ସନ୍ତୋଷଙ୍କ ଗୋଡହାତରେ ଏକାଧିକ ଗଭୀର କ୍ଷତ, କାହିଁକି ଏମିତି କରିଲେ ?
ସ୍କର୍ପିଓରେ ଆସିଲେ କିଡନାପ କରିଲେ ଜଙ୍ଗଲକୁ ଟେକି ନେଇ ଶାବଳରେ ପ୍ରବଳ ପିଟିଲେ ଆଉ ଲହୁ ଲୁହାଣ କରି ଫୋପାଡି ଦେଇ ଚାଲିଗଲେ
Arpit Pattnaik
ଏପରି ଲୋମ ଟାଙ୍କୁରା ଅପହରଣ ଓ ଆକ୍ରମଣ ଘଟଣା ଘଟି ଯାଇଛି ରାଜଧାନୀ ଉପକଣ୍ଠରେ । ଅପରହଣ ପରେ ଏମିତି ମରଣାନ୍ତକ ଆକ୍ରମଣ ହୋଇଛି ଯେ ଆମେ ଆପଣଙ୍କୁ ଏହା ଦେଖାଇ ପାରିବୁ ନାହିଁ । ସୋମବାର ସଂଧ୍ୟାରେ ଏହି ଘଟଣା ଘଟି ଯାଇଛି । ଆକ୍ରମଣର ଶିକାର ହୋଇଛନ୍ତି ନନ୍ଦନକାନନ ଥାନା ଅଧୀନ ବରିମୁଣ୍ଡ ଗାଁର ସନ୍ତୋଷ ପଣ୍ଡା । ଗୁରୁତର ଅବସ୍ଥାରେ ତାଙ୍କୁ ଏକ ଘରୋଇ ହସପିଟାଲରେ ଭର୍ତି କରିଛନ୍ତି ପରିବାର ଲୋକେ ।
ପ୍ରତ୍ୟକ୍ଷଦର୍ଶୀ ଓ ସିସିଟିଭି ଅନୁସାରେ ସଂଧ୍ୟା ପ୍ରାୟ 6ଟା ସମୟରେ ଏହି ଧଳା ରଙ୍ଗର ଏକ ସ୍କର୍ପିଓ କାର୍ ଗାଁରେ ପ୍ରବେଶ କରିଥିଲା । କିନ୍ତୁ ଏହାର ନମ୍ବର ପ୍ଲେଟରେ ବ୍ଲାକ୍ ଟେପ୍ ଲଗାଇ ଯାଇଥିଲା । ସନ୍ତୋଷ ଜରିପାଟଣା ଗାଁ ଛକରେ ଛିଡା ହୋଇଥିବା ଦେଖିବାକୁ ପାଇଥିଲେ ଦୁବୃର୍ତ୍ତ । ହଠାତ୍ ତାଙ୍କୁ ଜୋର ଜବରଦସ୍ତ କାର୍ ଭିତରକୁ ଟାଣି ନେଇ ଅପହରଣ କରି ନେଇ ଯାଇଥିଲେ । ପରେ ସନ୍ତୋଷଙ୍କୁ ଗଣ୍ଡରପୁର ନଦୀ ପଠାକୁ ନେଇ ଲୁହା ରଡ଼ ଓ ଶାବଳରେ ପିଟି ଲହୁ ଲୁହାଣ କରି ଦେଇଥିଲେ। ଦରମରା କରିବା ପରେ ସନ୍ତୋଷଙ୍କୁ ରକ୍ତ ଜୁଡୁବୁଡ଼ୁ ଅବସ୍ଥାରେ ଫୋପାଡି ଦେଇ ଚାଲି ଯାଇଥିଲେ । ସ୍ଥାନୀୟ ଲୋକେ ଦେଖିବା ପରେ ପରିବାର ଲୋକଙ୍କୁ ଖବର ଦେଇଥିଲେ।
ପରିବାର ଲୋକେ ତାଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଛନ୍ତି। ଜମିଜମା ବିବାଦକୁ କେନ୍ଦ୍ର କରି ଏହି ମରଣାନ୍ତକ ଆକ୍ରମଣ ହୋଇଥିବା ସନ୍ତୋଷଙ୍କ ସ୍ତ୍ରୀ ଅଭିଯୋଗ କରିଛନ୍ତି। ସେ କହିଛନ୍ତି ବରିମୁଣ୍ଡର ଗାଁର ସନ୍ତୋଷ ରାଉତ ଓ ଟୁଟୁଙ୍କ ସହ ଜମିଜମା ବିକ୍ରିକୁ କେନ୍ଦ୍ର କରି ଆଗରୁ ଗଣ୍ଡଗୋଳ ଥିଲା ।
ସେପଟେ ପୋଲିସ ଏହି ମାମଲାର ତଦନ୍ତ ଆରମ୍ଭ କରିଛି । ସ୍କର୍ପିଓରେ କିଏ ଆସିଥିଲେ, କାର୍ କାହାର ସେନେଇ ଅଧିକ ତଦନ୍ତ ଚଳାଇଛି ।
