ବେଗୁନିଆ ଓ ଚିଲିକାରେ ରାଜନୈତିକ ହିଂସା : ୩ ଆହତ, ଜଣେ ଗୁରୁତର
ବେଗୁନିଆ ଓ ଚିଲିକାରେ ରାଜନୈତିକ ହିଂସା : ୩ ଆହତ, ଜଣେ ଗୁରୁତର
admin
5679
ଖୋର୍ଦ୍ଧା : ତୃତୀୟ ପର୍ଯ୍ୟାୟ ନିର୍ବାଚନ ନିମନ୍ତେ ଭୋଟ୍ ଗ୍ରହଣ ବେଳେ ବେଗୁନିଆ ଓ ଚିଲିକା ନିର୍ବାଚନମଣ୍ଡଳୀରେ ରାଜନୈତିକ ହିଂସା ଦେଖିବାକୁ ମିଳିଛି । ଏଥିରେ ୩ ଜଣ ଆହତ ହୋଇଥିବା ବେଳେ ଜଣେ ଗୁରୁତର ହୋଇଛନ୍ତି ।
ଖୋର୍ଦ୍ଧା ଜିଲ୍ଲା ବେଗୁନିଆ ନିର୍ବାଚନମଣ୍ଡଳୀ ବୋଲଗଡ଼ ବ୍ଲକ କଳାଙ୍ଗ ପଂଚାୟତ ଅନ୍ତର୍ଗତ ଗୋଡଭଙ୍ଗା ଗ୍ରାମର ୧ ନଂ ବୁଥ୍ ରେ କେତେକ ବିଜେଡ଼ି କର୍ମୀ ରିଗିଙ୍ଗ କରୁଥିବା ଅଭିଯୋଗ ହୋଇଥିଲା । କଂଗ୍ରେସ କର୍ମୀ ମାନେ ଏହାର ପ୍ରତିବାଦ କରିବାରୁ ବିଜେଡ଼ି ସମର୍ଥକମାନେ ସେମାନଙ୍କୁ ଆକ୍ରମଣ କରିଥିଲେ । ଫଳରେ ଗୋଡଭଙ୍ଗା ଗ୍ରାମର ନୀଳମଣି ପ୍ରଧାନ, କାଳୁଚରଣ ପ୍ରଧାନ, ଇନ୍ଦ୍ରମଣି ପ୍ରଧାନ ଆହତ ହୋଇଥିଲେ । ଆହତ ମାନଙ୍କୁ ପ୍ରଥମେ ବୋଲଗଡ଼ ମେଡିକାଲରେ ଭର୍ତି କରାଯାଇଥିଲା । ପରେ ଅଧିକ ଚିକିତ୍ସା ନିମନ୍ତେ ନୀଳମଣିଙ୍କୁ ଭୁବନେଶ୍ୱରସ୍ଥିତ ଏମସ୍ କୁ ସ୍ଥାନାନ୍ତରିତ କରାଯାଇଛି ।
ଅନୁରୂପ ଭାବେ ଚିଲିକା ନିର୍ବାଚନମଣ୍ଡଳୀର କହ୍ନେଇପୁର ବୁଥ୍ ନଂ ୮୪ ରେ ଭୋଟ୍ ଦେବାକୁ ନେଇ ବିଜେପି ସମର୍ଥକଙ୍କୁ ଆକ୍ରମଣ ହୋଇଛି । କେତେକ ବିଜେଡ଼ି କର୍ମୀ ତାଙ୍କୁ ଆକ୍ରମଣ କରିଛନ୍ତି । ଆହତ ଚନ୍ଦନ ମାଝିଙ୍କୁ ସ୍ଥାନୀୟ ମେଡିକାଲରେ ଭର୍ତି କରାଯାଇଛି । ଘଟଣାକୁ ନେଇ ସେଠାରେ ଉତେଜନା ଦେଖାଦେଇଛି । ପୋଲିସ ଘଟଣାସ୍ଥଳରେ ପହଂଚି ଶାନ୍ତି ଶୃଙ୍ଖଳା ରକ୍ଷା ପାଇଁ ଉଦ୍ୟମ ଜାରୀ ରଖିଛି ।
