରଙ୍ଗର ନାଗ ସାପ ଉଦ୍ଧାର କରାଯିବା ଘଟଣା ଗଣମାଧ୍ୟମରେ ଚର୍ଚା ହୋଇଥିଲା । ଧଳା ରଙ୍ଗର ସାପଟିକୁ ଆଲବିନୋ କୋବ୍ରା ବୋଲି ଇଲେକ୍ଟ୍ରୋନିକ ଏବଂ ପ୍ରିଣ୍ଟ୍ ଗଣମାଧ୍ୟମ ତରଫରୁ ପ୍ରକାଶ କରାଯାଇଥିଲା । ତେବେ ଏହି ଘଟଣା କୁ ଏକ ମିଛ ଘଟଣା ବୋଲି ଦାବୀ କରି ସାପ ଦେହରେ ଏନମେଲ ପେଣ୍ଟ ବା ରଙ୍ଗ ବୋଳି ଜନସାଧାରଣଙ୍କୁ ମଧ୍ୟ ଠକା ଯାଇଛି ବୋଲି ଅଭିଯୋଗ କରିଛନ୍ତି ସ୍ନେକ ହେଲ୍ପ ଲାଇନ ର ସାଧାରଣ ସମ୍ପାଦକ ତଥା ଖୋର୍ଦ୍ଧା ଜିଲ୍ଲା ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ । ଧଳା ରଙ୍ଗ ଏନାମେଲ ରଙ୍ଗ ବୋଳା ଯାଇଥିବା ପ୍ରମାଣ କରି କ୍ରାଇମବ୍ରାଞ୍ଚ ଏଡିଜି ଙ୍କୁ ତଦନ୍ତ ପାଇଁ ଇମେଲ ମାଧ୍ୟମରେ ପତ୍ର ଲେଖିବା ସହିତ, ଏହା ଏକ ନୂଆ ଧରଣର ବନ୍ୟ ପ୍ରାଣୀ ଅପରାଧ ହୋଇଥିବାରୁ ରାଜ୍ୟର ମୁଖ୍ୟ ବନ୍ୟପ୍ରାଣୀ ତତ୍ତ୍ୱାବଧାରକ ଏବଂ ୱାଇଲ୍ଡ ଲାଇଫ କ୍ରାଇମ କଣ୍ଟ୍ରୋଲ ବ୍ୟୁରୋ ର ଅତିରିକ୍ତ ନିର୍ଦ୍ଦେଶକଙ୍କୁ ମଧ୍ୟ ଏନେଇ ଅବଗତ କରେଇଛନ୍ତି ଶୁଭେନ୍ଦୁ ମଲ୍ଲିକ ।
ରାସାୟନିକ ଏନାମେଲ ରଙ୍ଗ ବୋଳା ଯାଇଥିବାରୁ ସାପ ଟିର ପେଟ ତଳ କାତି ଗୁଡିକ ଅଲଗା ଅଲଗା ନ ହୋଇ ମିଶିଗଲା ପରି ଦେଖାଯାଉଛି । ଏହା ଫଳରେ ସାପ ଟିକୁ ଚାଲିବାରେ ମଧ୍ୟ ଅସୁବିଧା ହେଉଛି, ଯାହା ଫଳରେ ସାପଟିକୁ ଛାଡିବା ପରେ ସେ ଗୋଟିଏ ଯାଗାରେ ପଡି ରହୁଛି । ସେଇ ଭିଡିଓ କୁ ମଧ୍ୟ ଶୁଭେନ୍ଦୁ ପ୍ରମାଣ ହିସାବରେ ଦେଇଛନ୍ତି । ଏଇ ଭଳି ଏକ ସାଧାରଣ ନାଗ ସାପ କୁ ଧଳା ରଙ୍ଗ ବୋଳି ବିରଳ ଆଲବିନୋ ବୋଲି ଦେଖେଇବା ପାଇଁ ଚେଷ୍ଟା କରିବା ଦେଶରେ ସମ୍ଭବତଃ ପ୍ରଥମ ଘଟନା । କୌଣସି ପ୍ରାଣୀ ଶରୀରରେ ମେଲାନିନ କଣିକା ଅଭାବ ଯୋଗୁଁ ତାହା ଆଲବିନୋ ହୋଇଥାଏ, ଯାହାକି ଏକ ଜେନେଟିକ ମ୍ୟୁଟେସନ । କିନ୍ତୁ, ରଣପୁର ରେ ସାପ ଧରାଳି ଅଜୟ କୁମାର ଦାସ ନିଜେ ଜଣେ ଚିତ୍ରକର ଏବଂ ରଙ୍ଗ କାରିଗର ହୋଇ ଥିବାରୁ ଏଭଳି ଉଦ୍ଭଟ କାମ କରିଛନ୍ତି । ବିଜ୍ଞାନ ବା ଆଇନ ଏଇ ଭଳି ପାଗଳାମୀ କୁ ଆଦୌ ପ୍ରଶୟ ଦିଏନାହିଁ ।
ସାପ ଟି ଦେହରେ ଧଳା ରଙ୍ଗର ରାସାୟନିକ ଏନାମେଲ ରଙ୍ଗ ପ୍ରଲେପ ଦେଇ ଚାଲାକିରେ ଲୋକଙ୍କୁ ବା ମିଡିଆ କର୍ମୀଙ୍କୁ ଠକି ବାରେ ସିନା ସକ୍ଷମ ହେଲେ, ମାତ୍ର ସାପ ଏବଂ ପରିବେଶକୁ ବିପଦ ମୁହଁ କୁ ଠେଲି ଦେଲେ । କାରଣ ମୋଟା ରାସାୟନିକ ରଙ୍ଗ ପ୍ରଲେପ ଯୋଗୁଁ ସାପଟିର ଦେହର ତାପମାତ୍ରା ଅଧିକ ରହିବ, ଯେମିତି ଆମେ କମ୍ବଳ ଘୋଡ଼େଇ ହେଲେ ହୋଇଥାଏ । ଏବେ ଓଡ଼ିଶାରେ ତାପମାତ୍ରା ପ୍ରାୟ ୪୦ ଡିଗ୍ରୀ ସେଣ୍ଟିଗ୍ରେଡ୍ ରୁ ଅଧିକ ରହୁଥିବାରୁ, ସାପ ଟି ଅକଥନୀୟ କଷ୍ଟ ପାଇବ । ସମ୍ଭବତଃ ଖୁବ କମ ଦିନରେ ମରି ମଧ୍ୟ ଯାଇପାରେ । ମୂଷା, ବେଙ୍ଗ, ଚଢେଇ ଆଦି ଶୀକାର କରିବା ପାଇଁ ସାପଟି ସକ୍ଷମ ହେବା କଷ୍ଟ, କାରଣ ଉଜ୍ଜଳ ଧଳା ରଙ୍ଗକୁ ସେମାନେ ଆଗୁଆ ଦେଖି ପାରି ପଳେଇବେ । ଖାଲି ସେତିକି ନୁହେଁ, ଅନ୍ୟ ନାଗ, ତମ୍ପ, ରଣା, ଅହିରାଜ ଆଦି ସାପ, ଏବଂ ଇଗଲ ଆଦି କିଛି ପକ୍ଷୀ ଓ ଯେଉଁ ବି ସ୍ତନ୍ୟପାୟୀ ପ୍ରାଣୀ ରଣପୁର ର ରଙ୍ଗ ବୋଳା ଧଳା ନାଗ କୁ ଖାଇବେ, ସେମାନେ ରାସାୟନିକ ପ୍ରକ୍ରିୟା ହେତୁ ନିଶ୍ଚୟ ମୃତ୍ୟୁ ବରଣ କରିବେ, ଏଥିରେ ସନ୍ଦେହ ନାହିଁ ବୋଲି କହିଛନ୍ତି ଶୁଭେନ୍ଦୁ । ଯଦି ସେହି ରଙ୍ଗବୋଳା ନାଗ ସହିତ ତାର ବିପରୀତ ଲିଙ୍ଗର ନାଗ ମୈଥୁନ କରନ୍ତି, ସେମାନେ ମଧ୍ୟ ସଂକ୍ରମିତ ହୋଇ ପାରନ୍ତି ।
ତେବେ ରାଜ୍ୟରେ ବା ଦେଶରେ ଏଇ ଭଳି ଏକ ସାଧାରଣ ସାପ କୁ ରଙ୍ଗ ବୋଳି ବିରଳ ବୋଲି ଦେଖେଇବା ଘଟନା କେବେ ଘାଟି ନଥିଲା । ଆଜିକାଲି ଅନେକ ଯୁବକ/ଯୁବତୀ ସାପ ଧରି ବିଭିନ୍ନ ଡ୍ରାମା କରି ସେଇ ଫଟୋ ବା ଭିଡିଓ କୁ ସୋସିଆଲ ମିଡିଆ ରେ ପୋଷ୍ଟ କରି ଅର୍ଥ ଉପାର୍ଜନ ର ମାଧ୍ୟମ କରିଛନ୍ତି । ରଣପୁର ରେ ନାଗ ସାପ ଦେହରେ ରଙ୍ଗ ବୋଳି ସେଇଭଳି ପ୍ରଚେଷ୍ଟା ର ଅଂଶ ବିଶେଷ । ତେବେ, ସୋସିଆଲ ମେଡିଆ ରେ ଅଧିକ ଭିୟୁ ବା ଲାଇକ ପାଇବା ପାଇଁ, ଏବଂ ଗଣମାଧ୍ୟମରେ ଚର୍ଚା ସାଉଁଟିବା ପାଇଁ ସିନା ଏଇ ରଙ୍ଗ ବୋଳା ହେଲା, ଏଣେ କିନ୍ତୁ ବନ୍ୟପ୍ରାଣୀ (ସଂରକ୍ଷଣ) ଆଇନ, ୧୯୭୨ ର ଏହା ଖୋଲା ଉଲଂଘନ ହେଉଅଛି । ଏଠାରେ ଉଲ୍ଲେଖଯୋଗ୍ୟ, ଗତ ୧ ଏପ୍ରିଲ ୨୦୨୩ ଠାରୁ ନାଗ ସାପ ବନ୍ୟ ପ୍ରାଣୀ ସଂରକ୍ଷଣ ତାଲିକାରେ ତଫସିଲ ୧ କୁ ଉନ୍ନୀତ ହୋଇଅଛି । ଯାହାଫଳରେ ଏଇ ଅପରାଧ ରେ ଦୋଷୀ ସାବ୍ୟସ୍ତ ହେଲେ ୭ ବର୍ଷ ଜେଲ କିମ୍ବା ୧ ଲକ୍ଷ ଟଙ୍କା ଜୋରିମାନା କିମ୍ବା ଉଭୟ ଦଣ୍ଡର ପ୍ରାବଧାନ ରହିଛି ।
ଏଇଭଳି ଘଟନା ର ପୁନରାବୃତ୍ତି ନହେବା ପାଇଁ କଡା କାର୍ଯ୍ୟାନୁଷ୍ଠାନ ନେବା ପାଇଁ ଶୁଭେନ୍ଦୁ କ୍ରାଇମବ୍ରାଞ୍ଚ ଏଡିଜି ଙ୍କୁ ଅନୁରୋଧ କରିଛନ୍ତି । ଯେଉ ଫୋଟୋ ସବୁ ଗଣମାଧ୍ୟମ କୁ ଦିଆ ଯାଇଥିଲା, ସେଗୁଡିକର ଫୋରେନସିକ ଯାଞ୍ଚ କରିବା ସହିତ ଅଜୟ ଙ୍କୁ ଜେରା କଲେ ସତ ଘଟନା ପଦାକୁ ଆସିବ । ସେହିପରି ଯେଉଁ ବ୍ୟାଗ ରେ ଧଳା ରଙ୍ଗ ବୋଳା ନାଗ ସାପ କୁ ରଖା ଯାଇଥିଲା, ସେଇ ବ୍ୟାଗ କପଡ଼ାରେ ରାସାୟନିକ ରଙ୍ଗ ର କଣିକା ର ଉପସ୍ଥିତି ଯାଞ୍ଚ ପାଇଁ ମଧ୍ୟ ଫୋରେନସିକ ଲାବୋରେଟୋରି ପଠେଇବା ପାଇଁ ଶୁଭେନ୍ଦୁ ଦାବୀ ଜଣେଇଛନ୍ତି ।
