ମୁହଁ ଖୋଲିଲେ ଅମିତ ଶାହ,"ଘୃଣା' ସୂଚକ ମନ୍ତବ୍ୟ ଯୋଗୁଁ ଦିଲ୍ଲୀରେ ହାରିଲୁ, "ଗୋଲି ମାରୋ' ଏବଂ "ଭାରତ-ପାକିସ୍ତାନ ମ୍ୟାଚ୍' ଭଳି ମନ୍ତବ୍ୟ ଦେବା ଉଚିତ ନଥିଲା
ମୁହଁ ଖୋଲିଲେ ଅମିତ ଶାହ,"ଘୃଣା' ସୂଚକ ମନ୍ତବ୍ୟ ଯୋଗୁଁ ଦିଲ୍ଲୀରେ ହାରିଲୁ, "ଗୋଲି ମାରୋ' ଏବଂ "ଭାରତ-ପାକିସ୍ତାନ ମ୍ୟାଚ୍' ଭଳି ମନ୍ତବ୍ୟ ଦେବା ଉଚିତ ନଥିଲା
admin
5428
ନୂଆଦିଲ୍ଲୀ : ଦିଲ୍ଲୀ ନିର୍ବାଚନ ପ୍ରଚାର ବେଳେ ଦଳର କିଛି ନେତାଙ୍କ ଘୃଣାସୂଚକ ଏବଂ ଉତ୍ତେଜନା ସୃଷ୍ଟିକାରୀ ବୟାନ ଯୋଗୁଁ ବିଜେପି ହାରିଲା । ଏହା ସ୍ୱୀକାର କରିଛନ୍ତି ବିଜେପିର ବରିଷ୍ଠ ନେତା ତଥା କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ସେ କହିଛନ୍ତି ଯେ ବିଜେପି ନେତାଙ୍କ ବିବାଦୀୟ ବୟାନ ପାଇଁ ତାଙ୍କ ଦଳକୁ ଦିଲ୍ଲୀରେ ବଡ଼ କ୍ଷତିର ସମ୍ମୁଖୀନ ହେବାକୁ ପଡ଼ିଛି ।
ଗୁରୁବାର ଏଠାରେ ଟାଇମ୍ସ ନାଓ ସମ୍ମିଟ କାର୍ଯ୍ୟକ୍ରମରେ ଯୋଗ ଦେଇ ଶାହ କହିଛନ୍ତି ଯେ ବିଜେପି ନେତାମାନେ "ଗୋଲି ମାରୋ' ଏବଂ "ଭାରତ-ପାକିସ୍ତାନ ମ୍ୟାଚ୍' ପରି ବିବାଦୀୟ ଟିପ୍ପଣୀ ଦେବା ଉଚିତ ନଥିଲା । ଏହାକୁ ବିଜେପିର ମନ୍ତବ୍ୟ ବୋଲି ବିଚାର କରିବା ଉଚିତ ନୁହେଁ । ଏମାନଙ୍କ ମନ୍ତବ୍ୟ ଠାରୁ ବିଜେପି ନିଜକୁ ଦୂରେଇ ରଖିଛି । ଏଭଳି ବିବାଦୀୟ ବୟାନ ପାଇଁ ବିଜେପି ଦିଲ୍ଲୀରେ କ୍ଷତିଗ୍ରସ୍ତ ହୋଇଥିବା ସେ ସ୍ୱୀକାର କରିଛନ୍ତି । "ଭୋଟିଂ ମେସିନର ବଟନ ଏପରି ଚାପ ଯେ ଏହାର ବିଦ୍ୟୁତ ଆଘାତ ସାହିନ ବାଗରେ ଲାଗିବ\' ବୋଲି ତାଙ୍କ ନିଜର ମନ୍ତବ୍ୟ ସଂପର୍କରେ ଶାହ କହିଲେ ଯେ ଏହାକୁ ଭିନ୍ନ ରୂପେ ଉପସ୍ଥାପିତ କରାଯାଇଛି । ଏହା ତାଙ୍କର ଉଦ୍ଦେଶ୍ୟ ନଥିଲା ।
କଂଗ୍ରେସ ନେତା ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନେଇ ଦେଇଥିବା ଠେଙ୍ଗା ମାଡ଼ ବୟାନକୁ ମଧ୍ୟ ଶାହ ଉଲ୍ଲେଖ କରିଛନ୍ତି । ତେବେ ଗଣମାଧ୍ୟମ ବିଜେପି ନେତାଙ୍କ ବିବାଦୀୟ ବୟାନକୁ ଯେଭଳି ଉପସ୍ଥାପନ କରିଥିଲା, କଂଗ୍ରେସ ନେତାଙ୍କ ବିବାଦୀୟ ବୟାନ ନେଇ ସେଭଳି ଚର୍ଚ୍ଚା କରିନଥିଲା ବୋଲି ଶାହ କହିଛନ୍ତି ।
ଏହି କାର୍ଯ୍ୟକ୍ରମରେ ବିଭିନ୍ନ ପ୍ରଶ୍ନର ଉତ୍ତର ଦେଇ ଶାହ କହିଲେ ଯେ ସିଏଏ ଏବଂ ଏନଆରସି ପାଇଁ ବିଜେପି କ୍ଷତିଗ୍ରସ୍ତ ହୋଇଥିବା ନେଇ ଯେଉଁ ଆକଳନ କରାଯାଉଛି ତାହାକୁ ଶାହ ଖଣ୍ଡନ କରିଛନ୍ତି । ସେ କହିଛନ୍ତି, କୌଣସି ଗୋଟିଏ ନିର୍ଦ୍ଦିଷ୍ଟ ପ୍ରସଙ୍ଗ ନିର୍ବାଚନ ଫଳାଫଳକୁ ପ୍ରଭାବିତ କରେ ନାହିଁ । ଦିଲ୍ଲୀ ନିର୍ବାଚନକୁ ଏହା ଉପରେ ଜନାଦେଶ ବୋଲି ଭାବିବା ଉଚିତ ନୁହେଁ । ସିଏଏର ସକାରାତ୍ମକ ଦିଗ ଉପରେ ଆଲୋଚନା ହେବା ଉଚିତ । ସଂସଦରେ ସେ ବିରୋଧୀଙ୍କର ପ୍ରତ୍ୟେକ ପ୍ରଶ୍ନର ଉତ୍ତର ଦେଇଛନ୍ତି । ଆଜି ମଧ୍ୟ ଲୋକଙ୍କର ପ୍ରତ୍ୟେକ ପ୍ରଶ୍ନର ଉତ୍ତର ଦେବାକୁ ମୁଁ ପ୍ରସ୍ତୁତ ବୋଲି ଶାହ କହିଛନ୍ତି । ଆନ୍ଦୋଳନକାରୀ ଚାହିଁଲେ ସେମାନଙ୍କ ସହିତ ଆଲୋଚନା କରିବାକୁ ସେ ପ୍ରସ୍ତୁତ ଥିବା ସ୍ୱରାଷ୍ଟ୍ର ମନ୍ତ୍ରୀ କହିଛନ୍ତି ।
ଦିଲ୍ଲୀରେ ବିଜେପିର ନିର୍ବାଚନୀ ରଣନୀତି ବିଫଳ ହୋଇଥିବା ଶାହ ସ୍ୱୀକାର କରିଛନ୍ତି । ସେ କହିଛନ୍ତି ଯେ ବିଜେପି କେବଳ ବିଜୟ ଏବଂ ପରାଜୟ ପାଇଁ ନିର୍ବାଚନ ଲଢ଼ିନାହିଁ । ଆମେ ବିଜେପିର ଆଦର୍ଶ ଏବଂ ମୂଲ୍ୟବୋଧକୁ ପ୍ରସାର କରିବାରେ ବିଶ୍ୱାସ କରୁଛୁ ଏବଂ ଏଥିରେ ଆମେ ସଫଳ ହେଉଛୁ । ଦୀର୍ଘ ଦଶନ୍ଧି ଧରି ଆମେ ବିରୋଧୀ ଭାବେ ବସିଥିଲେ ମଧ୍ୟ ଆମେ ଆମ ଆଦର୍ଶ ଛାଡ଼ି ନଥିଲୁ । ଆମେ ସେତେବେଳେ ବି ଧାରା ୩୭୦କୁ ବିରୋଧ କରିଥିଲୁ ଏବଂ ଏବେ ଏହାକୁ ଉଚ୍ଛେଦ କରିଛୁ ବୋଲି ଶାହ କହିଛନ୍ତି ।
