ହାଥରସ ମାମଲାର ନୂଆ ମୋଡ଼ : ପୀଡ଼ିତା ଓ ଅଭିଯୁକ୍ତ ମଧ୍ୟରେ ୧୦୪ ଥର ଫୋନ
ହାଥରସ ମାମଲାର ନୂଆ ମୋଡ଼ : ପୀଡ଼ିତା ଓ ଅଭିଯୁକ୍ତ ମଧ୍ୟରେ ୧୦୪ ଥର ଫୋନ
admin
4036
ନୂଆଦିଲ୍ଲୀ : ହାଥରସ ଗଣଦୁଷ୍କର୍ମ ମାମଲାକୁ ନେଇ ଏବେ ଦେଶ ପଡ଼ୁଛି ଉଠୁଛି । ମାମଲା ଯାଇ ସୁପ୍ରିମକୋର୍ଟରେ ବି ପହଁଚି ସାରିଲାଣି । ତେବେ ଏବେ ହାଥରସ ମାମଲାର ଆଉ ଏକ ନୂଆ ଦିଗ ସାମ୍ନାକୁ ଆସିଛି । ପୀଡ଼ିତା ଓ ଅଭିଯୁକ୍ତ ଉଭୟଙ୍କ ମଧ୍ୟରେ ୧୦୪ ଥର ଫୋନ କଲ ହୋଇଥିବା ନେଇ ପୁଲିସ ସୂଚନା ଦେଇଛି । ହାଥରସ ମାମଲାର ମୁଖ୍ୟ ଅଭିଯୁକ୍ତ ସନ୍ଦୀପ ସିଂହଙ୍କ ସହ ପୀଡ଼ିତା ବହୁବାର ଫୋନରେ କଥା ହୋଇଥିଲେ ବୋଲି ପୁଲିସ ପକ୍ଷରୁ କୁହାଯାଇଛି । ଫୋନ କଲ ଯାଂଚ ତଥ୍ୟ ଆଧାରରେ ପୁଲିସ ପକ୍ଷରୁ ଏହା କୁହାଯାଇଛି ।
ପୁଲିସ ସୂଚନା ଅନୁଯାୟୀ, ମୁଖ୍ୟ ଅଭିଯୁକ୍ତ ସନ୍ଦୀପକୁ ପୀଡ଼ିତାର ଭାଇ ନାମରେ ଥିବା ମୋବାଇଲ ନମ୍ବରରୁ ନିୟମିତ କଲ ଆସୁଥିଲା । ୨୦୧୯ ଅକ୍ଟୋବରରୁ ଉଭୟ ପକ୍ଷଙ୍କ ମଧ୍ୟରେ ନିୟମିତ କଥାବାର୍ତା ଚାଲିଥିଲା । ଚନ୍ଦପା କ୍ଷେତ୍ରସ୍ଥିତ ସେଲ ଟାୱାର ଅଂଚଳରେ ହିଁ ଫୋନ କଲ ଆସୁଥିଲା । ଏହି ଟାୱାରଟି ପୀଡ଼ିତାର ଗାଁ ବୁଲଗଢ଼ିରୁ ୨ କିମି ଦୂରରେ ଅବସ୍ଥିତ । ଉଭୟଙ୍କ ମଧ୍ୟରେ ୬୨ ଆଉଟଗୋଇଙ୍ଗ ଓ ୪୨ ଇନକମିଙ୍ଗ କଲ ହୋଇଥିଲା ।
ସୂଚନାଯୋଗ୍ୟଯେ, ଗତ ସେପ୍ଟେମ୍ବର ୧୪ରେ ପୀଡ଼ିତା ନିଜ ଜମିରେ କାମ କରୁଥିଲେ । ଏହି ସମୟରେ ମୁଖ୍ୟ ଅଭିଯୁକ୍ତ ପୀଡ଼ିତାଙ୍କୁ ଉଠାଇନେବା ସହ ମାରପିଟ କରିଥିଲେ । ତେବେ ପୀଡ଼ିତା ସହ ଗଣଦୁଷ୍କର୍ମ କରାଯିବା ସହ ତାଙ୍କ ବେକକୁ ଚିପି ଦିଆଯାଇଥିଲା ବୋଲି ପରିବାର ଲୋକେ ଅଭିଯୋଗ କରିଥିଲେ । ଗୁରୁତର ଅବସ୍ଥାରେ ପୀଡ଼ିତାଙ୍କୁ ଦିଲ୍ଲୀର ଏକ ହସପିଟାଲରେ ଭର୍ତି କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ଗତ ୨୯ରେ ପୀଡ଼ିତାଙ୍କର ମୃତୁ୍ୟ ହୋଇଥିଲା ।
