ଆସାମରେ ବିଜେପିର ମୁଖ୍ୟମନ୍ତ୍ରୀ ପ୍ରାର୍ଥୀ ହୋଇପାରନ୍ତି ପୂର୍ବତନ ପ୍ରଧାନ ବିଚାରପତି ରଞ୍ଜନ ଗୋଗୋଇ!
ଆସାମରେ ବିଜେପିର ମୁଖ୍ୟମନ୍ତ୍ରୀ ପ୍ରାର୍ଥୀ ହୋଇପାରନ୍ତି ପୂର୍ବତନ ପ୍ରଧାନ ବିଚାରପତି ରଞ୍ଜନ ଗୋଗୋଇ!
admin
4696
ଗୌହାଟୀ: ଭାରତର ପୂର୍ବତନ ପ୍ରଧାନ ବିଚାରପତି ଜଷ୍ଟିସ ରଞ୍ଜନ ଗୋଗୋଇଙ୍କୁ ଆସାମରେ ବିଜେପି ଏହାର ମୁଖ୍ୟମନ୍ତ୍ରୀ ପ୍ରାର୍ଥୀ କରିପାରେ । ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ତରୁଣ ଗୋଗୋଇ ରବିବାର ଏକ ଆକଳନ କରିଛନ୍ତି । ରାଜ୍ୟରେ ଆସନ୍ତା ବର୍ଷ ବିଧାନସଭା ନିର୍ବାଚନ ହେବାକୁ ଯାଉଛି । ଗଣମାଧ୍ୟମ ସହ କଥା ହେବା ବେଳେ କଂଗ୍ରେସ ନେତା ଗୋଗୋଇ କହିଛନ୍ତି ଜଷ୍ଟିସ ଗୋଗୋଇ ଯଦି ରାଜ୍ୟସଭା ସଦସ୍ୟ ହୋଇପାରୁଛନ୍ତି, ତେବେ ମୁଖ୍ୟମନ୍ତ୍ରୀ ପ୍ରାର୍ଥୀ ହେବାରେ କିଛି ଅସମ୍ଭବ ନାହିଁ । ମୁଖ୍ୟମନ୍ତ୍ରୀ ପଦ ପାଇଁ ସେ ସହମତି ପ୍ରକାଶ କରିପାରନ୍ତି । ବିଜେପି ତାଙ୍କୁ ଏହି ପଦରେ ପ୍ରାର୍ଥୀ କରିପାରେ । ସେ ଆହୁରି କହିଛନ୍ତି, ଅଯୋଧ୍ୟା ରାମ ମନ୍ଦିର ମାମଲାରେ ଆସିଥିବା ରାୟକୁ ନେଇ ବିଜେପି ରଞ୍ଜନ ଗୋଗୋଇଙ୍କ ଉପରେ ଖୁସି ଥିଲା । ଏମିତିରେ ରାଜ୍ୟସଭା ଯିବାକୁ ରାଜି ହୋଇ ଜଷ୍ଟିସ ଗୋଗୋଇ ଧୀରେ ଧୀରେ ରାଜନୀତି ପ୍ରବେଶ କରିଛନ୍ତି । ସେ ଚାହିଁଥିଲେ ରାଜ୍ୟସଭା ଯିବାକୁ ମନା କରି ଦେଇଥାନ୍ତେ । କିନ୍ତୁ ତାହା ସେ କଲେ ନାହିଁ । ସେ ଚାହିଁଥିଲେ, ଆରାମରେ ମାନବାଧିକାର କମିଶନ ଅଥବା ଅନ୍ୟ ଅଧିକାର ସଂଗଠନର ଅଧ୍ୟକ୍ଷ ହୋଇପାରିଥାନ୍ତେ । ରାଜନୀତିକୁ ନେଇ ତାଙ୍କର ଆକାଂକ୍ଷା ରହିଥିବାରୁ ସେ ରାଜ୍ୟସଭା ସଦସ୍ୟ ହୋଇଛନ୍ତି । କଂଗ୍ରେସ ନେତା ଗୋଗୋଇ ଆହୁରି କହିଛନ୍ତି, ମୁଁ ଦଳର ମୁଖ୍ୟମନ୍ତ୍ରୀ ପ୍ରାର୍ଥୀ ହେବି ନାହିଁ । ବରଂ ଜଣେ ପରାମର୍ଶଦାତା ଭାବେ କାମ କରିବାକୁ ଅଧିକ ପସନ୍ଦ କରିବି । କଂଗ୍ରେସରେ ଅନେକ ଯୋଗ୍ୟ ପ୍ରାର୍ଥୀ ଅଛନ୍ତି । ସେମାନେ ଦାୟିତ୍ୱ ସମ୍ଭାଳି ପାରିବେ । ତେବେ କଂଗ୍ରେସର ଅନେକ ବରିଷ୍ଠ ନେତା ମେଣ୍ଟ ଗଠନ ଉଦ୍ୟମକୁ ବିରୋଧ କରୁଥିବା ସେ କହିଛନ୍ତି ।
